ប្រទេសប្រេស៊ីល ៖ ក្លិបបាល់ទាត់ Flamengo បានប្រកាសថា ក្លិបបានរកឃើញអ្នកឆ្លងវីរុសកូវីដ-១៩សរុបចំនួន៣៨នាក់ក្នុងនោះរួមមានកីឡាករក្នុងក្រុមឈុតធំចំនួន៣នាក់ផងដែរ ។
មនុស្សសរុបចំនួន២៩៣នាក់ក្នុងក្លិបដែលឈ្នះពានរង្វាន់ Copa Libertadores 2019 មួយនេះត្រូវបានទទួលការធ្វើតេស្តរកវីរុសកូវីដ-១៩ទាំងអស់ តាមគោលការណ៍របស់រដ្ឋាភិបាល និងក្រសួងសុខាភិបាលរបស់ប្រទេសនេះ ។
សេចក្តីថ្លែងការណ៍មួយពីក្លិប Flamengo បានឲ្យដឹងថា កីឡាករដែលមានសមាជិកគ្រួសារ ឬបុគ្គលិកដែលមានតេស្តវិជ្ជមានកូវីដ-១៩ នឹងត្រូវដាក់ឲ្យនៅដាច់ដោយឡែកពីគេ ដោយមានការត្រួតពិនិត្យ និងសំណួរប្រចាំថ្ងៃអំពីសញ្ញានៃវីរុសនិងការធ្វើតេស្តថ្មីៗ ។
ហើយក្នុងករណីការធ្វើតេស្តអវិជ្ជមាន ពួកគេនឹងអាចត្រឡប់ទៅធ្វើការងាររបស់ពួកគេវិញ ក្រោមការអនុវត្តវិធានការសុវត្ថិភាពដ៏តឹងរឹង ។ ដោយឡែកក្នុងករណីការធ្វើតេស្តវិជ្ជមាន ពួកគេនឹងត្រូវអនុវត្តតាមវិធានការស្តង់ដារ ដែលបានអនុវត្តរួចលើអ្នកដែលបានធ្វើតេស្តវិជ្ជមានកន្លងមក ។
ក្លិបក៏បានបញ្ជាក់ជាថ្មីថា ខ្លួនកំពុងធ្វើការប្រកបដោយជំនាញពេញលេញជាមួយអាជ្ញាធររដ្ឋាភិបាល ដើម្បីទទួលខុសត្រូវលើសុវត្ថិភាពបុគ្គលិកទាំងអស់ ដើម្បីឆ្ពោះទៅរកការវិលត្រឡប់ទៅរកសកម្មភាពបាល់ទាត់វិញ ក្នុងរយៈពេលដ៏ខ្លីខាងមុខ ៕ (ដកស្រង់ចេញពី Goal.com)
ចែករំលែកព័តមាននេះ