ខេត្តសៀមរាប ៖ បើតាមសេចក្តីរាយការណ៍បឋមបានឱ្យដឹងថា មានករណីគ្រោះថ្នាក់ចរាចរណ៍មួយបានកើតឡើងរវាងរថយន្តហ៊ីយ៉ាន់ដាយឃ្លុបដឹកទំនិញ និងរថយន្តយីឌុបមួយគ្រឿងបុកគ្នាពេញទំហឹង បណ្តាលឱ្យបែករហែកជាចំណែក បង្កឱ្យមានការភ្ញាក់ផ្អើលនាម៉ោង៤និង៣០នាទីនាព្រឹក ថ្ងៃទី០១ ខែឧសភា ឆ្នាំ២០២០…
ខេត្តសៀមរាប ៖ បើតាមសេចក្តីរាយការណ៍បឋមបានឱ្យដឹងថា មានករណីគ្រោះថ្នាក់ចរាចរណ៍មួយបានកើតឡើងរវាងរថយន្តហ៊ីយ៉ាន់ដាយឃ្លុបដឹកទំនិញ និងរថយន្តយីឌុបមួយគ្រឿងបុកគ្នាពេញទំហឹង បណ្តាលឱ្យបែករហែកជាចំណែក បង្កឱ្យមានការភ្ញាក់ផ្អើលនាម៉ោង៤និង៣០នាទីនាព្រឹក ថ្ងៃទី០១ ខែឧសភា ឆ្នាំ២០២០ ដែលជាថ្ងៃនៃការអនុវត្តន៍អនុក្រឹត្យថ្មី ស្តីពីការផាកពិន័យអន្តរការណ៍ដំបូង ស្ថិតនៅភូមិដូនរាជ្យ ឃុំគោកធ្លក ក្រោម ស្រុកជីក្រែង។
សេចក្តីរាយការណ៍បន្តថា មុនពេលកើតហេតុ គេឃើញរថយន្តហ៊ីយ៉ាន់ដាយ ឃ្លុបដឹកទំនិញពាក់ស្លាកលេខភ្នំពេញ 3D 8105 បានបើកបរដឹកទំនិញមកពីក្រុងប៉ោយប៉ែត ខេត្តបន្ទាយមានជ័យ លុះមកដល់កន្លែងកើតហេតុ ក៏ទៅបុកជាមួយរថយន្តយីឌុប ពាក់ស្លាកលេខកំពង់ធំ 3A 1643 ខណៈកំពុងខូច ហើយចតនៅនឹងលើចិញ្ចើមផ្លូវ ស្ថិតនៅក្នុងភូមិដូនរាជ្យ ឃុំគោកធ្លកក្រោម ចំពីចំហៀងពេញទំហឹង បណ្តាលឲ្យរថយន្តហ៊ីយ៉ាន់ដាយ បែករហែកជាចំណែក និងធ្លាក់ទំនិញរាយពាសពេញផ្លូវតែម្តង ហើយក៏រេចង្កូតទៅស្នាមភ្លោះ ធ្វើឲ្យរថយន្តខូតខាតជាធ្ងន់ធ្ងរ តែមិនបានបណ្តាលឲ្យមានមនុស្សរងរបួសឡើយ ។
បើតាមអ្នកបើកបររថយន្តបង្កសុំមិនបញ្ចេញឈ្មោះបានឲ្យដឹងថា រថយន្តរបស់គាត់បានដឹកទំនិញចេញមកពីក្រុងប៉ោយប៉ែត ពេលមកដល់កន្លែងហេតុ រូបគាត់បានចាំងទៅនឹងភ្លើងហ្វាលរថយន្តបើកបញ្ច្រាស់ទិសគ្នា ដោយមើលផ្លូវមិនឃើញ រូបគាត់ក៏បានបើកអែមមកខាងស្តាំដៃ ស្រាប់តែទៅបុកនឹងចំហៀងរថយន្តយីឌុបដែលខូចចតនៅនឹងចិញ្ចើមផ្លូវ ដោយរថយន្តនោះដាក់ស្លាកសញ្ញាចរាចរណ៍មើលមិនច្បាស់ ហើយខណៈនោះខ្លួនគាត់ក៏បើកបរក្នុងល្បឿនលឿនផងនោះ ទើបបណ្តាលធ្វើឲ្យមានគ្រោះថ្នាក់នេះឡើងតែម្តង ។
តាមការបញ្ជាក់របស់សមត្ថកិច្ចនគរបាលចរាចរណ៍ បានឲ្យដឹងថា ក្នុងករណី គឺបណ្តាលមកពីអ្នកបើកបរគ្មានការប្រុងប្រយ័ត្ន ស្របទៅនឹងការដាក់ស្លាកសញ្ញាចរាចរណ៍របស់រថយន្តយីឌុប មិនបានត្រឹមត្រូវ ទើបបណ្តាឲ្យមានករណីគ្រោះថ្នាក់នេះកើតឡើង ។
បច្ចុប្បន្ន រថយន្តទាំងពីរគ្រឿងត្រូវបានកម្លាំងជំនាញធ្វើការស្ទូចនាំយកទៅរក្សាទុកនៅអធិការដ្ឋាននគរបាលស្រុកជីក្រែង ដើម្បីធ្វើការដោះស្រាយតាមផ្លូវច្បាប់៕ (កែសម្រួលដោយ ៖ បុប្ផា)
ចែករំលែកព័តមាននេះ