ការផ្ទុះនូវជំងឺកូវីដ ១៩ កំពុងតែផ្លាស់ប្តូរការរស់នៅប្រចាំថ្ងៃរបស់មនុស្សជុំវិញពិភពលោក ហើយវាក៏បានបង្កការប៉ះពាល់ដល់ការប្រកបការងារ និងអាជីវកម្មផងដែរ ។ បញ្ហាធំមួយក្រៅពីធ្វើឲ្យអាជីវកម្មជាច្រើនខាតបង់ប្រាក់ចំណូលគឺ វាប៉ះពាល់ដល់ប្រសិទ្ធិភាពការងាររបស់អ្នកធ្វើការ ជាពិសេសនៅពេលដែលអ្នកជួបនូវព័ត៌មានមិនល្អលើប្រព័ន្ធសង្គមជារៀងរាល់ថ្ងៃក្រោមប្រធានបទកូវីដ ១៩នេះ ។
ខាងក្រោម គឺជាគន្លឹះងាយៗដែលអ្នកអាចអនុវត្តបានដោយខ្លួនឯងដើម្បីបង្កើនប្រសិទ្ធិភាពការងារ និងអាចរកលុយបានដោយមិនចេះហត់នឿយ ៖
១. កំណត់គោលដៅច្បាស់លាស់
ទោះជាការរស់នៅប្រចាំថ្ងៃរបស់អ្នកមានការផ្លាស់ប្តូរពិតមែនក្តី អ្នកមិនគួរអនុញ្ញាតឲ្យវាប៉ះពាល់ដល់គោលដៅដែលអ្នកចង់សម្រេចសម្រាប់ខ្លួនឯងទេ ។ ដូច្នេះអ្នកគួរតែយកពេលវេលាមកគិតឡើងវិញនូវអ្វីដែលអ្នកចង់សម្រេចក្នុងថ្ងៃនេះ សប្តាហ៍នេះ និងខែនេះ ។ ការធ្វើដូច្នេះជួយឲ្យអ្នកយកចិត្តទុកដាក់លើការងារ និងចៀសវាងការរំខានអារម្មណ៍ដែលប៉ះពាល់ដល់ការងារអ្នក ។
២. ឈប់អានព័ត៌មានមិនល្អ
វាមិនមែនមានន័យថាអ្នកត្រូវឈប់ទទួលយលព័ត៌មានទាំងស្រុងទេ តែអ្នកគួរតែកំណត់ពេលវេលាច្បាស់លាស់សម្រាប់ការអានព័ត៌មាន មិនមែនអង្គុយអានវារាប់ម៉ោងក្នុងមួយថ្ងៃ និងទុកការងារអ្នកចោលទេ ។ ឧទាហរណ៍ដូចជា បន្ទាប់ពីបញ្ចប់កិច្ចការចំនួន ៤ មុខហើយ អ្នកអាចបើកប្រព័ន្ធសង្គម ១៥នាទីដើម្បីសម្រាកជាដើម ។
៣. បង្កើតទម្លាប់ល្អៗ
ជាទូទៅ ទម្លាប់គឺជាចំណុចសំខាន់ប្រសិនបើអ្នកចង់ធ្វើការដោយមានប្រសិទ្ធិភាពជាពិសេសប្រសិនបើអ្នកមានអ្វីដែលរំខានច្រើននៅជុំវិញខ្លួន ។ ពេលដែលអ្នកមានទម្លាប់ល្អហើយ រាងកាយរបស់អ្នកនឹងដំណើរការដោយខ្លួនឯង ហើយអ្នកអាចសម្រេចបានកិច្ចការច្រើនទោះដោយមិនចាំបាច់ចំណាយពេលបញ្ចុះបញ្ចូលខ្លួនឯងយូរផងដែរ ។
៤. វាយតម្លៃខ្លួនឡើងវិញ
មុនពេលចូលដំណេក អ្នកគួរតែវាយតម្លៃលើខ្លួនឡើងវិញដើម្បីមើលដឹងថាតើអ្នកបានសម្រេចនូវកិច្ចការដែលអ្នកមានគម្រោងសម្រេចក្នុងថ្ងៃនោះ ឬនៅ ។ ការគូសកិច្ចការដែលបានសម្រេចចោលចេញពីបញ្ជីកិច្ចការដែលត្រូវបំពេញផ្តល់នូវកម្លាំងចិត្តដ៏ខ្លាំងដល់មនុស្ស ៕
ចែករំលែកព័តមាននេះ