មនុស្សម្នាក់ៗតែងតែមានចំណុចដែលខ្លួនចង់ពង្រឹងដើម្បីបន្តអភិវឌ្ឍន៍ខ្លួន ។ នរណាក៏មានទម្លាប់មិនល្អដែលពួកគេចង់កាត់បន្ថយដែរ ឬជំនាញថ្មីៗដែលចង់រៀន ព្រមទាំងគម្រោងថ្មីៗដែលចង់ចាប់ផ្តើមជាដើម ។
ប៉ុន្តែក៏មានមនុស្សច្រើនដែរដែលរកការដោះសារមករារាំងខ្លួនមិនឲ្យធ្វើសកម្មភាពទាំងនោះ ជាពិសេស គឺការដោះសារ «មិនមានពេល» ។ ប៉ុន្តែក្នុងកំឡុងពេលដែលពិភពលោកកំពុងតែទប់ទល់នឹងកូវីដ ១៩ នេះ មនុស្សជាច្រើនមានពេលទំនេរច្រើនជាងមុន ហើយវាគួរជាពេលល្អក្នុងការចាប់ផ្តើមអភិវឌ្ឍន៍ខ្លួនបន្ថែមដែរ ។ខាងក្រោមនេះ គឺជាយុទ្ធសាស្ត្រងាយៗដែលអ្នកអាចអនុវត្តដើម្បីឈានទៅរកភាពជោគជ័យពេលដែលបញ្ហាកូវីដ ១៩ ត្រូវបានដោះស្រាយ ។
១. កាត់បន្ថយទម្លាប់មិនល្អ
តើមានទម្លាប់អ្វីដែលអ្នកត្រូវតែកែប្រែ? ហើយអ្វីដែលអ្នកត្រូវធ្វើដើម្បីបោះបង់ទម្លាប់ទាំងនោះចោល? ប្រសិនបើអ្នកមានទម្លាប់មើលទូរទស្សន៍រាប់ម៉ោងក្នុងមួយថ្ងៃ អ្នកអាចចាប់ផ្តើមមើលអ្វីដែលផ្តល់អត្ថប្រយោជន៍ដល់អ្នកវិញ មិនមែនវីដេអូគ្មានបានការលើប្រព័ន្ធសង្គមទេ ។
ប្រសិនបើអ្នកខ្ជះខ្ជាយពេលវេលា ឬគេងច្រើន អ្នកអាចព្យាយាមក្រោកពីដំណេកពីព្រលឹម ។ ជាក់ស្តែងទម្លាប់មិនអាចត្រូវបានបង្កើតឡើងក្នុងរយៈពេលមួយយប់ទេ ដូច្នេះអ្នកត្រូវតែបន្តធ្វើវារហូតអ្នកអាចធ្វើវាបានដោយស្វ័យប្រវត្តិ ។
២. ហ្វឹកហាត់ការគិតវិជ្ជមាន
ប្រសិនបើអ្នកចូលចិត្តរិះគន់ខ្លួនច្រើន និងចូលចិត្តមានទស្សនៈអវិជ្ជមាននោះ អ្នកគួរតែចាប់ផ្តើមផ្លាស់ប្តូរទម្លាប់នេះចេញ ។ មនុស្សភាគច្រើនមានទស្សនៈវិជ្ជមានពេលដែលពួកគេគិតពីអ្វីដែលពួកគេមានស្រាប់ច្រើនជាងការគិតពីអ្វីដែលពួកគេមិនមាន ។ គន្លឹះមួយទៀត គឺហ្វឹកហាត់សរសើរខ្លួនឯងជារៀងរាល់ថ្ងៃដើម្បីធ្វើឲ្យអ្នកកាន់តែមានជំនឿចិត្តលើខ្លួនឯងជាដើម ។
៣. អបំរំខ្លួនដើម្បីស្រូបយកចំណេះដឹងបន្ថែម
ការអប់រំមិនកើតមានឡើងតែនៅសាលារៀនទេ ។ អ្នកអាចរៀនសូត្រពីប្រធានបទថ្មីៗ ឬជំនាញថ្មីៗបានដោយខ្លួនឯងបានដោយការអានសៀវភៅ ។ ជាទូទៅ អ្នកគួរតែជ្រើសរើសសៀវភៅដែលត្រូវបាននិពន្ធដោយបុគ្គលដែលជោគជ័យពិតប្រាកដ ឬអ្នកជំនាញលើប្រធានបទនោះ ៕
ចែករំលែកព័តមាននេះ