ខេត្តរតនគិរី ៖ ស្ត្រីម្នាក់មានជំងឺប្រចាំកាយស្រាប់តែប្រកាច់បែកពពុះមាត់បណ្តាលឱ្យបាត់បង់ជីវិតភ្លាមៗមួយរំពេច ដែលហេតុការណ៍នេះបានកើតឡើងកាលពីវេលាម៉ោង១និង៥នាទីរសៀលថ្ងៃទី១០ ខែឧសភា ឆ្នាំ២០២០ នៅភូមិសាយ៉ោះ ឃុំកាឡែង ស្រុកលំផាត់ ខេត្តរតនគិរី។
តាមប្រភពពីមន្ត្រីនគរបាលប៉ុស្តិ៍រដ្ឋបាលឃុំកាឡែងបានឱ្យដឹងថា ជនរងគ្រោះឈ្មោះ ស្វីន សត្យា ភេទស្រី អាយុ២១ឆ្នាំ ជនជាតិទំពួន ជាកសិករ មានទីលំនៅក្នុងភូមិឃុំកើតហេតុខាងលើ។
តាមប្រភពដដែលបានបន្តថា ក្រោយកើតហេតុ កម្លាំងជំនាញសហការជាមួយគ្រូពេទ្យ និងកម្លាំងប៉ុស្តិ៍ក្រុមប្រឹក្សាឃុំ និងមេភូមិចុះទៅដល់កន្លែងកើតហេតុ ហើយបានធ្វើកោសល្យវិច័យជនរងគ្រោះ បានសន្និដ្ឋានថា ជនរងគ្រោះពិតជាបាត់បង់ជីវិតដោយសារជំងឺប្រចាំកាយប្រាកដមែន ពុំមានជាប់ពាក់ព័ន្ធនឹងករណីឃាតកម្មអ្វីនោះទេ។
ក្រោយពីធ្វើកោសល្យវិច័យរួចរាល់ សមត្ថកិច្ចក៏បានធ្វើកំណត់ហេតុប្រគល់ជនរងគ្រោះឱ្យឪពុកម្តាយដើម្បីរៀបចំយកទៅធ្វើបុណ្យតាមប្រពៃណី ៕
ចែករំលែកព័តមាននេះ