ប្រទេសបែលហ្ស៊ីក ៖ សន្និសីទតាមបែបតេឡេខេនហ្វេរេនមួយរបស់ពិភពលោក ត្រូវបានរៀបចំធ្វើកាលពីថ្ងៃទី៤ ឧសភា នៅក្រុងព្រុចសែលបែលហ្ស៊ីក ពីសំណាក់សហភាពអឺរ៉ុប ដោយមាន
ការចូលរួមរហូតដល់ស្ត្រីតារាចម្រៀងម៉ាដូណា លោកប៊ីល ហ្គេត និងភរិយា លោកស្រីមីលីនដា
បណ្ដាព្រះអង្គម្ចាស់ ព្រះមហាក្សត្រ១អង្គ បណ្ដាប្រធានាធិបតីនិងប្រមុខរដ្ឋព្រមទាំងតំណាងប្រទេសនានា ។
សន្និសីទនេះក្នុងគោលបំណងកៀងគរប្រមូលប្រាក់សម្រាប់ផ្កត់ផ្គង់ដល់ការស្រាវជ្រាវនិងការផលិតវ៉ាក់សាំងមួយប្រឆាំងវីរុសCOVID-19 ដោយពេលនេះអាចប្រមូលប្រាក់បានដល់ទៅ៧,៤ពាន់លានអឺរ៉ូហើយ ។
សហរដ្ឋអាមេរិកក៏ដូចជារុស្ស៊ី និងឥណ្ឌាមិនបានចូលរួម ក្នុងសន្និសីទបែបអនឡាញរយៈពេល
៣ម៉ោងនោះឡើយ ។ ប្រធានគណៈកម្មាធិការអឺរ៉ុប លោកស្រី URSULA VON DER LEYEN
ថ្លែងទាំងញញឹមថា យើងបានទទួលប្រាក់រហូតដល់៧,៤ពាក់លានអឺរ៉ូ ។ តារាចម្រៀងម៉ាដូណាជាអ្នកធ្វើអំណោយចុងក្រោយគេជាមួយទឹកប្រាក់១លានដុល្លារ ។ ទិសដៅគឹចង់ប្រមូលប្រាក់ឲ្យបាន៧,៥ពាន់លានអឹរ៉ូ ដែលត្រូវជា៨ពាន់លានដុល្លារ ។
ចំនួននោះនឹងអាចសម្រេចបានតែក្នុងប៉ុន្មានថ្ងៃខាងមុខទៀត ព្រោះតួកគី ម៉ូណាកូ និងធនាគារវិនិ
យោគអឺរ៉ុបនៅពុំទាន់បញ្ជាក់ពីចំនួនទឹកប្រាក់នៃការរួមចំណែករបស់ពួកគេនៅឡើយ ។
ប្រទេសចិនជាកន្លែងលេចចេញវីរុសនោះមុនគេ បានសន្យាផ្ដល់ប្រាក់៤៥,៦លានអឹរ៉ូ ។ អាហ្វ្រិក
ខាងត្បូងជាតំណាងទ្វីបអាហ្វ្រិក សន្យាផ្ដល់ប្រាក់១,១ពាន់លានអឺរ៉ូ ហើយតំបន់អាមេរិកឡាទីនសន្យាផ្ដល់ប្រាក់តែពុំទាន់បញ្ជាក់ពីតួលេខនៅឡើយ តាមរយៈតំណាងរបស់ប្រទេសម៉ិកស៊ិក ។ គណៈកម្មាធិការអឺរ៉ុបបានធ្វើការកៀងគរប្រមូលមូលនិធិនោះ ដោយសន្យាផ្ដល់ប្រាក់១ពាន់លានអឺរ៉ូ បន្ទាប់មកបារាំងសន្យាផ្ដល់៥០០លានអឺរ៉ូ អាល្លឺម៉ង់៥២៥លានអឺរ៉ូ នាំឲ្យក្នុងផៃ្ទសហភាពអឺរ៉ុប ទឹកប្រាក់ដែលសន្យាផ្ដល់ឲ្យមានលើសពី២ពាន់លានអឺរ៉ូ ។
លោកស្រី URSULA VON DER LEYEN អះអាងថា វ៉ាក់សាំងមួយគឹជាភ័ព្វវាសនាល្អរួមរបស់យើង ដែលអាចយកឈ្នះវីរុសនេះបាន ។ យើងត្រូវផលិតវ៉ាក់សាំងមួយ ហើយចែកចាយវាគ្រប់ទីកន្លែងលើពិភពលោក ហើយយើងត្រូវធ្វើឲ្យតម្លៃរបស់វាពុំមានខ្ពស់កប់ពពក ។
ការផ្ដួចផ្ដើមគំនិតនោះសហរដ្ឋអាមេរិកមិនគាំទ្រ ដោយប្រធានាធិបតីលោកដូណាល់ ត្រាំ ដែលមានជម្លោះជាមួយអង្គការសុខភាពពិភពលោកនោះបានលើកពីឆន្ទៈរបស់លោកចង់ឲ្យអាមេរិកមានវ៉ាក់សាំងដោយខ្លួនឯងមួយនាចុងឆ្នាំនេះ ៕ ដកស្រង់ចេញពីវេបសាយ ៖ yahoo (កែសម្រួលដោយ ៖ បុប្ផា)
ចែករំលែកព័តមាននេះ