លោកអាវីន ឡាល (Arvind Lal) ដែលជានាយកម្នាក់នៅក្រុមហ៊ុន Dr Lal PathLabs បានមើលឃើញទ្រព្យសម្បត្តិកើនហួស១ប៊ីលានដុល្លារកាលពីថ្ងៃពុធកន្លងមកនេះព្រោះតែតម្លៃភាគហ៊ុនរបស់ក្រុមហ៊ុនកើនឡើងយ៉ាងខ្លាំង។
Dr Lal PathLabs មានផ្គត់ផ្គង់តេស្តសម្រាប់កូវីដ ១០ តាំងពីពួកគេទទួលបានការអនុញ្ញាតជាផ្លូវការមកនៅសប្តាហ៍ចុងក្រោយនាខែមិនា ឬពេលដែលឥណ្ឌាបិទដំណើរការប្រទេសទាំងមូល។ មុនពេលនោះ ការធ្វើតេស្តសម្រាប់កូវីដ ១៩ ត្រូវបានធ្វើឡើងដោយកន្លែងពិសោធន៍រដ្ឋាភិបាល មន្ទីរពេទ្យរដ្ឋ និងបន្ទប់ពិសោធន៍ឯកជនមួយចំនួន។
ក្រុមហ៊ុនខាងលើរកចំណូលបានប្រមាណ១៧៤លានដុល្លារនៅឆ្នាំ ២០១៩ និងមានបណ្តាញពិនិត្យជម្ងឺធំជាងគេក្នុងប្រទេសឥណ្ឌា។ ពួកគេមានបន្ទប់ពិសោធន៍ចំនួន ២០០ កន្លែង និង មជ្ឈមណ្ឌលព្យាបាលចំនួន ២,៥០០កន្លែងផងដែរ។
បច្ចុប្បន្ននេះ ពួកគេមានសមត្ថភាពក្នុងការធ្វើតេស្តមនុស្សបានច្រើនជាង ៤,៥០០នាក់ក្នុងមួយថ្ងៃទៅទៀតសម្រាប់កូវីដ ១៩ ក្នុងប្រទេសឥណ្ឌា។ ក្រុមហ៊ុននេះថែមទាំងមានកន្លែងធ្វើតេស្តចល័តដែលមនុស្សអាចទៅធ្វើតេស្តបានតាមរថយន្តរបស់ក្រុមហ៊ុន។
មហាសេដ្ឋីដែលមានអាយុ ៧០ឆ្នាំខាងលើគ្រប់គ្រង ៥៧%នៃភាគហ៊ុនទាំងអស់របស់ក្រុមហ៊ុន ប៉ុន្តែលោកមិនបានចូលក្នុងបញ្ជីមហាសេដ្ឋីដែលមានទ្រព្យសម្បត្តិលើស១ប៊ីលានដុល្លារទេកាលពីខែមិនា។
តេស្តសម្រាប់កូវីដ ១៩គ្រាន់តែជួយក្រុមហ៊ុនបានបន្តិចបន្តួចប៉ុណ្ណោះក្នុងពេលដែលក្រុមហ៊ុនជួបប្រទះនឹងការខាតបង់ពីការបិទប្រទេស។ លើសពីនេះទៅទៀត រដ្ឋាភិបាលឥណ្ឌាបានកំណត់តម្លៃតេស្តទំឫងនេះត្រឹម ៦០ដុល្លារប៉ុណ្ណោះដែលមិនអនុញ្ញាតឲ្យក្រុមហ៊ុនចំណេញច្រើនទេ។
ប៉ុន្តែអ្នកជំនាញបានកត់សម្គាល់ថា ការប៉ះពាល់ដល់ចំណូលក្រុមហ៊ុនគឺមិនបន្តយូរទេ ហើយក្រុមហ៊ុនប្រភេទនេះអាចក្រោកឈរបានើឿនណាស់ពេលដែលអ្វីៗត្រលប់មកសភាពដូចដើមវិញ។ ក្នុងកំឡុងពេលប៉ុន្មានថ្ងៃកន្លងនេះ ប្រទេសឥណ្ឌាក៏បានចាប់ផ្តើមបន្ធូរវិធានការបិទដំណើរការប្រទេសដែរ ៕
ចែករំលែកព័តមាននេះ