ខេត្តបាត់ដំបង ៖ បុរសម្នាក់ដែលគេសន្និដ្ឋានថា ជាមេខ្លោងជួញដូរគ្រឿងញៀនដ៏ធំម្នាក់សម្រាប់បំរើសេវាចែកចាយពាសពេញខេត្តបាត់ដំបង ត្រូវបានកម្លាំងអធិការនគរបាលក្រុងបាត់ដំបងឃាត់ខ្លួនហើយ កាលពីវេលាម៉ោង៣ និង៤៥នាទីរសៀលថ្ងៃទី១០ ឧសភា ខណៈពេលកំពុងដោះដូរទំនិញនៅក្នុងបន្ទប់ជួលមួយកន្លែង នៅក្នុងភូមិវត្តគរ…
ខេត្តបាត់ដំបង ៖ បុរសម្នាក់ដែលគេសន្និដ្ឋានថា ជាមេខ្លោងជួញដូរគ្រឿងញៀនដ៏ធំម្នាក់សម្រាប់បំរើសេវាចែកចាយពាសពេញខេត្តបាត់ដំបង ត្រូវបានកម្លាំងអធិការនគរបាលក្រុងបាត់ដំបងឃាត់ខ្លួនហើយ កាលពីវេលាម៉ោង៣ និង៤៥នាទីរសៀលថ្ងៃទី១០ ឧសភា ខណៈពេលកំពុងដោះដូរទំនិញនៅក្នុងបន្ទប់ជួលមួយកន្លែង នៅក្នុងភូមិវត្តគរ សង្កាត់វត្តគរ ក្រុងបាត់ដំបង ហើយមន្ត្រីជំនាញរឹបអូសបានវត្ថុតាងយ៉ាងច្រើនសន្ធឹកសន្ធាប់។
អធិការក្រុងបាត់ដំបង លោកឆាង វណ្ណឆៃ បានឱ្យដឹងថា ជនសង្ស័យឈ្មោះ លី អុីសា ហៅ ពាង ភេទប្រុសអាយុ៣២ឆ្នាំ រស់នៅភូមិណាកាឆាយ ឃុំកូប ស្រុកអូរជ្រៅ ខេត្តបន្ទាយមានជ័យ តែបានមកជូលបន្ទប់ស្នាក់នៅបណ្តោះអាសន្ន ដើម្បីប្រព្រឹត្តបទល្មើសគ្រឿងញៀន នៅភូមិវត្តគរ សង្កាត់វត្តគរ ក្រុងបាត់ដំបង។ លោកអធិការក្រុងរូបនេះបានប្រាប់ថា ជននេះត្រូវកម្លាំងជំនាញគ្រឿងញៀនរបស់លោកឆ្មក់ចូលទៅបង្ក្រាបបាន ពេលកំពុងដោះដូរគ្រឿងញៀននៅក្នុងបន្ទប់ស្នាក់នៅ ។
ក្រោយឃាត់ខ្លួន លោកស្នងការខេត្ត និងលោកព្រះរាជអាជ្ញាបញ្ជាឱ្យលោកកុយ ហៀង ស្នងការរងខេត្ត ដឹកនាំកម្លាំងធ្វើការឆែកឆេបន្ទប់ជូលរបស់ជននេះ រហូតរកឃើញថ្នាំញៀនជាច្រើនទៀតដែលជននេះបានលាក់ទុក ដើម្បីធ្វើចរាចរណ៍នៅក្នុងខេត្តបាត់ដំបង។ បើតាមរបាយការណ៍បានឱ្យដឹងថា វត្ថុតាងដែលចាប់យកបានរួមមាន៖ ថ្នាំញៀនប្រភេទ ICE (ម៉ាទឹកកក) ចំនួន១៥ថង់ (ធំ១១ថង់ តូច០៤ថង់) មានទម្ងន់១០៣៤,២០ក្រាម (ជាង១គីឡូក្រាម) ថ្នាំកេតាមីនចំនួន០១កូនថង់, សារធាតុរាវចំនួន០៣កូនដប (សង្ស័យមានសារធាតុញៀន) កូនជញ្ជីងសំរាប់ថ្លឹងថ្នាំញៀនលក់ចំនួន០១, ម៉ូូតូ០១គ្រឿងម៉ាកអុិចសេចទ័រ ពណ៌សលាយខ្មៅ គ្មានស្លាក់លេខ រួមទាំងវត្ថុតាងពាក់ព័ន្ធមួយចំនួនទៀត។
នៅចំពោះមុខសមត្ថកិច្ចនិងវត្ថុតាងដ៏សន្ធឹកបែបនេះ មេខ្លោងគ្រឿងញៀនប្រចាំបាត់ដំបង ឈ្មោះ លី អុីសា ហៅ ពាង បានទទូលស្គាល់ថា វត្ថុតាងទាំងអស់ដែលសមត្ថកិច្ចដកហូតបាន គឺពិតជារបស់ខ្លួន ដែលខ្លួនរក្សាទុកបំរ៉ុងលក់ដូរបន្តទៅឱ្យម៉ូយនានានៅក្នុងខេត្តបាត់ដំបង ។ បើតាមការស្ដាប់ចម្លើយជននេះ គឺឈ្មោះ ពាង នេះជាមេខ្លោងជូញដូរថ្នាំញៀនដ៍ធំដុំម្នាក់ប្រចាំខេត្តបាត់ដំបង។ ជននេះបាននិយាយថា ខ្លួនតែងទទូលយកថ្នាំញៀនទាំងនេះ ពីមេខ្លោងរបស់ខ្លួននៅរាជធានីភ្នំពេញ រួចយកមកស្ដុបទុកក្នុងបន្ទប់ស្នាក់នៅរបស់ខ្លួន ដើម្បីលក់ដូរបន្តទៅឱ្យម៉ូយនានា នៅក្នុងខេត្តបាត់ដំបង។
យ៉ាងណាក៏ដោយ បើតាមលោកឆាង វណ្ណឆៃ អធិការក្រុងបាត់ដំបង បានបញ្ជាក់ថា ពេលនេះ លោកស្នងការខេត្ត បានបញ្ជាឱ្យមន្ត្រីជំនាញសាកសួរជនសង្ស័យរូបនេះ ដើម្បីកសាងសំណុំរឿងបញ្ជូនទៅតុលាការហើយ។ ដោយឡែក លោកស្នងការខេត្ត ក៏បានបញ្ជាឲ្យធ្វើការស្រាវជ្រាវរកបក្សពួក ដែលជាបណ្ដាញជួញដូរថ្នាំញៀននេះ ដើម្បីមានវិធានការបន្តផងដែរ៕
ចែករំលែកព័តមាននេះ