រាជធានីភ្នំពេញ ៖ ក្រសួងសុខាភិបាលបានសម្រេចបញ្ជូនអ្នកឆ្លងជំងឺកូវីដ១៩ ដែលមិនទាន់ជាសះស្បើយមកកាន់មន្ទីរពេទ្យមិត្តភាព ខ្មែរសូវៀត ដើម្បីព្យាបាលឲ្យជាសះស្បើយ ។ នេះបើតាមអ្នកនាំពាក្យក្រសួងសុខាភិបាល ។
លោកស្រីវេជ្ជបណ្ឌិតឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាលបានឲ្យដឹងនៅថ្ងៃទី៨ ខែឧសភា ឆ្នាំ២០២០ បន្ទាប់ពីអ្នកសារព័ត៌មានសួរតាមប្រព័ន្ធតេឡេក្រាមយ៉ាងដូច្នេះ ៖«មិនធ្ងន់ទេ តាមសភាពទូទៅរបស់អ្នកជំងឺ តែវីរុសនៅមានក្នុងខ្លួនគាត់នៅឡើយ ។ ថ្ងៃនេះក្រសួងបានសម្រេចឲ្យបញ្ជូនមកបន្តការព្យាបាលនៅមន្ទីរពេទ្យមិត្តភាពខ្មែរ-សូវៀតទាំងពីរនាក់ហើយ» ។
លោកស្រីបន្តថា ៖ វីរុសនេះ យើងពិបាកនឹងដឹងណាស់ ដោយសារអ្នកទាំងពីរ ម្នាក់ជាបុរសវ័យ៧៥ឆ្នាំ មានបញ្ហាសុខភាពប្រចាំកាយ និងម្នាក់ទៀតជាស្ត្រីវ័យ៣៦ឆ្នាំ មានបញ្ហាប៉ះពាល់ផ្លូវចិត្ត តម្រូវឲ្យមានការពិនិត្យព្យាបាលនៅមន្ទីរពេទ្យថ្នាក់ជាតិបន្តទៀត ។
ជាមួយគ្នានោះដែរ អ្នកនាំពាក្យក៏បានជូនពរពួកគាត់ឲ្យបានឆាប់ជាសះស្បើយ ពេលមកដល់មន្ទីរពេទ្យមិត្តភាពខ្មែរ-សូវៀត ។ ដូច្នេះហើយ សូមបងប្អូនប្រជាពលរដ្ឋបន្តការប្រុងប្រយ័ត្នការពារការចម្លង រលកទីពីរនៃវីរុសកូវីដ-១៩ នេះជាចាំបាច់ត្រូវចងចាំថា៖«យើងអាចភ្លេចវីរុសកូវីដ-១៩ តែវីរុសកូវីដ-១៩ មិនដែលភ្លេចយើងនោះទេ» ។
គិតមកដល់ព្រឹកថ្ងៃទី៨ ខែឧសភា ឆ្នាំ២០២០ នេះ នៅសល់អ្នកជំងឺកូវីដ១៩ ចំនួន ២នាក់ទៀត មិនទាន់ជាសះស្បើយ ។ អ្នកជំងឺទាំងពីរនោះ ជាជនជាតិខ្មែរ នៅខេត្តកំពង់ឆ្នាំង និងនៅខេត្ត បន្ទាយមានជ័យ ត្រូវបានក្រសួងសុខាភិបាល សម្រេចបញ្ជូនអ្នកជំងឺទាំងពីរ មកសម្រាកព្យាបាលនៅមន្ទីរពេទ្យ មិត្តភាពខ្មែរ-សូវៀត ក្នុងរាជធានីភ្នំពេញ ។
សូមជម្រាបថា នៅក្នុងសន្នីសីទសារព័ត៌មានកាលពេលកន្លងមកនេះ លោកម៉ម ប៊ុនហេង រដ្ឋមន្ត្រីក្រសួងសុខាភិបាលបានឲ្យដឹងថា ក្នុងករណីដែលបញ្ជូនអ្នកជំងឺកូវីដ១៩ទាំង២នាក់នេះមកមន្ទីរពេទ្យរាជធានីភ្នំពេញដោយសារនៅរាជធានីភ្នំពេញមានគ្រូពេទ្យជំនាញច្រើន ហើយមានឧបករណ៍បច្ចេកទេសទំនើបផងដែរ ៕
ចែករំលែកព័តមាននេះ