សម្រាប់មនុស្សជាច្រើនជុំវិញពិភពលោក ការផ្ទុះជំងឺកូវីដ ១៩ កំពុងតែបង្កការប៉ះពាល់ដល់ការរស់នៅប្រចាំថ្ងៃរបស់ពួកគេកាន់តែធ្ងន់ធ្ងរឡើងពីមួយថ្ងៃទៅមួយថ្ងៃ ។ មនុស្សកាន់តែច្រើនបានបាត់បង់ការងារក្នុងកំឡុងពេលនេះ ហើយមនុស្សកាន់តែច្រើនក៏អាចនឹងធ្លាក់ខ្លួនក្នុងការជាប់បំណុលច្រើនដែរ ។
ប៉ុន្តែស្ថានការបច្ចុប្បន្ននេះមិនអាក្រក់ពេកទេសម្រាប់មនុស្សមួយចំនួនតូច ជាពិសេសមហាសេដ្ឋីក្នុងសហរដ្ឋអាមេរិក ។ វិទ្យាស្ថាន Institute for Policy Studies បានចេញការវិភាគប្រចាំឆ្នាំលើទ្រព្យសម្បត្តិ និងអំណាចនយោបាយរបស់មហាសេដ្ឋីពិភពលោកដែលបានប្រទះឃើញថា ក្នុងកំឡុងពេល ៤ខែដំបូងក្នុងឆ្នាំនេះ ទ្រព្យសម្បត្តិសរុបរបស់មហាសេដ្ឋីជនជាតិអាមេរិកចំនួន ៣៤ នាក់បានកើនឡើងយ៉ាងតិចណាស់ក៏ ១០លានដុល្លារក្នុងមួយនាក់ដែរ ។
ជាទូទៅ ម្ចាស់ភាគហ៊ុន និងនាយកប្រតិបត្តិដូចជាលោក ជេហ្វ បេសូស (Jeff Bezos) និងអ៊ីឡុន ម៉ាស (Elon Musk) មិនពឹងផ្អែកលើប្រាក់ចំណូលដែលបានពីកិច្ចការដែលពួកគេធ្វើទេ មានន័យថាទ្រព្យសម្បត្តិដ៏ច្រើនលើសលប់របស់ពួកគេគឺភាគច្រើនមានប្រភពមកពីប្រាក់ចំណេញពីការវិនិយោគទៅវិញ ។
លើសពីនេះទៅទៀត ដើម្បីជំរុញទឹកចិត្តឲ្យមហាសេដ្ឋីទាំងនេះបន្តវិនិយោគក្នុងសេដ្ឋកិច្ចអាមេរិក រដ្ឋាភិបាលបានកាត់បន្ថយអត្រាពន្ធដែលក្រុមហ៊ុនធំៗ និងមហាសេដ្ឋីត្រូវបង់ទៀតផង ។ ក្នុងកំឡុងពេលមានការផ្ទុះជំងឺកូវីដ ១៩ នេះ អ្នកមានក្នុងសហរដ្ឋអាមេរិកក៏អាចទាញអត្ថប្រយោជន៍បានពីវិធានការរដ្ឋាភិបាលបានដែរ ។
យោងទៅតាមសារព័ត៌មាន New York Times បានឲ្យដឹងថា កញ្ចប់ប្រាក់ជួយសង្គ្រោះក្នុងគ្រាអាសន្នដែលសភាអាមេរិកបានសម្រេចអាចផ្តល់អត្ថប្រយោជន៍ជាច្រើនដល់អ្នកមាន ។ គណៈកម្មាធិការរួមដែលគ្រប់គ្រងពន្ធរបស់សហរដ្ឋអាមេរិកបានព្យាករណ៍ថា ៨០% នៃការកាត់ពន្ធដែលជាផ្នែកនៃវិធានការរដ្ឋាភិបាលក្នុងពេលបច្ចុប្បន្ននេះនឹងផ្តល់អត្ថប្រយោជន៍ដល់មនុស្សដែលរកចំណូលបានច្រើនជាង ១លានដុល្លារប្រចាំឆ្នាំទៅវិញ ។សម្រាប់មហាសេដ្ឋីជនជាតិអាមេរិកចំនួន ៨ រូប ទ្រព្យសម្បត្តិរបស់ពួកគេបានកើនឡើងយ៉ាងតិចណាស់ក៏ ១ប៊ីលានដុល្លារដែរបន្ទាប់ពីមានការផ្ទុះជំងឺកូវី ១៩ កន្លងមក ។
ឧទាហរណ៍ដូចជាលោកអេរិក យាន់ (Eric Yuan) ដែលជានាយកប្រតិបត្តិរបស់ក្រុមហ៊ុន Zoom ជាដើមដែលមើលឃើញទ្រព្យសម្បត្តិកើនឡើងច្រើនជាងទ្វេដងទៅទៀតមកស្មើ ៧.៥៧ប៊ីលានដុល្លារក្នុងកំឡុងពេល ៣ខែកន្លងមកនេះ ។
លោកមហាសេដ្ឋី អ៊ីឡុន ម៉ាស់ ដែលជានាយកប្រតិបត្តិរបស់ Tesla និង SpaceX ក៏រកចំណូលបាន ៨ប៊ីលានដុល្លារតាំងពីខែមីនាមកដែរបន្ទាប់ពីសហការជាមួយនឹងក្រុមហ៊ុនផលិតឧបករណ៍ព្យាបាល ៕
ចែករំលែកព័តមាននេះ