បរិស័ទក្នុងប្រទេសទាំងឡាយអ្នកគោរពព្រះពុទ្ធសាសនាបាននាំគ្នាធ្វើវិសាខបូជានៅថ្ងៃពេញបូណ៌មីខែពិសាខតាំងពីបុរាណកាលតរៀងមក ដើម្បីរំលឹកដល់គុណដ៏បរិសុទ្ធរបស់ព្រះពុទ្ធបរមគ្រូនៃយើង ។
វិសាខបូជាគឺជាបុណ្យដ៏ធំមួយក្នុងព្រះពុទ្ធសាសនាដែលប្រទេសកម្ពុជាបានចាត់ទុកថាជាបុណ្យជាតិ ។ មិនតែប៉ុណ្ណោះប្រទេសជាច្រើនដែលជាសមាជិកនៃអង្គការសហប្រជាជាតិបានអនុម័តនិងទទួលស្គាល់វិសាខបូជាថាជាបុណ្យអន្តរជាតិទៀតផង ។
បុណ្យវិសាខបូជាត្រូវបានប្រារព្ធឡើងដើម្បីរម្លឹកដល់ព្រឹត្តិការណ៍ពិសេសចំនួន៣ ដែលទាក់ទងនឹងដំណើរជីវិតរបស់ព្រះបរមសាស្តាគឺ ១-ព្រះអង្គប្រសូត ២-ត្រាស់ដឹង ៣- ទ្រង់ចូលព្រះនិព្វាន ។
ព្រះអង្គប្រសូតនៅថ្ងៃសុក្រ ពេញបូណ៌មី ខែវិសាខ ឆ្នាំច មុនគ្រិស្តសករាជ ៦២៣ឆ្នាំ។ នៅពេលមានព្រះជន្ម២៩ឆ្នាំក៏បានយាងទៅសាងផ្នួស ។
ក្រោយក្លាយខ្លួនជាអ្នកបួសអស់រយៈពេល ៦ឆ្នាំ ព្រះអង្គក៏បានត្រាស់ដឹងធម៌ក្នុងលោក កា្លយជាព្រះពុទ្ធ នៅថ្ងៃពុធ ពេញបូណ៌មី ខែវិសាខ ឆ្នាំរកា នាវេលាទៀបភ្លឺ ។
ទ្រង់ចូលបរិនិព្វាន នៅថ្ងៃអង្គារ ពេញបូណ៌មី ខែវិសាខ ឆ្នាំម្សាញ់ នៅពេលព្រះអង្គមានព្រះជន្ម៨០ឆ្នាំ ។
បើតាមការពិនិត្យសេចក្តីនេះយើងឃើញថា ព្រះបរមគ្រូទ្រង់ប្រសូត ត្រាស់ដឹង និងបរិនិព្វាន ក្នុងថ្ងៃ១៥កើត ពេញបូណ៌មី ខែវិសាខដូចគ្នា គឺខុសតែឆ្នាំប៉ុណ្ណោះ ។
អាស្រ័យដោយលក្ខណៈដ៏ពិសេសនៃបុណ្យវិសាខបូជាដូចពោលមកនេះ លោកអ្នកប្រាជ្ញខាងព្រះពុទ្ធសាសនាបានកំណត់ទុកក្នុងគម្ពីរសាសនាថាជាមហាមង្គលអភិលក្ខិតកាល គឺជាថ្ងៃមហាមង្គលដ៏អស្ចារ្យ ។ សាន សារិន
ចែករំលែកព័តមាននេះ