ខេត្តប៉ៃលិន ៖ បើតាមសេចក្តីរាយការណ៍បានឱ្យដឹងថា រហូតមកដល់ថ្ងៃទី០៥ ខែឧសភា ឆ្នាំ២០២០នេះ ក្រោយពីប្រទេសថៃ បានបិទច្រកទ្វារអន្តរជាតិព្រំ ក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ មិនឱ្យម៉ូតូ ឬរថយន្តចេញចូលទៅមក ដើម្បីការពារទប់ស្កាត់ការឆ្លងរាលដាលជំងឺកូវីដ១៩ ធ្វើឱ្យប្រជាពលរដ្ឋមួយចំនួនដឹកទំនិញយកទៅលក់នៅច្រកទ្វារអន្តរជាតិផ្សេង ដូចជានៅច្រកទ្វារអន្តរជាតិដូង នៅចំណុចបានឡែម ក្នុងភូមិដូង ឃុំបឹងរាំង ស្រុកកំរៀងជាដើម ។
សេចក្តីរាយការណ៍បន្តថា ដូច្នេះហើយ ទើបមកដល់ពេលនេះ កសិផលដំឡូងមី មានការ ធ្លាក់ថ្លៃជាងមុន តែទោះបីជាយ៉ាងណា កសិករបង្ខំចិត្តជួលកម្មករ ឱ្យចូលទៅប្រមូលផលនៅក្នុងចម្ការរបស់ខ្លួន ដើម្បីបានប្រាក់សម្រាប់ផ្គង់ផ្គង់ជីវភាពប្រចាំថ្ងៃ ។
បើតាមប្រភពពីកសិករម្នាក់ឈ្មោះ ឡោ សុខបូន អាយុ៥០ឆ្នាំ រស់នៅភូមិប៉ាហ៊ីត្បូង សង្កាត់ប៉ៃលិន បានឱ្យដឹងថា គាត់បានដាំដំឡូងមីចំនួន៣ហិកតានៅត្រង់ចំណុចភូមិទឹកផុស ដោយជួលកម្មករឱ្យចូលទៅប្រមូលផលអស់រយ:ពេល៣ថ្ងៃមកហើយ ក៏លក់បានចំនួនជាង២០តោនដែរ ។
លោកបន្តទៀតថា តម្លៃទីផ្សារដំឡូងមីបច្ចុប្បន្នមានការធ្លាក់ចុះជាងមុន ដោយដំឡូងមី១គីឡូ ក្រាមឈ្មួញទិញតម្លៃ១.៥បាត (ប្រាក់ថៃ) ដោយកាលពីមុនកើតមានជំងឺកូវីដ១៩នោះ ដំឡូងមីឡើងថ្លៃរហូតដល់១គីឡូក្រាម២.២បាតឯណោះ ។
លោកបញ្ជាក់ថា ទោះបីជាការបិទច្រកទ្វារអន្តរជាតិព្រំមានរយ:ពេលយូរមិនទាន់មានការបើកឱ្យដំណើរការឡើងវិញ ដោយសារតែបញ្ហាជំងឺឆ្លងកូវីដ១៩ តែបើមានឈ្មួញនៅទទួលទិញមើម ដំឡូងមី ទោះបីជាមានតម្លៃថោកក៏គាត់នៅតែដឹកយកទៅលក់ ដើម្បីបានប្រាក់សម្រាប់ផ្គត់ផ្គង់ជីវភាពប្រចាំថ្ងៃ ។
លោកបញ្ជាក់ថាទៀត ចំពោះការជួលឱ្យកម្មករប្រមូលផលនៅក្នុងចម្ការ គឺក្នុង១តោនអស់២៥០បាត(ប្រាក់ថៃ) និងជួលដឹកមើមដំឡូងមីចេញពីចម្ការយកទៅលក់នៅស្តង់ក្នុង១០តោន អស់ថ្លៃ១២០០បាត(ប្រាក់ថៃ) បើសរុបថ្លៃជី ថ្លៃភ្ជួររាស់ ដាំ និងដកមើមដំឡូងមី បើតម្លៃទាបបែបនេះ គឺមិនចំណេញប៉ុន្មាននោះទេ ។
ចំណែកកម្មករម្នាក់ឈ្មោះ លឹម ង៉ាន់ ហៅក្រឹម អាយុ២៩ឆ្នាំ មានប្រពន្ធឈ្មោះ ណាន ណាវី ៣២ឆ្នាំ ស្រុកកំណើតនៅស្រុកជាំក្សាន្ត ខេត្តព្រះវិហារ បានឱ្យដឹងថា គាត់មកស៊ីឈ្នួលដកដំឡូងមីនៅក្នុងខេត្តប៉ៃលិន អស់រយៈពេលច្រើនខែមកហើយ ដោយក្នុង១ថ្ងៃៗអាចទទួលបានប្រាក់កម្រៃ៣៥០០០ទៅ៤០០០០រៀល ដោយស្នាក់នៅក្នុងខ្ទមចាំចម្ការជាមួយប្រពន្ធ និងកូន ។
លោកបន្តទៀតថា ក្រៅពីដកដំឡូងមី បើមានការងារអ្វីផ្សេងទៀត ដូចជា កាច់ពោត និងដាំដំឡូងមី ក៏នាំគ្នាធ្វើការ ដើម្បីបានប្រាក់ផ្គត់ផ្គង់ជីវភាព ដោយសារជំងឺឆ្លងកូវីដ១៩នេះ ធ្វើឱ្យពួកគាត់មិនអាចចេញទៅធ្វើការនៅស្រុកឆ្ងាយ ឬប្រទេសថៃបាននោះទេ ៕ (កែសម្រួលដោយ ៖ បុប្ផា)
ចែករំលែកព័តមាននេះ