រាជធានីភ្នំពេញ ៖ ការប្រកួតប្រដាល់ដណ្ដើមប្រាក់លាននៅលើសង្វៀនស៊ីអិនស៊ីបិទទ្វារនាថ្ងៃទី២ ឧសភា ខាងមុខនេះ រំពឹងថា នឹងល្អមើលដោយសារវត្តមានកីឡាករ នី សុភី មកពីក្លិបសាលវ័ន្តកីឡា…
រាជធានីភ្នំពេញ ៖ ការប្រកួតប្រដាល់ដណ្ដើមប្រាក់លាននៅលើសង្វៀនស៊ីអិនស៊ីបិទទ្វារនាថ្ងៃទី២ ឧសភា ខាងមុខនេះ រំពឹងថា នឹងល្អមើលដោយសារវត្តមានកីឡាករ នី សុភី មកពីក្លិបសាលវ័ន្តកីឡា ត្រូវគេរៀបចំឱ្យជួបប្រកួតជាមួយកីឡាករពុទ្ធ ឆាយរិទ្ធី មកពីក្លិបពុទ្ធសេរីវង្សពោធិសែនជ័យ ។ សង្ឃឹមថា គូនេះមិនធ្វើឱ្យអ្នកទស្សនានៅតាមកញ្ចក់ទូរទស្សន៍ខកបំណងនោះទេ។
អ្នកប្រដាល់ជើងចាស់ទាំងពីរូបនេះមិនធ្លាប់ជួបគ្នាពីមុនមកទេ សម្រាប់ការជួបគ្នាលើកនេះអត់មានអ្នកណាហ៊ានទាយទុកមុនថាយ៉ាងណានោះទេ ។ ប៉ុន្តែតាំងពីកើតមានរោគឆ្លងកូវីដ-១៩រហូតមក ពុទ្ធ ឆាយរិទ្ធី តែងតែបង្ហាញវត្តមាននៅលើសង្វៀនជាញឹកញាប់បំផុត ។ ម្យ៉ាងវិញទៀតការប្រកួតប៉ុន្មានលើកចុងក្រោយមកនេះគេមិនសូវដែលចាញ់ឡើយ ។
តែកុំអាលអរអីលើកនេះប៉ះចំ នី សុភី អ្នកប្រដាល់ជើងចាស់មានស្នៀតកែងនិងជង្គង់ល្អ ថែមទាំងមានចិត្តអំណត់ទៀតផង ។ ចំណែកពុទ្ធ ឆាយរិទ្ធី ពូកែតែស្នៀតកណ្ដាប់ដៃមួយមុខគត់ ហើយចូលចិត្តប្រើកម្លាំងទៀតផង ។ បើសិនជាគេចង់ផ្ដួល នី សុភី ប្រហែលជាមិនងាយស្រួលនោះទេ។
កីឡាករ សុខ សាវិន មកពីក្លិបប៉ែនកាក់គុនខ្មែរ ត្រូវប្រកួតជាមួយពុទ្ធ សំបូរ មកពីក្លិបពុទ្ធសេរីវង្សពោធិសែនជ័យ ។ អ្នកទាំងពីររូបនេះក៏ជាគូប្រកួតដណ្ដើមប្រាក់លាននៃកម្មវិធីកម្ពុជា សង្វៀនគុនខ្មែរក្នុងសប្ដាហ៍នេះដែរ ។ ទាំងសងខាងសុទ្ធតែមានបំណងចង់ក្លាយជាម្ចាស់ប្រាក់លានដូចគ្នា ក្នុងពេលពួកគេទាំងពីរមិនធ្លាប់ប៉ះគ្នាពីមុនមកទេ ប៉ុន្តែអ្នកតាមដានការប្រកួតភាគច្រើគេមានជំនឿចិត្តលើសុខ សាវិនច្រើនជាងព្រោះកីឡាកររូបនេះមិនត្រឹមតែមានថ្វីដៃប្រកួតល្អនោះទេ សូម្បីតែកម្លាំងក៏រឹងមាំណាស់ដែរ ។ ចំណែកពុទ្ធ សំបូរ ក៏មិនអន់ដែរប៉ុន្តែកីឡាកររូបនេះចិត្តមិនសូវសឿងទាល់តែសោះ។
ទោះបីយ៉ាងណា គេមិនអាចទាយទុកមុនបានទេថាអ្នកណាជាម្ចាស់ប្រាក់លាននោះទេ ។ មួយគូទៀតកីឡាករ សេក គឹមរួន មកពីក្លិបអង្គរមានជ័យ ខេត្តសៀមរាប ត្រូវជួបប្រកួតដណ្ដើមប្រាក់លានជាមួយកីឡាករ ឡុង ប៊េនលឿន មកពីក្លិបសាលវ័ន្តកីឡា៕ (កែសម្រួលដោយ ៖ បុប្ផា)
ចែករំលែកព័តមាននេះ