ប្រទេសឥណ្ឌា ៖ អង្គភាពអយស្ម័យយាន (រថភ្លើង) ឥណ្ឌាបានប្រកាសថា សេវាកម្មដឹកអ្នកដំណើរនឹងចាប់ផ្តើមដំណើរការឡើងវិញនៅក្នុងប្រទេស ចាប់ពីថ្ងៃអង្គារ៍នេះតទៅ។
ផ្លូវដែកនឹងចាប់ផ្តើមជាមួយរថភ្លើង ជាពិសេសនៅលើផ្លូវដែលបានជ្រើសរើសចំនួន ១៥ រួមមានផ្លូវញូវដេលីទៅមុមបៃ។ នេះបើយោងតាមក្រសួងផ្លូវដែក។ ផ្លូវដែកឥណ្ឌានឹងចាប់ផ្តើមសេវាកម្មពិសេសបន្ថែមលើផ្លូវផ្សេងទៀត ដោយផ្អែកលើទិដ្ឋភាពជាក់ស្តែង។
សេចក្តីថ្លែងការណ៍បានបន្ថែមថា អាទិភាពនឹងត្រូវបានផ្តល់ជូនអ្នកធ្វើការនៅក្នុងមណ្ឌលថែទាំអ្នកជំងឺកូវីដ១៩ ចំនួន២០០០០នាក់ និងអាចឈានដល់ការធ្វើដំណើរ ៣០០ជើងក្នុងមួយថ្ងៃ ដើម្បីដឹកអ្នកដំណើរទូទាំងប្រទេស។
មានតែអ្នកដំណើរដែលមានសំបុត្របញ្ជាក់ត្រឹមត្រូវ ដែលទិញបាននៅពេលរសៀលថ្ងៃច័ន្ទ នឹងត្រូវបានអនុញ្ញាតឱ្យចូលស្ថានីយរថភ្លើង ហើយវាចាំបាច់សម្រាប់អ្នកដំណើរពាក់ម៉ាស់ការពារ និងត្រូវឆ្លងកាត់ការត្រួតពិនិត្យ។ ទាល់តែមិនមានរោគសញ្ញា ទើបគេអនុញ្ញាតឱ្យឡើងលើរថភ្លើង។
គួរបញ្ជាក់ផងដែរថា ផ្លូវដែកឥណ្ឌាកន្លងមក បានបញ្ឈប់សេវាកម្មដឹកអ្នកដំណើរជាលើកដំបូងក្នុងរយៈពេល ១៦៧ឆ្នាំចុងក្រោយ នៅថ្ងៃទី២៤ ខែមីនា បន្ទាប់ពីការប្រកាសបិទប្រទេស ដើម្បីទប់ស្កាត់ការរីករាលដាលនៃជំងឺកូវីដ១៩។ ប្រទេសឥណ្ឌា បានជាប់គាំងចាប់តាំងពីថ្ងៃទី២៤ ខែមីនា ហើយនឹងបន្តរហូតដល់ថ្ងៃទី១៧ ខែឧសភា៕ ដកស្រង់ចេញពីវេបសាយ ៖ cnn (កែសម្រួលដោយ ៖ បុប្ផា)
ចែករំលែកព័តមាននេះ