ខេត្តកំពង់ឆ្នាំង ៖ នេះជាលើកទី១ហើយ សម្រាប់ខេត្តកំពង់ឆ្នាំង ដែលសមាជិកសហគមន៍នេសាទជាអ្នកការពារធនធានជលផល បែរជាមានទោសទណ្ឌដោយសារបានប្រព្រឹត្តបទល្មើសព្រហ្មទណ្ឌទៅវិញ ។ ជាក់ស្តែង អនុប្រធានសហគមន៍ម្នាក់និងសមាជិកសហគមន៍នេសាទឃុំកំពង់ព្រះគគីរ ម្នាក់…
ខេត្តកំពង់ឆ្នាំង ៖ នេះជាលើកទី១ហើយ សម្រាប់ខេត្តកំពង់ឆ្នាំង ដែលសមាជិកសហគមន៍នេសាទជាអ្នកការពារធនធានជលផល បែរជាមានទោសទណ្ឌដោយសារបានប្រព្រឹត្តបទល្មើសព្រហ្មទណ្ឌទៅវិញ ។
ជាក់ស្តែង អនុប្រធានសហគមន៍ម្នាក់និងសមាជិកសហគមន៍នេសាទឃុំកំពង់ព្រះគគីរ ម្នាក់ បានត្រូវសាលាដំបូងខេត្តសម្រេចឃុំខ្លួនដាក់ពន្ធនាគារ កាលពីរសៀលថ្ងៃទី៥ ខែឧសភា ឆ្នាំ២០២០ ដោយចោទប្រកាន់ពីបទ«ចាប់ឃុំឃាំង និងបង្ខាំងមនុស្សដោយខុសច្បាប់និងកំហែងយក» ប្រព្រឹត្តនៅក្នុងភូមិសាស្ត្រឃុំកំពង់ព្រះគគីរ ស្រុកបរិបូណ៌ កាលពីអំឡុងដើមឆ្នាំ២០២០កន្លងទៅ។
បើតាមនគរបាលការិយាល័យព្រហ្មទណ្ឌកម្រិតធ្ងន់ខេត្ត ឲ្យដឹងថា អនុប្រធាននិងសមាជិកសហគមន៍នេសាទឃុំកំពង់ព្រះគគីរ ដែលត្រូវបានចាប់ខ្លួននេះ ម្នាក់ឈ្មោះ ឈួន រ៉ា អនុប្រធានសហគមន៍ និងម្នាក់ទៀតឈ្មោះ ឆាយ ធាង សមាជិកសហគមន៍ ។ ក្រោយពីចាប់ឃាត់ខ្លួន និងសាកសួរអស់រយៈពេល២ថ្ងៃ ទើបលោក អ៊ិតសុធា ព្រះរាជអាជ្ញា និងលោក សុខ ឧត្តម ចៅ
ក្រមសាលាដំបូងខេត្ត សម្រេចឃុំខ្លួនជនទាំង២នាក់ដាក់ពន្ធនាគារនារសៀលថ្ងៃទី៥ ខែឧសភា។
សូមរំឭកថា ក្រោយពីមានអំពើចាប់បង្ខាំងមនុស្សកំហែងយកប្រាក់នេះ ជនរងគ្រោះ២នាក់ដែលជាឪពុកមានិងក្មួយ បានប្តឹងទៅនគរបាលប៉ុស្តិ៍និងនគរបាលស្រុកបរិបូណ៌ ។ បន្ទាប់មក ពួកគេទាំង២នាក់បានផ្តល់សម្ភាសន៍ដល់ក្រុមអ្នកសារព័ត៌មានថា កាលពីអំឡុងដើមឆ្នាំ២០២០នេះ នាយប់មួយពួកគេទាំង២នាក់ ម្នាក់ឈ្មោះ ឈុន សុវណ្ណ អាយុ៣០ឆ្នាំ ជាឪពុកមាន និងម្នាក់ទៀតឈ្មោះ ឆូត ឆេន អាយុ១៤ឆ្នាំ ជាក្មួយ រស់នៅភូមិប្រឡាយមាស បានទៅចងសន្ទូចនៅទន្លេក្នុងភូមិសាស្ត្រឃុំកំពង់ព្រះគគីរ ។
