រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា ទារិកាអភ័ព្វម្នាក់ត្រូវបានគេប្រទះឃើញបាត់បង់ជីវិតក្នុងបន្ទប់ទឹក ដោយសារតែម្តាយបង្កើតរួច ហើយគេចខ្លួនបាត់ស្រមោល ដោយបន្សល់ទារិកានៅតែម្នាក់ឯងរហូតដល់ដាច់ខ្យល់តែម្តង បង្កឱ្យមានការភ្ញាក់ផ្អើលជាខ្លាំង កាលពីម៉ោង១រសៀល ថ្ងៃទី០៩ ខែឧសភា ឆ្នាំ២០២០ នៅចំណុចបន្ទប់ទឹកសាធារណៈមួយកន្លែង ស្ថិតក្នុងភូមិឬស្សី១ សង្កាត់ស្ទឹងមានជ័យទី៣ ខណ្ឌមានជ័យ ។
តាមប្រភពពីពលរដ្ឋនៅក្បែរទីតាំងកើតហេតុ បានឱ្យដឹងថា មុនដំបូងឡើយ គេសង្គេតឃើញស្ត្រីមានផ្ទៃពោះវ័យជាង២០ឆ្នាំម្នាក់បានដើរយ៉ាងប្រញាប់ប្រញាល់សំដៅចូលទៅក្នុងបន្ទប់ទឹកសាធារណៈមួយកន្លែង (នៅចំណុចកើតហេតុខាងលើ)។ ពេលនោះដោយគិតថា រូបនាងប្រហែលប្រញាប់ចូលទៅបត់ជើងតែប៉ុណ្ណោះ លុះមួយសន្ទុះក្រោយមក ក៏ឃើញស្ត្រីរូបនេះដើរចេញមកក្រៅវិញយ៉ាងប្រញាប់ប្រញាល់ដូចពេលដើរចូលទៅក្នុងបន្ទប់ទឹកផងដែរ។
ពលរដ្ឋក្បែរកន្លែងកើតហេតុបន្តថា ប៉ុន្តែពេលនោះ មិនបានចាប់អារម្មណ៍ថា តើផ្ទៃពោះនាងនៅប៉ោង (មានកូន) ដដែល ឬយ៉ាងណានោះទេ? គ្រាន់តែដឹងថា នាងដើរសំដៅចេញទៅក្រៅយ៉ាងប្រញាប់ប៉ុណ្ណោះ ។ ក្រោយមកក៏មានក្មេងប្រុសម្នាក់ដើរចូលទៅក្នុងបន្ទប់ទឹកដើម្បីបត់ជើងតូច ក៏ប្រទះឃើញទារិកាម្នាក់នៅក្នុងនោះ ហើយរូបគេក៏រត់មកប្រាប់ម្តាយថា មានឃើញកូនក្មេងនៅក្នុងបន្ទប់ទឹក ។
ប្រភពដដែលបន្តថា ពេលនោះ ស្ត្រីជាម្តាយដែលជាពលរដ្ឋរស់នៅក្បែរនោះ ក៏ដើរទៅមើល រួចប្រទះឃើញទារិកាម្នាក់ដេកដាច់ខ្យល់នៅលើកន្លែងលាងដៃក្នុងបន្ទប់ទឹក ទើបស្រែកហៅគេឯងនៅក្បែរនោះឱ្យមកជួយមើល បង្កឱ្យមានការភ្ញាក់ផ្អើលតែម្តងទៅ ។
បន្ទាប់ពីប្រទះឃើញដូចនោះ ក្រុមពលរដ្ឋបានរាយការណ៍ជូនកម្លាំងនគរបាលមូលដ្ឋានឱ្យចុះអន្តរាគមន៍ពិនិត្យ ។ ក្រោយការធ្វើកោសល្យវិច្ច័យពិនិត្យរួចមក នគរបាលជំនាញ បញ្ជាក់ថា សពទារិកាខាងលើ ត្រូវបានបាត់បង់ជីវិតដោយសារតែអត់អាហារ ព្រោះពេលកើតមកភ្លាម ក៏ត្រូវម្តាយទុករូបគេចោល ដោយពុំមានទឹកដោះគោ ឬអ្វីបន្តិចឱ្យគ្នាហូបនោះឡើយ ទើបទារិកាអភ័ព្វឃ្លានរហូតដាច់ខ្យល់តែម្តង ។
ក្រោយពេលពិនិត្យរួច សពទារិកាខាងលើ ត្រូវបានសមត្ថកិច្ចដឹកយកទៅតម្កល់នៅវត្តឬស្សីសាញ់ ក្នុងខណ្ឌដង្កោ ដើម្បីបូជាតាមប្រពៃណីនៅទីនោះតែម្តង ៕ (កែសម្រួលដោយ ៖ បុប្ផា)
ចែករំលែកព័តមាននេះ