សហព័ន្ធបាល់ទាត់តួកគីប្រកាសកាលបរិច្ឆេទចាប់ផ្តើមលីគឡើងវិញ
ប្រទេសតួកគី ៖ ប្រធានសហព័ន្ធកីឡាបាល់ទាត់តួកគី (TFF) លោក Nihat Ozdemir បានប្រកាសថា ការប្រកួតក្របខ័ណ្ឌ Turkish…
ប្រទេសតួកគី ៖ ប្រធានសហព័ន្ធកីឡាបាល់ទាត់តួកគី (TFF) លោក Nihat Ozdemir បានប្រកាសថា ការប្រកួតក្របខ័ណ្ឌ Turkish Super Lig នឹងចាប់ផ្តើម ប្រកួតឡើងវិញនៅថ្ងៃទី ១២ ខែ មិថុនាខាងមុខនេះ រួមជាមួយនឹងសកម្មភាពបាល់ទាត់ទាំងអស់នៅក្នុងប្រទេស ដែលត្រូវបានផ្អាកកាលពីថ្ងៃទី ១៨ ខែមីនា ដោយសារការរាតត្បាតពីវីរុសកូវីដ-១៩ ។
តួកគី គឺជាប្រទេសមួយក្នុងចំណោមបណ្តាប្រទេសនៅអឺរ៉ុបចុងក្រោយ ដែលបានផ្អាកសកម្មភាពកីឡា ដោយអង្គភាពគ្រប់គ្រងភាគច្រើនបានបញ្ឈប់ការប្រកួតរបស់ពួកគេរៀងៗខ្លួន ក្នុងគោលបំណងដើម្បីទប់ស្កាត់ការរីករាលដាលនៃវីរុសកូវីដ-១៩ ។
TFF ចង់បញ្ចប់រដូវកាលនេះនៅថ្ងៃទី ២៦ ខែ កក្កដា ដើម្បីត្រៀមខ្លួនទទួលធ្វើជាម្ចាស់ផ្ទះសម្រាប់ការប្រកួតវគ្គផ្តាច់ព្រ័ត្រពានរង្វាន់ Champions League ដែលគ្រោងនឹងធ្វើឡើងនៅកីឡដ្ឋាន Atatürk Olympic ក្នុងទីក្រុង Istanbul នៅក្នុងខែសីហាខាងមុខ ។
លោក Ozdemir បានមានប្រសាសន៍ថា ក្រសួងសុខាភិបាល និងក្រុមប្រឹក្សាវិទ្យាសាស្ត្រ នឹងទទួលបន្ទុកក្នុងការកំណត់លក្ខខណ្ឌ និងគោលការណ៍ណែនាំផ្សេងៗសម្រាប់ការប្រកួត ដែលប្រព្រឹត្តិទៅដោយគ្មានវត្តមានអ្នកគាំទ្រក្នុងកីឡដ្ឋាន ។
ក្រឡេកមកមើលតារាងពិន្ទុនៃក្របខ័ណ្ឌ Turkish Super Lig ក្រុម Trabzonspor កំពុងឈរនៅកំពូលតារាងដោយគ្រាប់ស៊ុតបញ្ចូលទីច្រើនជាង ក្រោយមាន ៥៣ពិន្ទុស្មើគ្នាជាមួយក្រុមលេខ២ İstanbul Başakşehir ៕ (ដកស្រង់ចេញពី cbssports)
ចែករំលែកព័តមាននេះ