នាយប់នោះ បន្ទាប់ពីចងសន្ទូចហើយ ពួកគេទាំង២នាក់បានបើកកាណូតទៅផឹកសុីនៅតូបមួយ ។ ពេលកំពុងអង្គុយផឹកនោះ ស្រាប់តែឮសន្ធឹកកាណូតបើកដេញគ្នា បន្តិចក្រោយមក ស្រាប់តែមានកាណូតមួយគ្រឿងមានគ្នាច្រើននាក់បានមកដល់កន្លែងដែលខ្លួនកំពុងអង្គុយផឹក ហើយចុះឆែកឆេររុករករបស់របរអ្វីមិនដឹង ។
លុះក្រោយពេលរកមិនឃើញ ពួកគេក៏ស្រែកថា ៖ «សំណាងហើយអ្ហែង អញរកមិនឃើញ» ហើយកាណូតនោះរៀបនឹងចេញទៅវិញហើយស្រាប់តែមានកាណូត១គ្រឿងទៀតមកដល់
ហើយស្រែកប្រាប់ថា«ឆែករកម្តងទៀត» ។បន្ទាប់មក ពួកគេបានយកអាំងវែរទ័រក្បែរកាណូតរបស់ខ្លួន ហើយពួកគេប្រកែកថា មិនមែនរបស់ខ្លួនទេ តែក៏ត្រូវពួកគេចាប់វាយនិងចងដៃក្រពាត់ទៅក្រោយ ដោយចោទថាខ្លួនជាអ្នកប្រព្រឹត្តបទល្មើសឆក់ត្រី ហើយប្រាប់ថា ឥឡូវពួក
គេមិនរាយការណ៍ទៅមេទេ តែត្រូវបង់ប្រាក់១ក្បាលទូក១ពាន់ដុល្លារ ។
ក្រោយពីមានការអង្វរករ ពួកគេក៏ព្រមយកមួយក្បាលទូក១លានរៀល គឺទូក២គ្រឿងពួកគេយកអស់២លានរៀល ហើយហាមប្រាប់នរណា ទាំងអស់ ។ ក្នុងចំណោមមនុស្សទាំងនោះ គេស្គាល់មនុស្ស៣នាក់គឺ ១-ឈ្មោះ ឈួន រ៉ា ២-ឈ្មោះ ឆាយ ធាង និង៣-ឈ្មោះ លែន ម៉ៅ។
ទាំងនេះជាការរៀបរាប់របស់ជនរងគ្រោះ នៅថ្ងៃកើតហេតុ ។ ចំណែកជនជាប់ចោទទាំង២នាក់ គឺឈ្មោះ ឈួន រ៉ា និង ឈ្មោះ ឆាយ ធាង ភ្នាក់ងារយើងមិនអាចសុំការបំភ្លឺបានទេ តែកន្លងទៅពួកគេធ្លាប់ឆ្លើយចំពោះមុខសមត្ថកិច្ចនគរបាលថា ពួកគេមិនបានប្រព្រឹត្តបែបនេះទេ ។
ទោះជាយ៉ាងនេះក្តី ទាំងព្រះរាជអាជ្ញានិងចៅក្រម ក្រោយការសាកសួររកឃើញមានពិរុទ្ធភាពគ្រប់គ្រាន់ ទើបសម្រេចចោទប្រកាន់និងដាក់ពន្ធនាគារជាបណ្តោះអាសន្ន ៕ (កែសម្រួលដោយ ៖ បុប្ផា)
ចែករំលែកព័តមាននេះ