ខេត្តបាត់ដំបង៖ «តម្លៃត្រសក់ពេលនេះ ឡើងដល់១,៨០០រៀល ទៅ១,៩០០រៀលក្នុង១គីឡូក្រាម ហើយដំណាំត្រសក់ខ្ញុំ ដែលដាំលើផ្ទៃដីសរុបជិត៤ហិកតា ក៏នឹងត្រៀមប្រមូលផលបណ្ដើរៗនាប៉ុន្មានថ្ងៃខាងមុននេះ ហើយក៏មានម៉ូយធំៗកុម្ម៉ង់ទិញទុកមុនអស់ហើយដែរ»។ នេះជាការលើកឡើងរបស់ម្ចាស់ចំការម្នាក់ ទាំងទឹកមុខញញឹមពព្រាយ…
ខេត្តបាត់ដំបង៖ «តម្លៃត្រសក់ពេលនេះ ឡើងដល់១,៨០០រៀល ទៅ១,៩០០រៀលក្នុង១គីឡូក្រាម ហើយដំណាំត្រសក់ខ្ញុំ ដែលដាំលើផ្ទៃដីសរុបជិត៤ហិកតា ក៏នឹងត្រៀមប្រមូលផលបណ្ដើរៗនាប៉ុន្មានថ្ងៃខាងមុននេះ ហើយក៏មានម៉ូយធំៗកុម្ម៉ង់ទិញទុកមុនអស់ហើយដែរ»។ នេះជាការលើកឡើងរបស់ម្ចាស់ចំការម្នាក់ ទាំងទឹកមុខញញឹមពព្រាយ លាយឡំនឹងកាយវិការ ដែលបង្ហាញថា គាត់កំពុងសប្បាយចិត្តខ្លាំងបំផុត ជាមួយនឹងតំលៃកសិផលដែលឡើងខ្ពស់មិនធ្លាប់មានពីមុនមក។
ចាត់ទុកថា ជាកសិករមួយរូប ដែលមានមហិច្ឆិតាខ្ពស់បំផុត ក្នុងការស្ទុះស្ទារច្បាមដាំដំណាំត្រសក់នៅលើផ្ទៃដីរហូតដល់ទៅជិត៤ហិកតា បន្ទាប់ពីបានជ្រាបអំពីគោលនយោបាយរបស់រាជរដ្ឋាភិបាល ដែលបានអំពាវនាវថ្មីៗ ដល់អាជ្ញាធរ ឬមន្ត្រីជំនាញ ឲ្យជួយជម្រុញ និង លើកទឹកចិត្តដល់ប្រជាកសិករឲ្យងាកទៅដាំដំណាំកសិកម្មគ្រប់មុខ (បន្លែ) ដើម្បីបំពេញតាមតម្រូវការទីផ្សារក្នុងប្រទេស ខណៈបន្លែបង្ការគ្រប់ប្រភេទ ដែលនាំចូលពីប្រទេសជិតខាង ត្រូវបានផ្អាកមួយរយៈសិន។
លោកសិន ឈឿត ជាកសិកររស់នៅភូមិត្រស់ ឃុំអូរតាគី ស្រុកថ្មគោល តែលោកនិងកូនៗចំនួន៣គ្រួសារទៀត បានមូលមតិគ្នាជួលដីកសិកម្មមួយកន្លែងនៅឯជាយក្រុង ដែលមានទំហំជិត៤ហិកតា ស្ថិតក្នុងភូមិចំការសំរោង១ សង្កាត់ចំការសំរោង ក្រុងបាត់ដំបង ដើម្បីដាំដំណាំ«ត្រសក់»។ កសិករដែលមានវ័យ៦៥ឆ្នាំ រូបនេះបានផ្ដល់បទសម្ភាសន៍ខ្លីមួយ ជាមួយកោះសន្តិភាព កាលពីល្ងាចថ្ងៃទី១០ ឧសភា ពេលគាត់កំពុងបូមទឹកស្រោចដំណាំត្រសក់របស់គាត់ដែលលាតសន្ធឹងដាច់កន្ទុយភ្នែក។
លោកបាននិយាយដូច្នេះថា «បច្ចុប្បន្ន ផ្លែត្រសក់មានតំលៃថ្លៃគួរសម.! ពេលនេះត្រសក់ខ្ញុំ មានម៉ូយធំៗមកកុម្ម៉ង់ទិញទុកមុនអស់ហើយ បើទោះជាមិនទាន់ដល់ថ្ងៃបេះក្ដី ក្នុងតំលៃ១គីឡូក្រាមពី ១,៨០០រៀល ទៅ ១,៩០០រៀល។ ប៉ុន្តែខ្ញុំនឹងចាប់ផ្ដើមបេះលក់បណ្ដើរៗ នាប៉ុន្មានថ្ងៃខាងមុខនេះ ព្រោះកន្លែងខ្លះខ្ញុំអាចបេះបានហើយ»។
