ខេត្តបាត់ដំបង ៖ មន្ត្រីជំនាញរដ្ឋបាលក្រុងបាត់ដំបងបាននិងកំពុងធ្វើការពិនិត្យ និងពិភាក្សារកដំណោះស្រាយ ជុំវិញករណីម្ចាស់គម្រោងសាងសង់«សាលាខ្មែរ-ចិនលានហួរ»ធ្វើរបងរំលោភយកផ្លូវសាធារណៈមួយផ្នែក នៅក្នុងតំបន់អភិវឌ្ឍន៍លំនៅឋានមួយកន្លែង នៅខាងជើងផ្សារទំនើប «ភូពុយ» ស្ថិតក្នុងភូមិចំការសំរោង១ សង្កាត់ចំការសំរោង…
ខេត្តបាត់ដំបង ៖ មន្ត្រីជំនាញរដ្ឋបាលក្រុងបាត់ដំបងបាននិងកំពុងធ្វើការពិនិត្យ និងពិភាក្សារកដំណោះស្រាយ ជុំវិញករណីម្ចាស់គម្រោងសាងសង់«សាលាខ្មែរ-ចិនលានហួរ»ធ្វើរបងរំលោភយកផ្លូវសាធារណៈមួយផ្នែក នៅក្នុងតំបន់អភិវឌ្ឍន៍លំនៅឋានមួយកន្លែង នៅខាងជើងផ្សារទំនើប «ភូពុយ» ស្ថិតក្នុងភូមិចំការសំរោង១ សង្កាត់ចំការសំរោង ក្រុងបាត់ដំបង។
មន្ត្រីរដ្ឋបាលក្រុងបាននិយាយថា លោកលឹម ទាឡេង ម្ចាស់គម្រោងសាងសង់ «សាលាខ្មែរ-ចិនលានហួរ» ត្រូវបានគេរាយការណ៍ថា បានធ្វើរបងរំលោភលើផ្លូវសាធារណៈ ប្រហែល១ភាគ៣ នៃទំហំផ្លូវ ដែលមានទទឹង៥ម៉ែត្រ នៅចំណុចខាងលើ ដែលជាតំបន់កំពុងមានការអភិវឌ្ឍលំនៅឋាន ។ ហើយពេលនេះ មន្ត្រីរដ្ឋបានសាលាក្រុង និងមន្ត្រីជំនាញដីធ្លី បានចុះទៅពិនិត្យ និងកំពុងពិភាក្សារកវិធីដោះស្រាយហើយ។
ប្រជាពលរដ្ឋដែលមានដីធ្លី និងមានលំនៅឋាននៅជាប់នឹងដងផ្លូវនោះបាននិយាយថា លោកលឹម ទាឡេង ម្ចាស់គម្រោងសាងសង់«សាលាខ្មែរ-ចិនលានហួរ»នោះ បានប្រើប្រាសគ្រឿងចក្រជីកកកាយរំលោភយកផ្លូវសាធារណៈអស់ជិតមួយចំហៀងផ្លូវ ដើម្បីធ្វើរបងបេតុងរឹងមាំហ៊ុមព័ទ្ធទីតាំងដីដែលត្រូវសាងសង់សាលារបស់គាត់។ ពេលនេះ ក្រុមជាងកំពុងតែបន្តការសាងសង់របងថ្មនោះនៅឡើយ បើទោះជាគេបានស្នើឲ្យមានការដោះស្រាយសិនក្ដី ក៏លោកលឹម ទាឡេង មិនបង្អង់សកម្មភាពសាងសង់ដែរ។
ជុំវិញការចោទប្រកាន់នេះ លោក លឹម ទាឡេង ម្ចាស់គម្រោងសាងសង់«សាលាខ្មែរ-ចិន លានហួរ» ហាក់មិនបានបកស្រាយលំអិតអំពីការរំលោភបំពានដីផ្លូវសាធារណៈខាងលើនេះទេ ។ លោកបានលើកហេតុផលយ៉ាងខ្លី មកពន្យល់ថា «ខ្ញុំមិនបានធ្វើរបងរំលោភលើផ្លូវទេ… ខ្ញុំវាស់ដីខ្ញុំធ្វើរបងត្រិមតែដីរបស់ខ្ញុំ និងធ្វើត្រឹមតែទំហំដីរបស់ខ្ញុំ ។ អ្នកនៅខាងក្រោយនោះ សុទ្ធតែអ្នកមានលុយ បើគេចង្អៀតផ្លូវ គេអាចពង្រីកផ្លូវរុញបន្តៗគ្នាទៅ… ដូច្នេះ ខ្ញុំធ្វើរបងត្រិមតែទំហំដីខ្ញុំទេ»។
ពាក់ព័ន្ធនឹងករណីនេះ បើតាមមន្ត្រីរដ្ឋបាលក្រុងបាននិយាយថា បើតាមការចុះពិនិត្យជាក់ស្ដែង របងថ្មរបស់លោកលឹម ទាឡេង ពិតជាធ្វើរំលោភបំពានលើផ្លូវសាធារណៈនោះមែន តែពេលនេះ មន្ត្រីជំនាញ កំពុងរកដំណោះស្រាយហើយ ។ ប៉ុន្តែមន្ត្រីរូបនេះ បានផ្ដល់ជាគំនិតថា ប្រជាពលរដ្ឋដែលរស់នៅធ្វើដំណើរចេញចូលលើដងផ្លូវខាងលើនេះ គួរតែដាក់ពាក្យបណ្ដឹងទៅកាន់អាជ្ញាធរ ដើម្បីងាយស្រូលសម្រាប់អាជ្ញាធរ ចុះពិនិត្យនិងរកដំណោះស្រាយតាមនីតិវិធី៕
ចែករំលែកព័តមាននេះ