រាជធានីភ្នំពេញ ៖ រថយន្ដមួយគ្រឿងម៉ាកឡិចស៊ីស is350 អត់មានស្លាកលេខ ហើយដាក់បំពង់ស៊ីមុំាងកែច្នៃបង្កសំឡេងរំខាន ហើយបើកប្រដេញគ្នាជាមួយរថយន្តមួយគ្រឿងផ្សេងទៀត ត្រូវកម្លាំងអាវុធហត្ថខណ្ឌទួលគោកដេញតាមឃាត់បាននាំមកកាន់អាវុធហត្ថខណ្ឌទួលគោកកាលពីវេលាម៉ោង១០យប់ ថ្ងៃទី១១ ខែឧសភា…
រាជធានីភ្នំពេញ ៖ រថយន្ដមួយគ្រឿងម៉ាកឡិចស៊ីស is350 អត់មានស្លាកលេខ ហើយដាក់បំពង់ស៊ីមុំាងកែច្នៃបង្កសំឡេងរំខាន ហើយបើកប្រដេញគ្នាជាមួយរថយន្តមួយគ្រឿងផ្សេងទៀត ត្រូវកម្លាំងអាវុធហត្ថខណ្ឌទួលគោកដេញតាមឃាត់បាននាំមកកាន់អាវុធហត្ថខណ្ឌទួលគោកកាលពីវេលាម៉ោង១០យប់ ថ្ងៃទី១១ ខែឧសភា ឆ្នាំ២០២០ នៅចំណុចរង្វង់មូលវិមានឯករាជ្យ ផ្លូវព្រះសីហនុ កែងផ្លូវនរោត្តម សង្កាត់ចតុមុខ ខណ្ឌដូនពេញ ។
រថយន្ដមួយគ្រឿងខាងលើដែលត្រូវកម្លាំងអាវុធហត្ថដេញតាមឃាត់នោះម៉ាកឡិចស៊ីស is350 ពណ៌ស អត់មានស្លាកលេខ ដាក់បំពង់ស៊ីមុំាងកែច្នៃឮសំឡេងខ្លាំង បើកបរដោយបុរសម្នាក់មិនស្គាលអត្តសញ្ញាណ។
យោងតាមប្រភពព័ត៌មានបឋមពីកម្លាំងអាវុធហត្ថខណ្ឌទួលគោក បានបង្ហើបប្រាប់ឲ្យដឹងថា មុនពេលកើតហេតុ កម្លាំងល្បាតអាវុធហត្ថខណ្ឌកំពុងល្បាតក្នុងមូលដ្ឋាន លុះមកដល់ចំណុចមុខអាវុធហត្ថផ្ទៃប្រទេសក៏ប្រទះឃើញរថយន្ដ២គ្រឿងជិះប្រដេញគ្នាដោយបំពង់ស៊ីមុំាងឮសំឡេងខ្លាំងបង្កការរំខាន។
តាមប្រភពដដែលបានបន្តថា ក្នុងហេតុការណ៍ខាងលើនវមានរថយន្តមួយគ្រឿងអត់មានស្លាកលេខ លុះពេលបើកបរមកដល់ចំណុចអាវុធហត្ថផ្ទៃប្រទេសទៅហើយ រថយន្តនោះនៅតែជាន់ហ្គាររោទិ៍បន្លឺសំឡេងលាន់ដូចរន្ទះផ្អើលអស់អាវុធហត្ថប្រចាំការនៅទីនោះ ហើយថែមទាំងជិះគេចប៉ារាសរបស់សមត្ថកិច្ចខណ្ឌទួលគោកកំពុងដាក់គោលដៅរឹតបន្តឹងច្បាប់ចរាចរណ៍នៅក្បែរនោះទៀតផង ។ ដោយមានការសង្ស័យ ទើបសមត្ថកិច្ចជិះដេញតាមឃាត់ រហូតដល់រង្វង់មូលវិមានឯករាជ្យ ទើបឃាត់រថយន្ដនោះបានមួយគ្រឿង ចំណែកមួយគ្រឿងទៀតបើកគេចបាត់ ។
បច្ចុប្បន្ន រថយន្តមួយគ្រឿងដាក់បំពង់ស៊ីមុំាងកែច្នៃ និងអត់ស្លាកលេខនោះ ត្រូវបានកម្លាំងអាវុធហត្ថខណ្ឌទួលគោកនាំយកទៅរក្សាទុកបណ្តោះអាសន្ត ដើម្បីចាត់ការតាមនីតិវិធី ៕ (កែសម្រួលដោយ ៖ ធីតា)
ចែករំលែកព័តមាននេះ