ខេត្តព្រះវិហារ ៖ បើតាមសេចក្តីរាយការណ៍បានឱ្យដឹងថា អតីតបុគ្គលិកគ្រឹះស្ថានម្នាក់ត្រូវស្នងការដ្ឋាននគរបាលខេត្តព្រះវិហារ ឃាត់ខ្លួននៅបន្ទប់ក្នុងផ្ទះសំណាក់ បន្ទាប់ពីចូលទៅកាត់សោរទ្វារគ្រឹះស្ថានមីក្រូហិរញ្ញវត្ថុមួយកន្លែងលួចយកទ្រព្យសម្បត្តិ តែមិនសម្រេចក៏ចេញទៅបាត់ តែបែរជាបន្សល់ទុកភស្តុតាងមួយចំនួន ក្រោយមកក៏ឆែកឆេរកាមេរ៉ា ក៏ឃើញពីសកម្មភាពរបស់ជនសង្ស័យតែម្តង។ ជនសង្ស័យរូបនេះបានធ្វើការសកម្មភាពកាលពីថ្ងៃទី១០ ខែឧសភា ឆ្នាំ២០២០ ស្ថិតក្នុងភូមអណ្តូងពោធិ៍ សង្កាត់កំពង់ប្រណាក ក្រុងព្រះវិហារ ។
សេចក្តីរាយការណ៍បន្តថា ជនសង្ស័យម្នាក់ខាងលើ់ឈ្មោះ កៅ វ៉ាន់សុខ ភេទប្រុស អាយុ២៤ឆ្នាំ រស់នៅភូមិចម្រើន ឃុំច្រាច់ ស្រុកជ័យសែន។
តាមការបញ្ជាក់ពីលោកឧត្តមសេនីយ៍ត្រី ឆយ បូរិន នាយសេនាធិការដ្ឋាន នៃស្នងការដ្ឋាននគរបាលខេត្តនៅរសៀលថ្ងៃទី១១ ខែឧសភានេះ បានឱ្យដឹងថា តាមការពិនិត្យលើកាមេរ៉ាសុវត្ថិភាពនៅក្នុងពេលដែលជនសង្ស័យកំពុងធ្វើសកម្មភាពនោះ គឺខណៈពេលដែលសន្តិសុខមិននៅ ជនសង្ស័យក៏បានប្រើប្រាស់ឧបករណ៍កាត់សោរទ្វារអស់ចំនួន៥ រហូតចូលដល់ក្នុងបន្ទប់បេឡា រួចក៏លួចទ្រព្យសម្បត្តិ តែមិនបានសម្រេចឡើយ ដោយសាតែទូដែកនោះជាប់សោរ ។
លោកបន្តថា បន្ទាប់មកជនសង្ស័យក៏បានចាកចេញពីកន្លែងកើតហេតុវិញភ្លាមៗផងដែរ ដោយបន្សល់ទុកវត្ថុតាងបទល្មើសមួយចំនួន រួមមាន ម៉ូទ័រកាត់ដែក១គ្រឿង, ខ្សែព្រីភ្លើង១, មួកសុវត្ថិភាព១, កាបូបស្ពាយ១, ឯកសារអត្តសញ្ញាណមួយចំនួន, ដែកកេះ១, កន្ត្រៃ១, បារី១កញ្ចប់, សោរដែលកាត់ដាច់ចំនួន៥ និងម៉ូតូ១គ្រឿង ពាក់ស្លាកលេខ ភ្នំពេញ 1IA-8496 ផងដែរ។
លោកបន្តទៀតថា ក្រោយពីទទួលបានព័ត៌មានករណីចោរកម្មនេះភ្លាម សមត្ថកិច្ចក៏បានចុះទៅដល់កន្លែងកើតហេតុ រួចធ្វើការស្រាវជ្រាវ និងតាមដានពិនិត្យលើកាមេរ៉ាសុវត្ថិភាព រហូតកំណត់បានមុខសញ្ញាជនសង្ស័យបាន។ លុះរហូតមកដល់ម៉ោង១២ថ្ងៃត្រង់ នាថ្ងៃទី១១ ខែឧសភានេះ សមត្ថកិច្ចក៏បានឈានទៅធ្វើការឃាត់ខ្លួនជនសង្ស័យម្នាក់ដែលកំពុងសំងំលាក់ខ្លួនក្នុងបន្ទប់ជួល នៅផ្ទះសំណាក់ត្បូងពេជ្រ២ ជាប់គ្រឹះស្ថានមីក្រូហិរញ្ញវត្ថុខេត្តព្រះវិហារនោះផងដែរ ។
សមត្ថកិច្ចបញ្ជាក់ទៀតថា ជនសង្ស័យខាងលើនេះ ធ្លាប់ជាអតីតបុគ្គលិកមីក្រូហិរញ្ញវត្ថុ ដែលត្រូវបានបញ្ឈប់កាលពីឆ្នាំ២០១៩កន្លងទៅ ។
លុះមកដល់ពេលនេះ ជនសង្ស័យកំពុងស្ថិតក្នុង ស្នងការដ្ឋាននគរបាលខេត្តព្រះវិហារ ដើម្បីសាកសួរ ដើម្បីកសាងសំណុំរឿងបញ្ជូនទៅតុលាការហើយ ។ (កែសម្រួលដោយ ៖ បុប្ផា)
ចែករំលែកព័តមាននេះ