ទ្រព្យសម្បត្តិរបស់មហាសេដ្ឋីមួយចំនួនក្នុងសហរដ្ឋអាមេរិកបន្តកើនឡើងមិនឈប់ឈរទោះជាក្នុងកំឡុងពេលដែលប្រទេសជុំវិញពិភពលោកកំពុងព្យាយាមទប់ទល់នឹងការផ្ទុះជំងឺកូវីដ ១៩ ក៏ដោយ ។ មហាសេដ្ឋីមួយចំនួនរបស់សហរដ្ឋអាមេរិករកបានរាប់ប៊ីលានដុល្លារឯណោះតាំងពីដើមឆ្នាំ ២០២០ នេះបើយោងតាមរបាយការណ៍របស់វិទ្យាស្ថាន Institute for Policy…
ទ្រព្យសម្បត្តិរបស់មហាសេដ្ឋីមួយចំនួនក្នុងសហរដ្ឋអាមេរិកបន្តកើនឡើងមិនឈប់ឈរទោះជាក្នុងកំឡុងពេលដែលប្រទេសជុំវិញពិភពលោកកំពុងព្យាយាមទប់ទល់នឹងការផ្ទុះជំងឺកូវីដ ១៩ ក៏ដោយ ។ មហាសេដ្ឋីមួយចំនួនរបស់សហរដ្ឋអាមេរិករកបានរាប់ប៊ីលានដុល្លារឯណោះតាំងពីដើមឆ្នាំ ២០២០ នេះបើយោងតាមរបាយការណ៍របស់វិទ្យាស្ថាន Institute for Policy Studies ។ខាងក្រោមនេះជាចំណុចមួយចំនួនដែលអ្នកប្រហែលជាមិនធ្លាប់ឮពីមុនមកទេពីមហាសេដ្ឋីធំៗក្នុងសហរដ្ឋអាមេរិក៖
១. ទ្រព្យសម្បត្តិរួម
ទ្រព្យសម្បត្តិរួមរបស់មហាសេដ្ឋីទាំង ៦១៤ នាក់របស់សហរដ្ឋអាមេរិកស្មើច្រើនជាង ៣ ទ្រីលានដុល្លារទៅទៀតបន្ទាប់ពីកើនឡើងបាន ៣ប៊ីលានដុល្លារក្នុងពេលដែលមានការផ្ទុះជំងឺកូវីដ ១៩ ។ ក្នុងចំណោមមហាសេដ្ឋីដែលមានទ្រព្យសម្បត្តិច្រើនជាងគេទាំង ១៧០ នាក់ក្នុងសហរដ្ឋអាមេរិក មានមហាសេដ្ឋី ៣៤ នាក់ដែលមើលឃើញទ្រព្យសម្បត្តិកើនឡើងរាប់សិបលានដុល្លារក្នុងឆ្នាំនេះ ។
២. រដ្ឋាភិបាល និងមហាសេដ្ឋី
តាំងពីលោកប្រធានាធិបតី ដូណាល់ ត្រាំ (Donald Trump) ឡើងកាន់តំណែងនៅឆ្នាំ ២០១៧ មក មហាសេដ្ឋីជនជាតិអាមេរិកមានជាងមុន ១០.៦% បើយោងតាមសេចក្តីរាយការណ៍របស់ Business Insider ។ សេចក្តីរាយការណ៍ខាងលើបានឲ្យដឹងទៀតថា ច្បាប់កែទម្រង់ពន្ធរបស់លោកប្រធានាធិបតី ត្រាំ ដើរតួយ៉ាងសំខាន់ក្នុងការបង្កើនទ្រព្យឲ្យអ្នកមានទាំងនេះ ។
៣. មហាសេដ្ឋីដែលមានជាងគេទាំងបីរូបរបស់សហរដ្ឋអាមេរិក
បុរសដែលមានទ្រព្យសម្បត្តិច្រើនជាងគេក្នុងសហរដ្ឋអាមេរិកមានដូចជាលោក ជេហ្វ បេសូស (Jeff Bezos) លោក ប៊ីល ហ្គេតស៍ (Bill Gates) និងលោក វ៉ារេន បាហ្វេត (Warren Buffett) មានទ្រព្យសម្បត្តិស្មើនឹងពាក់កណ្តាលនៃជនជាតិអាមេរិកដែលមានប្រាក់ចំណូលទាបឯណោះ ។ យោងតាមទស្សនាវដ្តី Forbes បានឲ្យដឹងទៀតថា ក្នុងកំឡុងពេល ៤ខែដំបូងក្នុងឆ្នាំនេះ លោក បេសូស បានបង្កើនទ្រព្យខ្លួនប្រមាណ ២៥ប៊ីលានដុល្លារ ៕
ចែករំលែកព័តមាននេះ