ប្រទេសអាល្លឺម៉ង់ ៖ ទិន្នន័យផ្លូវការបានបង្ហាញកាលពីថ្ងៃអាទិត្យថា ករណីរីករាលដាលនៃជំងឺកូវីដ១៩ នៅប្រទេសអាល្លឺម៉ង់ មានការស្ទុះឡើងយ៉ាងខ្លាំងជាថ្មីម្តងទៀត ប៉ុន្មានថ្ងៃបន្ទាប់ពីអធិការបតី Angela Merkel បាននិយាយថា ប្រទេសនេះអាចវិលមករកសភាពធម្មតាវិញបន្តិចម្តងៗ។
វិទ្យាស្ថានសុខភាពសាធារណៈ Robert Koch Institute (RKI) បាននិយាយថា អត្រាឆ្លងដែលត្រូវបានតាមដានយ៉ាងស្អិត បានឡើងដល់១.១ ដែលមានន័យថា មនុស្សកើតកូវីដ១៩ ចំនួន ១០នាក់ អាចឆ្លងជាមធ្យមទៅមនុស្ស១១នាក់ផ្សេងទៀត។
RKI បានព្រមានថា ដើម្បីឱ្យអត្រាឆ្លងត្រូវបានគេចាត់ទុកថា ស្ថិតនៅក្រោមការគ្រប់គ្រង និងបន្ថយល្បឿននោះ អត្រាឆ្លងគឺត្រូវតែស្ថិតនៅក្រោម១។ វិទ្យាស្ថាននេះបានព្រមានថា វាឆាប់ពេកក្នុងការធ្វើសេចក្តីសន្និដ្ឋាន ប៉ុន្តែគេបាននិយាយថា ចំនួននៃការឆ្លងថ្មីនឹងចាំបាច់ត្រូវឃ្លាំមើលយ៉ាងដិតដល់ក្នុងរយៈពេលប៉ុន្មានថ្ងៃខាងមុខនេះ។
ទិន្នន័យចុងក្រោយបានធ្វើឱ្យមានការព្រួយបារម្ភ បន្ទាប់ពីលោកស្រី Merkel បានប្រកាសកាលពីថ្ងៃពុធថា ប្រទេសអាល្លឺម៉ង់ បានចាកចេញពីដំណាក់កាលដំបូងនៃជំងឺរាតត្បាត ហើយរដ្ឋសហព័ន្ធបានប្រកាសបន្ធូរបន្ថយការរឹតត្បិតច្បាប់រក្សាគម្លាត។
ហាង និងសួនកុមារភាគច្រើនបានបើកដំណើរការឡើងវិញ ហើយក្មេងៗកំពុងវិលត្រឡប់ទៅថ្នាក់រៀន ភោជនីយដ្ឋាន កន្លែងហាត់ប្រាណ និងកន្លែងគោរពបូជាក៏ត្រូវបើកឡើងវិញម្តងទៀត។
យ៉ាងណាក៏ដោយ អាជ្ញាធរមូលដ្ឋានអាល្លឺម៉ង់បានត្រៀមរួចជាស្រេចក្នុងការរឹតបន្តឹងឡើងវិញ ប្រសិនបើការឆ្លងឡើងលើសពី ៥០ករណីក្នុងប្រជាជន ១សែននាក់ ក្នុងរយៈពេលមួយសប្តាហ៍៕ ដកស្រង់ចេញពីវេបសាយ ៖ bangkokpost (កែសម្រួលដោយ ៖ បុប្ផា)
ចែករំលែកព័តមាននេះ