ខេត្តបន្ទាយមានជ័យ ៖ ជនរងគ្រោះម្នាក់ជាមនុស្សគ ត្រូវបានអ្នកស្គាល់គ្នាធ្វើការជាមួយបបួលផឹកស៊ីឲ្យស្រវឹង រួចក៏ធ្វើសកម្មភាពប្លន់សម្លាប់យកម៉ូតូ និងខ្សែក ហើយកាន់តែសាហាវជាងនេះទៀត ជនល្មើសក៏បានគាស់យកធ្មេញមាសរបស់ជនរងគ្រោះថែមទៀត តែអំពើដ៏ព្រៃផ្សៃនេះ ត្រូវបានកម្លាំងនគរបាលបើកប្រតិបត្តិការតាមចាប់ជនសង្ស័យចំនួន៥នាក់…
ខេត្តបន្ទាយមានជ័យ ៖ ជនរងគ្រោះម្នាក់ជាមនុស្សគ ត្រូវបានអ្នកស្គាល់គ្នាធ្វើការជាមួយបបួលផឹកស៊ីឲ្យស្រវឹង រួចក៏ធ្វើសកម្មភាពប្លន់សម្លាប់យកម៉ូតូ និងខ្សែក ហើយកាន់តែសាហាវជាងនេះទៀត ជនល្មើសក៏បានគាស់យកធ្មេញមាសរបស់ជនរងគ្រោះថែមទៀត តែអំពើដ៏ព្រៃផ្សៃនេះ ត្រូវបានកម្លាំងនគរបាលបើកប្រតិបត្តិការតាមចាប់ជនសង្ស័យចំនួន៥នាក់ ក្នុងនោះ មានស្រីម្នាក់ផងដែរ ។
ហេតុការណ៍ដ៏សាហាវនេះ បានកើតឡើងក្នុងខ្ទមមួយកន្លែងនៅកណ្ដាលវាល ក្នុងភូមិអូរតាគល់ ឃុំឬស្សីស្រុក ស្រុកមង្គលបុរី ខេត្តបន្ទាយមានជ័យ នាថ្ងៃទី២៨ ខែមេសា ឆ្នាំ២០២០ ។ លោកឧត្តមសេនីយ៍ទោ អាត់ ខែម ស្នងការខេត្ដ ដែលបានដឹកនាំកម្លាំងនគរបាលតាមបង្ក្រាបក្រុមជនដៃដល់ បានប្រាប់ឱ្យដឹងនៅថ្ងៃទី៣០ មេសា ថា ជនរងគ្រោះជាមនុស្សគ រស់នៅភូមិអូអាកុល ឃុំឬស្សីស្រុក ស្រុកមង្គលបុរី ។ ចំណែកជនសង្ស័យទាំង៥នាក់នោះ រស់នៅភូមិឃុំជាមួយគ្នា ។
តាមដំណើររឿងបានឱ្យដឹងថា ជនសង្ស័យទាំង៥នាក់នេះ បានបបួលលួងលោមជនរងគ្រោះឱ្យផឹកស្រាស នៅក្នុងខ្ទមមួយកន្លែងកណ្ដាលវាលស្រែ នៅពេលនោះ ជនទាំង៥នាក់ក៏បង្អកឱ្យផឹកស្រវឹងកាន់តែខ្លាំង ។ បន្ទាប់មកពួកគេក៏ចេញពីទីតាំងខាងលើ មកស្ពានមួយកន្លែងនៅតាមផ្លូវទៅខេត្ដសៀមរាប ក៏បន្ដឲ្យជនរងគ្រោះផឹកកាន់តែស្រវឹងខ្លាំងទៀត ។ ពេលនោះពួកគេក៏ចាប់ផ្ដើមធ្វើសកម្មភាព យកដំបងវាយ និងយកខ្សែក្រវាត់រឹតក ហើយចាប់ជនរងគ្រោះជ្រមុជចូលទឹកប្រឡាយរហូតដល់ស្លាប់ ហើយក៏បានវាយបំបាក់គាស់យកធ្មេញមាសរបស់ជនរងគ្រោះទៀតផង ។
តាមការសារភាពថា ក្រោយសម្លាប់រួច ជនសង្ស័យទាំង៥នាក់ក៏រៀបចំដឹកសាកសពតាមម៉ូតូ យកទៅចោលនៅប្រឡាយមួយកន្លែងក្នុងសង្កាត់ម្កាក់ ក្រុងសិរីសោភ័ណ្ឌ ក្បែរផ្លូវជាតិ៥៦ ។ ក្រុមជនសង្ស័យក៏គេចពីស្រុកមង្គលបុរី ឆ្ពោះទៅលាក់ខ្លួននៅផ្ទះរបស់ស្ដ្រីម្នាក់ ដែលជាប្រពន្ធរបស់ជនល្មើសម្នាក់ ក្នុងចំណោមជនល្មើស៤នាក់ នៅភូមិកំរែក ឃុំស្វាយសរ ស្រុកបរិបូរណ៍ ខេត្តកំពង់ឆ្នាំង ទើបក្រោយមកត្រូវកម្លាំងសមត្ថកិច្ចខេត្ត ដឹកនាំដោយឧត្តមសេនីយ៍ទោ អាត់ ខែម ចាប់ខ្លួនបានដោយសហការជាមួយកម្លាំងសមត្ថកិច្ចខេត្តកំពង់ឆ្នាំង ៕
ចែករំលែកព័តមាននេះ