ចំការត្រសក់របស់លោកសិន ឈឿត មានផ្ទៃដីជិត៤ហិចតា បែងចែកជា២ទីតាំង និងលាតសន្ធឹងល្វឹងល្វើយ ជាមួយនឹងការរៀបចំយ៉ាងមានរបៀបតាមលក្ខណៈបច្ចេកទេស ដែលមើលទៅហាក់ដូចជាសួនច្បារដ៏គួរឲ្យចាប់អារម្មណ៍បំផុត។ គេឃើញទីតាំងខ្លះ ទើបនឹងចាប់ផ្ដើមដាំ ទីតាំងខ្លះដើមត្រសក់ទើបលូតលាស់ផុតពីដីបន្តិច រីឯកន្លែងខ្លះទៀតមានផ្កាផ្លែ ដែលម្ចាស់ត្រៀមប្រមូលផលខាងមុខនេះ។ តាមលក្ខណៈបែបនេះ ម្ចាស់ចំការនឹងអាចប្រមូលផលត្រសក់នេះលក់ជាបន្តបន្ទាប់។
នៅក្នុងដីចំការដ៏ល្វឹងល្វើយ លោក សិន ឈឿត បាននិយាយទាំងទឹកមុខញញឹមមិនដាច់ថា ដីកសិកម្មជិត៤ហិចតានេះ មាន២កន្លែងនៅក្បែរគ្នា។ ដីនេះលោកបានជួលគេក្នុងតំលៃ៤០០ដុល្លា ក្នុង១ហិចតា និងបានកុងត្រារយៈពេល១ឆ្នាំ ដើម្បីដាំដំណាំត្រសក់។ គាត់បានបញ្ជាក់យ៉ាងដូច្នេះថា «ដំណាំត្រសក់ដែលដាំលើផ្ទៃដីល្វឹងល្វើយនេះ មិនមែនខ្ញុំធ្វើម្នាក់ឯងទេ គឺ មានចំនួន៤គ្រួសារ តែសុទ្ធសឹងជាកូនចៅខ្ញុំទាំងអស់»។
លោកឈឿត បានប្រាប់បន្ថែមថា « រាល់ឆ្នាំខ្ញុំមិនដែលធ្វើលើទំហំដីដ៏ធំបែបនេះទេ តែឆ្នាំនេះខ្ញុំប្រមូលកូនចៅធ្វើជុំគ្នា។ ព្រោះឃើញព័ត៏មានគេផ្សព្វផ្សាយអំពីប្រសាសន៏សម្ដេចហ៊ុន សែន ប្រកាសផ្អាកការនាំចូលបន្លែពីប្រទេសជិតខាង ហើយជម្រុញឲ្យកសិករសម្រុកដាំបន្លែ ដើម្បីលក់ក្នុងស្រុកវិញ ទើបខ្ញុំសម្រេចខ្ចីបុលប្រាក់គេ ដើម្បីធ្វើទុនពង្រីកដីដាំដំណាំនេះតែម្ដង»។
សម្ដេចតេជោ ហ៊ុន សែន នាយករដ្ឋមន្ត្រី នៃប្រទេសកម្ពុជា បានមានប្រសាសកាលពីពេលថ្មីៗកន្លងទៅនេះ ដោយបានអំពាវនាវដល់ក្រសួងពាក់ព័ន្ធ និង អាជ្ញាធរដែនដី ត្រូវជម្រុញ និង លើកទឹកចិត្តដល់ប្រជាពលរដ្ឋឲ្យបង្កើនការដាំដុះនូវបន្លែគ្រប់មុខ ដើម្បីតម្រូវការលើទីផ្សារក្នុងប្រទេស ខណៈតាមបណ្ដាច្រកទ្វារព្រំដែន ត្រូវបានសម្ដេចប្រកាសឲ្យផ្អាកនាំចូលបន្លែបង្ការ ពីប្រទេសជិតខាងជាបណ្ដោះអាសន្ន ស្របពេលមានការផ្ទុះឡើងនូវជំងឺ«កូវីដ ១៩» ថ្មី ដែលបានរីករាលដាលស្ទើរពាសពេញពិភពលោក រាប់ទាំងប្រទេសកម្ពុជាផង។
