រាជធានីភ្នំពេញ ៖អ្នកនាងខាត់ សុឃីម បានចូលរួមដឹកនាំប្រជាជនរាប់រយនាក់កាលពីព្រឹកថ្ងៃទី២៩ ខែមេសា ឆ្នាំ២០២០ នៅមុខ សាលាដំបូងតុលាការខេត្តសៀមរាប ទាមទារឲ្យដោះលែងនាយកក្រុមហ៊ុនអ៊ីណារីតា ដែលសមត្ថកិច្ចអះអាងថា បានឆបោកប្រាក់អតិថិជនរាប់សិបនាក់ រហូតជាង១៤លានដុល្លាអាមេរិក។ អ្នកនាងខាត់ សុឃីម ពាក់ព័ន្ធអ្វីដែរ ?
មានហេតុផល២សំខាន់ដែលអ្នកនាងខាត់ សុឃីម និងស្វាមី សម្រេចចេញមុខជួយតវ៉ាជាមួយប្រជាពលរដ្ឋទាំងអស់មិនខ្លាចប៉ះពាល់ប្រជាប្រិយភាពក្នុងនាមជាតារាល្បី ។ ថ្លែងប្រាប់កោះសន្តិភាពតាមសារអេឡិចត្រូនិកនៅថ្ងៃទី២ ខែឧសភា ឆ្នាំ២០២០ ដោយអ្នកនាងខាត់ សុឃីម បានអះអាងថា មូលហេតុដែលអ្នកនាងចូលរួមចេញមុខជួយតវ៉ាជាមួយប្រជាពលរដ្ឋទាំងអស់នោះ គឺដោយសារនាងបានវិនិយោគជាមួយក្រុមហ៊ុននោះប្រមាណជាងមួយឆ្នាំមកហើយ ខណៈពេលដែលនាងជឿជាក់លើម្ចាស់ក្រុមហ៊ុនដែលបានបើកលុយឲ្យរូបនាងរាល់ខែមិនដែលអាក់ខានឡើយ ។
មូលហេតុមួយទៀតគឺដោយសារមានសំណូមពរពីប្រជាពលរដ្ឋប្រមាណជិត២ពាន់គ្រួសារសុំឲ្យនាងធ្វើជាតំណាងសម្រាប់ការតវ៉ានេះ ព្រោះពួកគេយល់ថា នាងជាតារាមានកេរ្តិ៍ឈ្មោះ និងមានអ្នកធំអ្នកតូចស្គាល់ និងចូលចិត្តច្រើន ។
អ្នកនាងខាត់ សុឃីម ថា«ហេតុនេះនាងក៏សម្រេចចូលរួមជាតំណាងជួយពួកគាត់ ព្រោះមើលទៅពិបាកពេក ហើយបេីជួយបាននោះនាងខ្ញុំក៏ងាយស្រួលដូចគ្នា ដោយសារនាងខ្ញុំក៏ដល់ថ្ងៃបង់ធនាគារផងដែរ »។
បើតាមអ្នកនាងខាត់ សុឃីម បន្ទាប់ពីនាង និងប្រជាពលរដ្ឋជិតពីរពាន់គ្រួសារនោះតវ៉ារួចមក ក៏ទទួលបានលទ្ធពីភាគីពាក់ព័ន្ធ ។ លទ្ធផលគឺអ្នកតំណាងមកពីក្រសួងយុត្តិធម៌ និងលោកទៀ សីហា អភិបាលខេត្តសៀមរាបបានពិភាក្សារួមគ្នា និងបានសម្រេចថាក្រសួងយុត្តិធម៌ យល់ពីចិត្តបងប្អូន និងព្រមដោះលែងលោកឌឹម សួនណាត តាមបងប្អូនស្នើ ដោយមានលក្ខខណ្ឌ តាមអនុសាសន៍របស់ក្រសួងយុត្តិធម៌ ដូចខាងក្រោម៖
១. អ្នកតវ៉ាទាំងអស់គ្នា គឺជាអ្នកវិនិយោគ មិនមែនជាជនរងគ្រោះទេ អ្នកទាំងអស់គ្នា ព្រមទទួលយកសំណងពីលោកឌីម សួនណាត តាមលិខិតធានា ដែលបានបង្ហាញស្នាមមេដៃ និងត្រាមេធាវី ដូច្នេះអ្នកទាំងអស់គ្នា ពុំមានសិទ្ធិប្តឹង លោកឌីម សួនណាត ទេ ព្រោះយើងបានជឿទុកចិត្តលើគាត់ អ៊ីចឹងយើងទទួលសំណងតាមគោលការណ៍ លោកឌីម សួនណាត ។
២. ធ្វើការដាក់ញត្តិស្នើទៅក្រសួងយុត្តិធម៌ ដោយតម្រូវឲ្យអ្នកតំណាងទាំង១៥នាក់ ផ្តិតមេដៃស្នើជំនួសអ្នកវិនិយោគទាំងអស់ ដែលមានចំនួនជិត២០០០គ្រួសារ ។
៣.តម្កល់ប្រាក់នៅតុលាការ ដោយមានតំណាងក្រសួងយុត្តិធម៌ និងលោកអភិបាលខេត្តសៀមរាប ទៀ សីហា ជាសាក្សី ។ នេះជាការងារបន្ទាន់បំផុត គឺយ៉ាងយូរដល់ត្រឹមថ្ងៃ១៩ ខែឧសភា ឆ្នាំ២០២០ ។អ្នកតំណាងសម្ដែងការគាំទ្រពីបងប្អូន ដើម្បីពន្លឿនកិច្ចការនេះ ដើម្បីឲ្យលោកអគ្គនាយក ចេញមកខាងក្រៅ ។ អ្នកតំណាងនឹងត្រូវរំសាយ ក្រោយពេលដែលលោកឌីម សួនណាត មានសេរីភាព ។
ពាក់ព័ន្ធនឹងលទ្ធផលនេះអ្នកនាងខាត់ សុឃីម បានលើកឡើងថា ក្រោយពីមានការឯកភាពដោះលែង លោកឌីម សួនណាត នាពេលនេះពួកនាងទាំងអស់នឹងត្រូវរំសាយ លែងជាតំណាងឲ្យក្រុមហ៊ុននេះទៀតហើយ ។ ចំណែកថា តើអ្នកនាងអាចនឹងវិនិយោគបន្តជាមួយក្រុមហ៊ុននេះទៀតឬយ៉ាងណានោះ? អ្នកនាងសុឃីម ថា មិនទាន់ច្បាស់ឡើយ ដោយសារពេលជួបរឿងមួយនេះនាងពិតជាហត់នឿយយ៉ាងខ្លាំង ៕ (កែសម្រួលដោយ ៖ បុប្ផា)
ចែករំលែកព័តមាននេះ