ខេត្តបាត់ដំបង ៖ គិតត្រឹមរយៈពេល០៨ថ្ងៃ នៃដើមខែឧសភា ឆ្នាំ២០២០នេះ កម្លាំងនគរបាលផ្នែកប្រឆាំងគ្រឿងញៀននៅតាមបណ្ដាអធិការស្រុក ក្រុង និងការិយាល័យជំនាញផង បានចុះបង្ក្រាបបទល្មើសជូញដូរគ្រឿងញៀនចំនួនជា៣០ករណី និងបានឃាត់ខ្លួនជនសង្ស័យ ដែលពាក់ព័ន្ធនឹងបទល្មើសនេះបានជាង៦០នាក់ រួមទាំងដកហូតបានវត្ថុតាងនានាជាច្រើនផងដែរ។ នេះបើយោងតាមរបាយការណ៏បឋមរបស់ការិយាល័យប្រឆាំងបទល្មើសគ្រឿងញៀននៃស្នងការខេត្ត។
លោក សុខ និមល ប្រធានការិយាល័យប្រឆាំងបទល្មើសគ្រឿងញៀនបានឲ្យដឹងថា នេះគ្រាន់តែជារបាយការណ៍បឋម ដែលបានបូកសរុបក្នុងរយៈពេល៨ថ្ងៃ ដើមខែឧសភានេះ។ លោកបានប្រាប់ថា បើតាមការបូកសរុប គឺមានជនសង្ស័យចំនួន៦៤នាក់ ក្នុងនោះស្ត្រី០៣នាក់ ដែលត្រូវបានឃាត់ខ្លួន ជាមួយនឹងបទល្មើសដែលបានបង្ក្រាបចំនួន៣៤លើក រួមគ្នារវាងកម្លាំងនគរបាលផ្នែកប្រឆាំងគ្រឿងញៀននៅតាមបណ្ដាអធិការស្រុក ក្រុង ជាមួយកម្លាំងការិយាល័យប្រឆាំងបទល្មើសគ្រឿងញៀន ក្រោមការបញ្ជាផ្ទាល់ពីលោកស្នងការខេត្ត និងលោកស្នងការរងទទូលបន្ទុក ហើយយើងក៏រឹបអូសបាននូវវត្ថុតាងថ្នាំញៀនជាច្រើន រួមទាំងវត្ថុតាងផ្សេងៗទៀតជាច្រើនផងដែរ។
បើតាមរបាយការណ៍បានឲ្យដឹងថា ក្រៅពីឃាត់ខ្លួនជនសង្ស័យបានចំនួន៦៤នាក់ ដែលពាក់ព័ន្ធនឹងបទល្មើសជូញដូរគ្រឿងញៀន វត្ថុតាងនានា ដែលមន្ត្រីជំនាញដកហូតបានពីក្រុមជនសង្ស័យខាងលើនេះមានដូចជាថ្នាំញៀនប្រភេទមេតំហ្វេតាមីន ICE ( ម៉ាទឹកកក) ចំនួន៤០២,១៤ក្រាម ថ្នាំញៀនប្រភេទមេតំហ្វេតាមីន Wy (យ៉ាម៉ា)ចំនួន៤០២គ្រាប់ រថយន្ត០១គ្រឿង ម៉ូតូចំនួន០៥គ្រឿង ជញ្ជីងសម្រាប់ថ្លឹងគ្រឿងញៀនចំនួន០៥ កាំភ្លើងខ្លីជ័រប្រើហ្គាសចំនួន០១ដើម និង កាំភ្លើងខ្យល់ច្នៃចំនួន០៤ដើម រួមទាំងវត្ថុតាងផ្សេងៗចំនួនទៀត។
ជាមួយនឹងកិច្ចប្រតិបត្តិការបង្ក្រាបបទល្មើសគ្រឿងញៀនក្នុងររយៈពេល០៨ថ្ងៃ នៃដើមខែឧសភា នេះ បើយោងតាមរបាយការណ៍ដដែលបានឲ្យដឹងផងដែរ អំពីវិធានការចុះផ្សព្វផ្សាយនិងអប់រំដល់ប្រជាពលរដ្ឋអំពីបញ្ហាគ្រឿងញៀននេះ ។ លោកសុខ និមល ប្រធានករិយាល័យប្រឆាំងបទល្មើសគ្រឿងញៀន បានសរសេរក្នុងរបាយការណ៍បឋមថា នៅក្នុងរយៈពេល០៨ថ្ងៃនេះ មន្ត្រីជំនាញបានចុះធ្វើការផ្សព្វផ្សាយ និង អប់រំដែលមានខ្លឹមសារប្រយុទ្ធប្រឆាំងនិងគ្រឿងញៀនបានចំនួន៦០លើក ដែលមានពលរដ្ឋចូលរួមប្រមាណ២.៤៣៧នាក់ ហើយក៏មានការចូលរួមបើកវេទការសាធារណៈជាមួយអាជ្ញាធរមូលដ្ឋាន ស្ដីពីការប្រយុទ្ធប្រឆាំងនិងគ្រឿងញៀនជាបន្តបន្ទាប់ផងដែរ ។
លោកសុខ និមល បានបញ្ជាក់ដែរថា ក្នុងចំណោមជនសង្ស័យពាក់ព័ន្ធនឹងបទល្មើសគ្រឿងញៀនទាំង៦៤នាក់ ដែលបានឃាត់ខ្លួនខាងលើនេះ មានមួយចំនួនត្រូវឃាត់ខ្លួនតាមដីការបស់តុលាការ ប៉ុន្តែមានមួយចំនួនតូចត្រូវបានបញ្ជូនទៅកាន់មណ្ឌលកែប្រែ ខណៈភាគច្រើនត្រូវកសាងសំណុំរឿងបញ្ជូនទៅតុលាការចាត់ការតាមផ្លូវច្បាប់៕
ចែករំលែកព័តមាននេះ