ជុំវិញការអំពាវនាវរបស់ប្រមុខរាជរដ្ឋាភិបាលកម្ពុជា នេះ គេបានសង្កេតឃើញថា ប្រជាកសិករមួយចំនួនដែលនិយមដាំដំណាំកសិកម្ម ហាក់បានប្រឹងប្រែងយ៉ាងខ្លាំង ក្នុងការដាំដុះ រីឯតំលៃកសិផលខ្លះ (បន្លែ) ក៏ហាក់មានទីផ្សារគ្រាន់បើដែរ។ មន្ត្រីកសិកម្មម្នាក់បាននិយាយថា ពេលនេះ ប្រជាកសិករបានស្ទុះស្ទារដាំដំណាំស្ទើរគ្រប់កន្លែង ដែលជាការឆ្លើយតបទៅនឹងគោលការរបស់រដ្ឋាភិបាល តែពួកគាត់ហាក់ជួបផលវិបាកបន្តិច គឺ ខ្វះខាតទឹកស្រោចស្របដំណាំ ប៉ុន្តែយ៉ាងណាពួកគាត់នៅតែព្យាយាម។
ដោយឡែកសម្រាប់ លោក សិន ឈឿត វិញ គាត់បានប្រាប់ថា ឆ្នាំនេះគ្រួសារកូនចៅរបស់គាត់បានចំណាយទុនច្រើនគួរសមទៅលើដំណាំត្រសក់នេះ។ គាត់និយាយទៀតថា ដំបូងដៃនេះ គាត់ត្រូវចំណាយប្រាក់ប្រហែល៣,០០០ដុល្លា ទៅលើផ្ទៃដីក្នុង១ហិចតា ដោយគិតចាប់ពីថ្ងៃដាំ រហូតដល់ថ្ងៃប្រមូលផល។ ប៉ុន្តែជាមួយនឹងខ្ទង់ចំណាយដ៏សម្បើមនេះ កសិករដែលមានប្រវត្តិដាំបន្លែជាង៥ឆ្នាំ រូបនេះក៏មិនស្ទាក់ស្ទើរនឹងការបង្ហាញពីផលចំណេញដែរ។
លោកសិន ឈឿត បាននិយាយអំពីទិន្នផលដែលប្រមូលបាន ដោយយោងទៅលើបទពិសោធន៏កន្លងមកយ៉ាងដូច្នេះថា «ដំណាំត្រសក់លើផ្ទៃដី១ហិចតា អាចប្រមូលផលបានចន្លោះពី៣០តោនទៅ៤០តោន ហើយបើពិនិត្យលើដំណាំត្រសក់ខ្ញុំ ពេលនេះគឺល្អគួរសមដែរ។ ដូច្នេះខ្ញុំរំពឹងថា អាចនឹងទទូលបានទិន្នផលប្រហាក់ប្រហែលគ្នា»។ នៅពេលសួរថា បើប្រមូលទិន្នផលបានច្រើនម្លឹងៗ ហើយពេលនេះត្រសក់មានតំលៃខ្ពស់ទៀត តើអាចចំណេញច្រើនទេ ពេលទូទាត់ថ្លៃចំណាយរួច ? គាត់សើចយ៉ាងកក្អឹក.. ហើយងក់ក្បាលបន្តិច ទើបងើបមុខឆ្លើយទាំងញញឹមញញេមថា « បើលក់បានក្នុងតំលៃដូចខាងលើនេះ មែនគឺ ខ្ញុំអាចទទូលបានប្រាក់ចំណេញជាងពាក់កណ្ដាល»។
ប៉ុន្តែយ៉ាងណា លោក សិន ឈឿត ហាក់បានបង្ហាញពីការគាំទ្រពេញទំហឹង ចំពោះគោលនយោបាយរបស់សម្ដេច ហ៊ុនសែន ដែលបានប្រកាសផ្អាកការនាំចូលបន្លែនានា ពីប្រទេសជិតខាងជាបណ្ដោះអាសន្ននេះ ដើម្បីទុកលទ្ធិភាពឲ្យផលិតផលក្នុងស្រុកមានទីផ្សារល្អ។ ព្រោះគាត់មានជំនឿថា បច្ចុប្បន្ននេះកសិករខ្មែរក៏មានបច្ចេកទេសដាំដុះដំណាំគ្រប់មុខបានល្អប្រសើរ និង មានគុណភាពល្អទៀតផង មិនចាញ់បន្លែនាំចូលពីបរទេសឡើយ៕
ចែករំលែកព័តមាននេះ