ខេត្តប៉ៃលិន ៖ ក្នុងរយ:ពេល៣ថ្ងៃជាប់ៗគ្នា ចាប់តាំងពីថ្ងៃទី១ រហូតមកដល់ថ្ងៃទី៣ ខែឧសភា ឆ្នាំ២០២០នេះ គេសង្កេតឃើញក្រុមនគរបាលចរាចរណ៍ជើងគោកនៃស្នងការដ្ឋាន នគរបាលខេត្តប៉ៃលិន បានសហការជាមួយនគរបាលចរាចរណ៍អធិការនគរបាលក្រុង ស្រុក បានបន្តដាក់គោលដៅរៀងៗខ្លួន ដើម្បីរឹតបន្តឹងច្បាប់ចរាចរណ៍ និងធ្វើការផាកពិន័យដល់ម៉ូតូ និងរថយន្ត ដែលល្មើសច្បាប់ចរាចរណ៍ ដូចជាបើកបរហួសល្បឿនកំណត់ អត់ពាក់មួកសុវត្ថិភាព ម៉ូតូអត់កញ្ចក់ អត់ប័ណ្ណបើកបររថយន្តជាដើម ។
ហេតុការណ៍ដាក់គោលដៅរឹតបន្តឹងច្បាប់ចរាចរណ៍ និងធ្វើការផាកពិន័យដល់អ្នកល្មើសច្បាប់ចរាចរណ៍ខាងលើនេះបានធ្វើឡើងកាលពីវេលាម៉ោង៩ និង៣០នាទីព្រឹកថ្ងៃទី៣ ខែឧសភា ឆ្នាំ២០២០ ស្ថិតនៅបណ្តោយផ្លូវជាតិលេខ៥៧ ក្នុងក្រុងប៉ៃលិន ខេត្តប៉ៃលិន ។
តាមប្រភពព័ត៌មានបានឱ្យដឹងថា បន្ទាប់ពីនគរបាលចរាចរណ៍ធ្វើការរឹតបន្តឹងច្បាប់ចរាចរណ៍ជើងគោក ដោយផាកពិន័យទ្វេដង លើសពីលើកមុន ធ្វើឱ្យប្រជាពលរដ្ឋមួយចំនួន មានការភ្ញាក់រលឹក និងខ្លាចរអាចំពោះសមត្ថកិច្ច ក៏ដូចជាច្បាប់ចរាចរណ៍ ដើម្បីកាត់បន្ថយករណីគ្រោះថ្នាក់ចរាចរណ៍ ដែលកើតឡើងស្ទើររាល់ថ្ងៃ ខណ:ពេលពីមុន គឺអ្នកពាក់មួកសុវត្ថិភាពនៅតែពាក់ រីឯអ្នកមិនពាក់មួកសុវត្ថិភាពនៅតែមិនពាក់ដដែល ។ ដូច្នេះ តាំងពីនគរបាលចុះដាក់គោលដៅស្ទាក់ចាប់អ្នកបើកបរល្មើសច្បាប់ចរាចរណ៍ថ្មីនេះរួចមក ធ្វើឱ្យអ្នកជិះម៉ូតូ និងអ្នកបើកបររថយន្តម្នាក់ៗ នាំគ្នាគោរពច្បាប់ចរាចរណ៍ស្ទើរតែទាំងស្រុង ដោយនៅថ្ងៃខាងមុខ អាចនឹងគោរពច្បាប់គ្រប់ៗគ្នាផងដែរ ។
តាមប្រភពព័ត៌មានបានបន្តទៀតថា នៅពេលនេះមួកសុវត្ថិភាព និងកញ្ចក់ម៉ូតូ តាមហាងលក់ដាច់ខ្លាំង ដោយប្រជាពលរដ្ឋនាំគ្នាសម្រុកចូលទៅទិញដាក់ម៉ូតូរបស់ខ្លួន ។ ចំណែកឯអ្នកដែលអត់មានប័ណ្ណបើកបររថយន្ត ក៏ប្រញាប់ទៅរៀនបើកបរ និងធ្វើប័ណ្ណបើកបរយ៉ាងមមាញឹក ព្រោះខ្លាចនគរបាលផាកពិន័យ ។ ចំណែកអ្នកខ្លះទៀត ដែលធ្លាប់ជិះម៉ូតូអត់ពាក់ស្លាកលេខ និងអត់មានលេខកុងទ័រ ក៏នាំគ្នាធ្វើស្លាកលេខ និងដាក់លេខកុងទ័រផងដែរ ដើម្បីជៀសវាងនគរបាលផាកពិន័យអស់ប្រាក់ច្រើន ។
ពាក់ព័ន្ធទៅនឹងបញ្ហាខាងលើនេះ លោក ប្រាក់ វិគុន នាយរងការិយាល័យចរាចរណ៍ជើងគោកនៃស្នងការនគរបាលខេត្តប៉ៃលិន បានឱ្យដឹងថា ឯកសារដែលយកតាមខ្លួន គឺមានតែប័ណ្ណបើកបរ១ប៉ុណ្ណោះ ដែលត្រូវតែដាក់ច្បាប់ដើម ។ ចំណែកឆៀក និងឯកសាររថយន្តមួយចំនួនទៀត អាចជារបស់ថតចម្លងក៏បានដែរ ។ លោកបន្តទៀតថា ចំពោះការដាក់កុងត្រូលត្រួតពិនិត្យច្បាប់ចរាចរណ៍នេះ ខាងស្នងការនគរបាលខេត្ត ធ្វើការតែថ្ងៃគូប៉ុណ្ណោះ រីឯថ្ងៃសេស គឺខាងអធិការស្រុក ឬអធិការក្រុង ជាអ្នកដាក់តាមគោលដៅរៀងៗខ្លួន ។
លោកបញ្ជាក់ថា ចាប់ពីពេលនេះតទៅ នគរបាលនឹងធ្វើការផាកពិន័យទាំងម៉ូតូ និងរថយន្ត មិនឱ្យបន្តល្មើសច្បាប់ទៀតនោះឡើយ ដើម្បីការពារសុវត្ថិភាពខ្លួនឯង និងអ្នកដទៃ ។ ទោះបីជាមន្ត្រីរាជការណាល្មើស ក៏មិនអាចលើកលែងបានដែរ ព្រោះធ្វើតាមគោលការណ៍ថ្នាក់លើ បើសិនជាមិនបង់ថ្លៃផាកពិន័យទេ ត្រូវតែយកទៅដាក់នៅអធិការ ឬនៅស្នងការ ដើម្បីរង់ចាំដោះស្រាយនៅពេលក្រោយតាមផ្លូវច្បាប់ ៕ (កែសម្រួលដោយ ៖ ធីតា)
ចែករំលែកព័តមាននេះ