ខេត្តបាត់ដំបង ៖ បុរសម្នាក់ដែលជាប់ពាក់ព័ន្ធនឹងមុខជំនួញគ្រឿងញៀនយ៉ាងសកម្ម នៅតាមជនបទ ត្រូវបានសមត្ថកិច្ចមូលដ្ឋានឃាត់ខ្លួន កាលពីវេលាថ្ងៃត្រង់ថ្ងៃទី២៩ មេសា ខណៈដែលកំពុង ប្រព្រឹត្តបទល្មើសនៅភូមិបឹងចែង ឃុំស្នឹង ស្រុកបាណន់ ជាមួយនឹងការដកហូតបាននូវវត្ថុតាងគ្រឿងញៀន «ម៉ា ទឹកកក»ចំនួនជាង៣០ថង់ ។
លោកសុខ និមល នាយការិយាល័យប្រឆាំងបទល្មើសគ្រឿងញៀនបានឱ្យដឹងថា ជនសង្ស័យឈ្មោះ ម៉ែន ប៊ុនធឿន ហៅ ឈឿប អាយុ៤៦ឆ្នាំ នៅភូមិបឹងចែង ឃុំស្នឹង ស្រុកបាណន់ ។ លោកបានបញ្ជាក់ថា ជននេះត្រូវមន្ត្រីមូលដ្ឋានឃាត់ខ្លួន ពេលកំពុងដោះដូរទំនិញ (គ្រឿងញៀន)។ ជាក់ស្ដែង នៅក្នុងមូលដ្ឋាន ហើយថែមទាំងដកហូតបានវត្ថុតាងមួយចំនួនធំផងដែរ។
ពាក់ព័ន្ធនឹងបទល្មើសគ្រឿងញៀន នៅក្នុងឃុំស្នឹងសព្វថ្ងៃនេះ ប្រជាពលរដ្ឋហាក់កំពុងមានការព្រួយបារម្ភយ៉ាងខ្លាំង ដោយសារតែស្ថានភាពនៃពួកអ្នកជួញដូរ និងអ្នកប្រើប្រាស់បាននិងកំពុងរីករាលដាលកាន់តែខ្លាំងឡើងៗ ស្ទើរគ្រប់ទីកន្លែងមិនថា ទីប្រជុំជនឬនៅតាមទីជនបទឆ្ងាយដាច់ស្រយ៉ាលឡើយ ។ រីឯវិធានការបង្ក្រាបឬការទប់ស្កាត់របស់សមត្ថកិច្ចវិញ ហាក់នៅមានកំរិតនៅឡើយ។
កន្លងមក ស្ទើរគ្រប់កម្មវិធីប្រជុំនៅតាមមូលដ្ឋាន ជាពិសេស នៅក្នុងកម្មវិធីវេទការសាធារណៈនានាមន្ត្រីជំនាញ ឬអាជ្ញាធរមូលដ្ឋាន តែងតែអំពាវនាវសុំឱ្យប្រជាពលរដ្ឋចូលរួមសហការរាល់សកម្មភាពរបស់សមត្ថកិច្ចឬអាជ្ញាធរពាក់ព័ន្ធនឹងបញ្ហាសង្គម ។ ជាពិសេស សុំឱ្យពលរដ្ឋចូលរួមផ្ដល់ព័ត៌មាន ឬចូលរួមទប់ស្កាត់បញ្ហាគ្រឿងញៀន។ ប៉ុន្តែផ្ទុយទៅវិញ ពេលពលរដ្ឋផ្ដល់តម្រុយ នៃជនប្រព្រឹត្តគ្រឿងញៀន បែរជាសមត្ថកិច្ចធ្វើមិនដឹងមិនឮ ។
បើតាមពលរដ្ឋនៅក្នុងឃុំស្នឹង ដែលធ្លាប់រាយការណ៍អំពីសកម្មភាពក្រុមប្រព្រឹត្តគ្រឿងញៀននេះបាននិយាយថា«សព្វថ្ងៃនេះ បញ្ហាគ្រឿងញៀន កំពុងរីករាលដាលកាន់តែខ្លាំងឡើងៗ ហើយពួកជនប្រព្រឹត្តហាក់មិនសូវលាក់លៀមពីភ្នែកមហាជនឡើយ ខណ:សមត្ថកិច្ចហាក់គ្មានសកម្មភាព»។
ទោះយ៉ាងណា ជុំវិញការបង្ក្រាបមុខសញ្ញាជួញដូរគ្រឿងញៀនបានម្នាក់នៅឃុំស្នឹង ខាងលើនេះ លោកសុខ និមល នាយការិយាល័យប្រឆាំងបទល្មើសគ្រឿងញៀនបានប្រាប់ថា ជាមួយនឹងការឃាត់ខ្លួនឈ្មោះ ម៉ែន ប៊ុនធឿន ហៅឈឿបនេះ មន្ត្រីជំនាញដកហូតបានវត្ថុតាង ថ្នាំញៀនប្រភេទមេតំហ្វេតាមីន ICE (ម៉ាទឹកកក) បានចំនួន៣៣ថង់ ដែលមានទម្ងន់៥.៨៧ក្រាម, សម្ភារ:សម្រាប់វិចខ្ចប់ថ្នាំញៀន និង វត្ថុតាងនានាមួយចំនួនទៀត ។ ពេលនេះ មន្ត្រីការិយាល័យជំនាញកំពុងកសាងសំណុំរឿងបញ្ជូនជនសង្ស័យទៅកាន់សាលាដំបូងខេត្តហើយ៕
ចែករំលែកព័តមាននេះ