រាជធានីភ្នំពេញ ៖ ស្នាមញញឹម ដែលអ្នកនាងគង់ សុជាតិ បង្ហាញនៅតាមឆាកតន្ត្រី និងនៅតាមបណ្តាញសង្គមផ្ទាល់ខ្លួន សុទ្ធតែធ្វើឱ្យហ្វេនៗគិតថា អ្នកនាងពិតជាមានក្តីសុខបំផុត ដែលជោគជ័យទាំងជីវិតគ្រួសារ និងការងារ។ ទោះបីជាបែបណាក្តី អ្នកនាង គង់ សុជាតិ នៅតែបង្ហាញនូវភាពស្មុគស្មាញ បើទោះជាគេមើលថា អ្នកនាងជួបតែជីវិតសុភមង្គលមែនប៉ុន្តែរឿងខ្លះធ្វើឱ្យអ្នកនាងផ្ទាល់ចងចាំពេលនឹកឃើញម្តងៗ។
រហូតមកទល់ពេលនេះ ពិធីការិនី គង់ សុជាតិ នៅតែមានឈ្មោះក្តោបក្តាប់ទីផ្សារការងារណែនដៃ មិនចាញ់ប្អូនៗជំនាន់ក្រោយឡើយ។ អ្នកនាង ត្រូវគេឱ្យងារថា «ផ្ការីកគ្រប់រដូវ»។ ក្រោយវិលចូលស្ថានីយទូរទស្សន៍ធំជាមួយស្វាមីមក សន្ទុះការងាររបស់អ្នកនាង និងស្វាមី ជា វិបុល ក៏កាន់តែហក់ឡើង។ ម្ល៉ោះហើយ១សប្តាហ៍ៗស្ទើរតែរកពេលសម្រាកសម្រាប់ជីវិតឯកជនគ្មាន។ រីឯចំណងស្នេហាជាង៧ឆ្នាំនេះ សុជាតិ ទទួលបានចំណងដៃកូនស្រីម្នាក់យ៉ាងស្រស់ស្អាត ឈ្មោះជា សុជាតិនារី ហៅដូរី អាយុជាង៣ឆ្នាំផងដែរ។
អ្នកនាង គង់ សុជាតិ ដែលមានវិធីចេះរក្សាសម្រស់ឱ្យនៅតែក្មេងបានយូរលើកឡើងថា សម្រាប់ជីវិតគ្រួសារ និងការងាររបស់អ្នកនាង គឺទទួលបាននូវភាពល្អប្រសើរ ដូចដែលបានឃើញជាក់ស្តែង។ បើនិយាយដល់ជីវិតប្តីប្រពន្ធមិនមែនចេះតែល្អូកល្អិន អូនបងស្វីតៗរាល់ម៉ោង រាល់ពេលនោះទេ គឺដូចតែប្តីប្រពន្ធទូទៅអ៊ីចឹង ។
ជឿទៅចានក្នុងរាវគង់រណ្តំ ចង្កៀងផ្ទះអ្នកណាភ្លឺផ្ទះអ្នកនោះ។ សំខាន់យើង អន់ចិត្តគ្នា ឬអារម្មណ៍ មិនល្អគួរតែយកភាពត្រជាក់ដាក់ខ្លួន ថយមួយជំហ៊ាន ហើយនិយាយគ្នាតាមសម្រួល រកវិធីដោះស្រាយនោះ ស្ថានការក៏ស្ងប់រលត់ទៅវិញ។
អ្នកនាងបន្តថា ការប្រឡូកក្នុងសិល្បៈប្រមាណ២០ឆ្នាំនេះ ពោរពេញដោយភាពតស៊ូ ជួបប្រទះរឿងរ៉ាវជាច្រើនដែលប៉ះពាល់ដល់អារម្មណ៍យើង។ មានពេលមួយមកពីបំពេញការងារ ដើម្បីឱ្យ គ្រួសារលូតលាស់ ឈឺផងជាផងចេះតែខំ។
លុះមកដល់ផ្ទះ កូនស្រីគ្នានៅតូច មិនសូវមានយើងនៅក្បែរ ក៏ចេះតែគិតថា យើងមិនស្រឡាញ់ ទៅបាត់ៗ រហូតពោលពាក្យថា «ម៉ាក់អត់ស្រឡាញ់កូនទុកកូនចោល» ពេលឮដូចនេះនាងអួលដើម.កតែម្តង ហើយប្រាប់ទៅកូនវិញថា កុំនិយាយចឹងម្តាយស្រឡាញ់កូន ម៉ាក់ខំម៉ាក់ប្រឹង ដើម្បីឱ្យកូនបានរៀន មានលុយបង់សាលាកូន កុំនិយាយចឹង ម៉ាក់មិនសប្បាយចិត្តទេ។
អ្នកនាងបន្តទៀតថា លុះកូនៗទាំង៣ធំឡើង គាត់យល់ច្រើន ហើយអាណិតយើងខំ មិនហ៊ានគិតខឹងម្តាយដូចពីមុនទ។ ពេលខ្លះចង់សម្រាកពីសិល្បៈ តែមកពីមានបងប្អូនត្រូវការ ក៏ចេះតែខំ ព្រោះពេលវេលាទៅមុខ ឱកាសល្អមានតែម្តងកុំឱ្យរបូត ចាប់ឱ្យជាប់។
ម្ល៉ោះហើយការងារលុយតិច ឬច្រើន ត្រូវតែទៅទទួលខុសត្រូវ ។ ទោះពេលខ្លះជិះម៉ូតូ ឌុប បំពេញការងារក៏ទៅ ព្រោះម្ចាស់កម្មវិធីឱ្យតម្លៃយើងៗត្រូវគោរពគាត់។ (កែសម្រួលដោយ ៖ បុប្ផា)
ចែករំលែកព័តមាននេះ