ខេត្តមណ្ឌលគិរី ៖ អស់រយៈពេល១១ថ្ងៃហើយ ដែលដំរីស្តព្រៃ១ក្បាលបានចូលទៅអុកឡុកភូមិឋាន ពលរដ្ឋក្នុងសង្កាត់រមនាក្រុងសែនមនោរម្យ រហូតបណ្តាលឲ្យផ្ទះអ្នកភូមិមួយខ្នងរងការខូចខាត ដោយសារដំរីតប់(វាយប្រហារ) ចំណែកអ្នកភូមិមិនហ៊ានចូលទៅដេកក្នុងផ្ទះទេ ព្រោះខ្លាចមានគ្រោះថ្នាក់ដល់អាយុ
ជីវិត ។ សូមរំលឹកថា៖ មេដំរីស្រុកប្រឆាំងដាច់អហ័ង្ការ មិនព្រមឱ្យដំរីស្តព្រៃរួមរ័កទេ
សមត្ថកិច្ចបានឲ្យដឹងថា គិតចាប់ពីថ្ងៃទី២១ខែមេសា រហូតដល់ថ្ងៃទី១ ឧសភា គឺមានរយៈពេល១១ថ្ងៃហើយដែលដំរីព្រៃបានចូលមករកញីដល់ក្នុងភូមិ ។ ពេលចូលមកដំបូង វាបាននៅក្រវែលៗដំរីញីស្រុកចំនួន៤ក្បាលនៅភូមិពូត្រុំថ្មី សង្កាត់រមនា ដែលហ្មចងក្បែរមាត់អូរ ។
សមត្ថកិច្ចបន្តថា ក្រោយពីដំរីព្រៃព្យាយាមទាក់ទងដំរីស្រុកញីជាច្រើនថ្ងៃមិនបានសម្រេចវាក៏ដើរចេញពីភូមិពូត្រុំថ្មី កាត់ព្រៃនិងចម្ការអ្នកស្រុកឆ្ពោះទៅភូមិពូត្រុំ(ភូមិដំរីជាន់) រហូតឈានដល់វាឈ្មុលផ្ទះអ្នកភូមិខូចខាតអស់មួយខ្នង ។ លោក ព្រំ វិបុលរតនៈ នាយកដែនជម្រកការពារសត្វព្រៃកែវសីមា បានឲ្យដឹងយ៉ាងខ្លីថា មន្ត្រីនៅមិនទាន់មានវិធានការអ្វីបន្ថែមទេ ដោយបានត្រឹមតាមឃ្លាំមើលសកម្មភាពរបស់វាប៉ុណ្ណោះ ។
ករណីនេះ ក្រៅពីប្រើរបៀបសាមញ្ញា គឺមិនទាន់អាចធ្វើអ្វីបានទៀតទេ ។ ទោះជាយ៉ាងណា នៅថ្ងៃទី១ ខែឧសភា កោះសន្តិភាពមិនអាចសុំការបញ្ជាក់ពីមន្ទីរបរិស្ថានខេត្តបានទេ ។
មហាជនបានលើកឡើងថា ខេត្តមណ្ឌលគិរីជាតំបន់សម្បូរព្រៃភ្នំ ហើយសម្បូរសត្វព្រៃធំៗហេតុអ្វីអាជ្ញាធរ ជាពិសេសមន្ទីរជំនាញមិនមានត្រៀមឧបករណ៍បង្ការហានិភ័យដែលកើតមានឡើង ។ ឯអង្គការចិញ្ចឹមសត្វដំរី ដែលមានដំរីជាង១០ក្បាលក៏មិនមានវិធីសាស្ត្រដើម្បីបង្ការករណីនេះទៀត ។ គេនៅចាំបានថា កាលពីអំឡុងឆ្នាំ២០១៧ ដំរីចុះប្រេងមួយក្បាលត្រូវបាញ់សម្លាប់ ព្រោះតែមិនមានកាំភ្លើងបាញ់ឱ្យសន្លប់ ។ នេះជាបទពិសោធន៍ដ៏ឈឺចាប់ ខណៈប្រទេសកម្ពុជាមានសត្វប្រភេទកម្រ បែរជាត្រូវបាញ់សម្លាប់ព្រោះតែគ្មានកិច្ចអន្តរាគមន៍ច្បាស់លាស់ពីអ្នកពាក់ព័ន្ធ ៕
ចែករំលែកព័តមាននេះ