ខេត្តបាត់ដំបង៖ ជនសង្ស័យ(ឆក់និងប្លន់)ម្នាក់ ក្នុងចំណោម២នាក់ដែលឆក់ឱកាសរត់ចេញពីក្នុងស្នងការខេត្តកាលពីជាងកន្លះខែមុននេះ ត្រូវបានកម្លាំងផ្នែកបង្ការបង្ក្រាបនៃការិយាល័យព្រហ្មទណ្ឌកំរិតស្រាល តាមចាប់ខ្លួនបានវិញហើយ កាលពីវេលាម៉ោង១និង៣០នាទីរសៀលថ្ងៃទី១២ ឧសភា នេះ នៅពេលដែលជននេះកំពុងសម្ងំនៅក្នុងផ្ទះ ដែលស្ថិតនៅភូមិអញ្ចាញ សង្កាត់អូរចា ក្រុងបាត់ដំបង។ នេះបើតាមការផ្ដល់ព័ត៌មានពីសមត្ថកិច្ចដែលចុះទៅឡោមព័ទ្ធចាប់ខ្លួនជនសង្ស័យដល់ផ្ទះ។
នាយការិយាល័យព្រហ្មទណ្ឌកំរិតស្រាល លោកឈឿង គឹមសុង បានប្រាប់កោះសន្តិភាពថា ជនសង្ស័យរូបនេះ ឈ្មោះ វង្ស គឹមឡាន ហៅប៉េង អាយុ៣២ឆ្នាំ រស់នៅភូមិ-សង្កាត់ខាងលើនេះ ។ ជននេះ បានរត់រួចពីស្នងការខេត្ត ក្រោយពេលចាប់ខ្លួនបាន២ថ្ងៃពីបទ«ឆក់និងប្លន់» ហើយក៏មានដីកាបង្គាប់ឱ្យនាំខ្លួនរបស់ចៅក្រមស៊ើបសួរផងដែរ ។
សូមបញ្ជាក់ថា ជនឈ្មោះវង្ស គឹមឡាន ហៅ ប៉េវ នេះត្រូវបានកម្កាំងនគរបាលផ្នែកបង្ការបង្ក្រាបនៃការិយាល័យព្រហ្មទណ្ឌកំរិតស្រាល ឃាត់ខ្លួនជាមួយនិងបក្សពួកចំនួន២នាក់ កាលពីរសៀលថ្ងៃទី២៤
មេសា កន្លងទៅថ្មីៗនេះ នៅចំណុចស្រែ១,០០០ ពេលពួកគេកំពុងណាត់ជួបជុំគ្នាលើដងផ្លូវជាយក្រុងមួយកន្លែង ដែលស្ថិតក្នុងភូមិចំការសំរោង១ សង្កាត់ចំការសំរោង ក្រុងបាត់ដំបង ដែលពាក់ព័ន្ធនឹងករណី«ឆក់និងប្លន់»តាមដងផ្លូវ។
ប៉ុន្តែនៅរសៀលថ្ងៃទី២៥ មេសា ស្រាប់តែជនឈ្មោះវង្ស គឹមឡាន នេះ និង ជនម្នាក់ទៀតឈ្មោះ សឹង វីរ: ដែលសមត្ថកិច្ចចាប់ខ្លួនតាមដីកាក្នុងសំណរឿងដាច់ដោយឡែក បានឆក់ឱកាសលួចរត់ចេញពីក្នុងការិយាល័យព្រហ្មទណ្ឌកំរិតស្រាល ពេលមន្ត្រីប្រចាំការនៅទីនោះមានការធ្វេសប្រហែសមួយពេល ។ បើយោងតាមដីកាបង្គាប់ឱ្យនាំខ្លួន របស់ចៅក្រមស៊ើបសួរ នៃសាលាដំបូងខេត្ត ឈ្មោះ វង្ស គឹមឡាន ហៅ ប៉េវ នៅត្រូវបានព្រះរាជអាជ្ញាចោទប្រកាន់ពីបទ«លួចមានស្ថានទម្ងន់ទោស» ដែលចូលរួមប្រព្រឹត្តយ៉ាងសកម្មជាមួយបក្សពួកជិត១០នាក់ទៀត តែមួយចំនួនត្រូវកម្លាំងការិយាល័យជំនាញនេះ ចាប់ញាត់គុកហើយ រីឯនៅសេសសល់ប៉ុន្មាននាក់ទៀតកំពុងសម្ងំលាក់ខ្លួន។
លោកឈឿង គឹមសុង នាយការិយាល័យព្រហ្មទណ្ឌកំរិតស្រាល បានបញ្ជាក់ថា ក្រុមជនសង្ស័យខាងលើនេះ បានធ្វើសកម្មភាព«ឆក់និងប្លន់» អ្នកដំណើរតាមដងផ្លូវស្ទើរទាំងយប់ទាំងថ្ងៃ ឡើងកក្រើកក្រុងបាត់ដំបង តែយើងបង្ក្រាបបានក្រុមនេះប៉ុន្មាននាក់ហើយ។ ហើយ ពេលនេះយើងតាមចាប់ខ្លួនជនសង្ស័យដែលរត់ចេញពីស្នងការបានម្នាក់ហើយ តែនៅម្នាក់ទៀតឈ្មោះសឹង វីរ: កំពុងរត់គេចខ្លួន ប៉ុន្តែកម្លាំងការិយាល័យជំនាញរបស់លោកកំពុងតាមស្វែងរកហើយ៕
ចែករំលែកព័តមាននេះ