រាជធានីភ្នំពេញ ៖ ស្ត្រីមេម៉ាយដែលមានកូនរហូត៥នាក់ក្នុងបន្ទុក បានលើកដៃសំពះសុំឱ្យសប្បុរសជនជួយឧបត្ថម្ភ ខណៈដែលនាងកំពុងប្រឈមនឹងការខ្វះខាតចំពោះមុខក្នុងការទិញអាហារចិញ្ចឹមកូន ដោយសារតែបាត់បង់ការងារមិនមានលទ្ធភាពរកប្រាក់កំរៃបាន ។ ស្ត្រីមេម៉ាយរូបនេះធ្លាប់បានធ្វើជាសន្តិសុខយាមរោងចក្រ តែការងារនោះមិនជាប់លាប់ឡើយ គឺធ្វើបានតែមួយរយៈប៉ុណ្ណោះ ហើយពេលនេះនាងត្រូវបានគេបញ្ឈប់ដោយថៅកែប្រាប់ថា គ្មានការងារធ្វើ រោងចក្រត្រូវផ្អាក មិនត្រូវការអ្នកយាមទៀតទេ ។ ដោយសារតែបែបនេះហើយទើបធ្វើឱ្យនាងជួបការលំបាកគ្មានលុយទិញអង្ករដាំបាយឱ្យកូនហូប គ្មានលុយសំរាប់ឱ្យកូនទៅរៀន និងគ្មានលុយថ្លៃជួលផ្ទះទៀតផង ។
ស្ត្រីរូបនេះបាននិយាយថា នាងឈ្មោះឡាំង បុប្ផា អាយុ៣៥ឆ្នាំ មានកូនស្រី៥នាក់ និងមានស្រុកកំណើតក្នុងភូមិភ្នំ ឃុំកំពង់ភ្នំ ស្រុកលើកដែក ខេត្តកណ្តាល ។ ប្តីរបស់នាងឈ្មោះស៊ឺ លីហៀង អាយុ៥៥ឆ្នាំ បានចុះចោលនាងទៅមានស្រីថ្មីទៀត តាំងពីឆ្នាំ២០០៨មកម៉្លេះ ខណៈពេលនោះនាងមានផ្ទៃពោះកូនស្រីពៅ ។ ស្ត្រីរូបនេះបានបន្តទៀតថា ក្រោយពេលប្តីចាកចោលនាងបានចាកចេញពីស្រុកកំណើតមកស្នាក់នៅបន្ទប់លេខ៦ ផ្ទះជួល អគារលេខ៥៤ សួនឧស្សាហកម្មកាណាឌីយ៉ា ភូមិត្រពាំងថ្លឹង សង្កាត់ចោមចៅ ខណ្ឌដង្កោ ដោយធ្វើជាសន្តិសុខយាមរោងចក្រ ។ ស្ត្រីរូបនេះបានបន្តទៀតថា ផ្ទះជួលដែលនាងស្នាក់នៅ១ខែ ១៥ដុល្លារ បូករួមជាមួយថ្លៃទឹក និងថ្លៃភ្លើងផង១ខែអស់ជាង២០ដុល្លារ ប៉ុន្តែដោយសារនាងគ្មានលទ្ធភាពទើបពេលដល់ខែម្តងៗគ្មានលុយឱ្យថ្លៃជួលផ្ទះ ឯម្ចាស់ផ្ទះស្ទើរតែលែងចង់ឱ្យស្នាក់នៅទៅហើយ ។
នៅព្រឹកថ្ងៃទី១៦ វិច្ឆិកា កោះសន្តិភាពបានពាំនាំថវិកាអំណោយចំនួន១០ម៉ឺនរៀលទៅប្រគល់ដល់ស្ត្រីមេម៉ាយរូបនេះ ដើម្បីដោះទ័លមួយគ្រា ដែលពេលទៅដល់នោះ កូនៗរបស់នាងមិនបាននៅជុំគ្នាទេ ។ ប្រាក់អំណោយនេះគឺជាប្រាក់តំកល់របស់លោកវ៉ាន់ សឿន អនុប្រធានក្រុមការងារគណបក្សប្រជាជនកម្ពុជាចុះជួយស្រុកសំរោង ខេត្តតាកែវ និងលោកស្រី ព្រមទាំងបុត្រ ។ លោកបានតំកល់ប្រាក់មនុស្សធម៌ចំនួន១លានរៀល ហើយត្រូវបានកោះសន្តិភាពបែងចែកដល់ជនទីទ័លក្រជាបន្តបន្ទាប់ ដោយគិតទាំងលើកនេះផង នៅសល់២០ម៉ឺនរៀលទៀត ។ កោះសន្តិភាព សូមថ្លែងអំណរគុណចំពោះការបរិច្ចាគប្រាក់មនុស្សធម៌របស់លោកដែលជាកាយវិការគួរឱ្យគោរព ៕
ចែករំលែកព័តមាននេះ