ខេត្តព្រះសីហនុ ៖ បើតាមសេចក្តីរាយការណ៍បឋមបានឱ្យដឹងថា មានករណីគ្រោះថ្នាក់ចរាចរណ៍មួយបានកើតឡើង ខណៈរថយន្តធុនធំមួយគ្រឿងបានបើកជ្រុកចង្កូតទៅបុករះចូលផ្ទះរបស់ប្រជាពលរដ្ឋអស់៣កន្លែង និងឃ្លាំងរថយន្ត១កន្លែងទៀត ព្រមទាំងម៉ូតូរ៉ឺមក់ទៀតផង បង្កឱ្យមានការភ្ញាក់ផ្អើលកាលពីម៉ោងជិត១និង៣០នាទីរសៀល ថ្ងៃទី២៩ ខែមេសា…
ខេត្តព្រះសីហនុ ៖ បើតាមសេចក្តីរាយការណ៍បឋមបានឱ្យដឹងថា មានករណីគ្រោះថ្នាក់ចរាចរណ៍មួយបានកើតឡើង ខណៈរថយន្តធុនធំមួយគ្រឿងបានបើកជ្រុកចង្កូតទៅបុករះចូលផ្ទះរបស់ប្រជាពលរដ្ឋអស់៣កន្លែង និងឃ្លាំងរថយន្ត១កន្លែងទៀត ព្រមទាំងម៉ូតូរ៉ឺមក់ទៀតផង បង្កឱ្យមានការភ្ញាក់ផ្អើលកាលពីម៉ោងជិត១និង៣០នាទីរសៀល ថ្ងៃទី២៩ ខែមេសា ឆ្នាំ២០២០ នៅផ្លូវបេតុង ចុះចំណោតឃ្លាំងលើ ស្ថិតក្នុងសង្កាត់លេខ៤ ក្រុងព្រះសីហនុ ។
សមត្ថកិច្ចបានឱ្យដឹងថា ម្ចាស់ផ្ទះរងគ្រោះខាងលើមាន ផ្ទះទី១- ជាផ្ទះជួសជុលម៉ូតូ មានម្ចាស់ឈ្មោះ ចាន់ ឃឹមស្រី អាយុ៣៩ឆ្នាំ ខូចខាតផ្ទះ និងខូចខាតម៉ូតូចំនួន៣គ្រឿង ។ ផ្ទះទី២- ផ្ទះលក់នំប៉័ង ម្ចាស់ផ្ទះឈ្មោះខុន ស្រីវន អាយុ២០ឆ្នាំ ខូចខាតផ្ទះ និងខូចខាតទូដាក់នំ។ ផ្ទះទី៣- ផ្ទះជួល មានម្ចាស់ផ្ទះឈ្មោះ ឆាង ហ្វុង ខូចខាតសម្ភារៈមួយចំនួន និងទី៤- ជាឃ្លាំងដាក់រថយន្ត ខូចខាតឃ្លាំង និងខូចខាតទូកុងតឺនរ័១គ្រឿង ។ ចំណែករថយន្តបង្កខាងលើជាប្រភេទធុនធំ ពាក់ស្លាកលេខព្រះសីហនុ 3A-3000 ក្រោយកើតហេតុអ្នកបើកបររត់គេចខ្លួនបាត់ស្រមោល ចំណែកអ្នករួមដំណើរក្នុងរថយន្តនោះឈ្មោះ ចាប ម៉ាក់ ភេទប្រុស អាយុ៦០ឆ្នាំ។
ប្រភពដដែលបន្តទៀតថា មុនពេលកើតហេតុ គេឃើញមានរថយន្តធុនធំមួយគ្រឿង បានបើកជ្រុលទៅបុករះចូលផ្ទះប្រជាពលរដ្ឋចំនួន៣កន្លែង និងឃ្លាំងរថយន្តមួយកន្លែងទៀត នៅតាមផ្លូវបេតុងចុះពីចំណោតឃ្លាំងលើមកអូ២ បណ្តាលឱ្យអ្នករួមដំណើរលើរថយន្តម្នាក់រងរបួសមធ្យម និងប្រជាពលរដ្ឋខ្លះទៀតដែលជាម្ចាស់ផ្ទះខាងលើរងរបួសតិចតួច ប៉ុន្តែមិនបណ្តាលឱ្យមនុស្សណាម្នាក់រងគ្រោះថ្នាក់ដល់ជីវិតនោះទេ ។
ប្រភពដដែលបន្តថា រថយន្តបង្កខាងលើត្រូវបានគេសង្ស័យថា ទំនងជាដាច់ហ្វ្រាំងហើយ ទើបបណ្តាលឱ្យបុករះផ្ទះប្រជាពលរដ្ឋ ឃ្លាំង និងម៉ូតូរ៉ឺម៉ក់បែបនេះតែម្តង ។
ក្រោយពេលកើតហេតុ អ្នកបើករថយន្តបង្កបានរត់គេចខ្លួនបាត់ ហើយពាក់ព័ន្ធនឹងករណីនេះ សមត្ថកិច្ចបានធ្វើការដោះស្រាយតាមនីតិវិធីហើយ៕ (កែសម្រួលដោយ ៖ បុប្ផា)
ចែករំលែកព័តមាននេះ