ខេត្តក្រចេះ ៖ មន្ត្រីមន្ទីរទេសចរណ៍ខេត្តក្រចេះបានថ្លែងប្រាប់ឲ្យដឹងថា ក្រោយស្ថានភាពជម្ងឺកូវីដ-១៩ បាននឹងកំពុងតែស្ថិតក្នុងសភាពធូរស្រាលវិញទៅហើយនោះ ស្ថានភាពអ្នកធ្វើដំណើរ និងអ្នកទេចសចរណ៍ដែលបានធ្វើដំណើរទៅលេងកំសាន្តនៅតាមតំបន់ទេសចរណ៍នានាក្នុងខេត្តក្រចេះ ហាក់ដូចជាមានអត្រាកើនឡើងវិញបន្តិច ក្នុងអំឡុងមួយរយៈពេលមួយសប្តាហ៍ចុងក្រោយនេះ។
ប្រធានមន្ទីរទេសចរណ៍ខេត្ត លោក ជួប រតនា បានថ្លែងប្រាប់ឲ្យដឹងនៅថ្ងៃទី២៩ ខែមេសា នេះថា ស្ថានភាពភ្ញៀវទេសចរទាំងនៅក្នុងខេត្តនិងនៅក្រៅខេត្ត បានមកលេងកំសាន្តនៅតាមតំបន់រមណីយដ្ឋានទេសចរណ៍នានាក្នុងខេត្ត ក្នុងអត្រាកើនឡើងវិញបន្តិចចាប់ពីក្រោយថ្ងៃបុណ្យចូលឆ្នាំរហូត មកទល់និងពេលនេះ។
តំបន់ទេសចរណ៍ក្នុងខេត្តក្រចេះ ដែលកំពុងតែទាក់ទាញភ្ញៀវឲ្យទៅលេងកំសាន្តនោះ ភាគច្រើន ផ្តោតសំខាន់លើតំបន់អន្លង់ផ្សោត តំបន់ទឹកជួរទន្លេមេគង្គកាំពី និងតំបន់ទេសចរណ៍ ប្រវត្តិសាស្ត្រវត្តសរសរ១០០ ដែលតំបន់ទេសចរណ៍ទាំងបីខាងលើនេះគឺស្ថិត នៅលើផ្លូវតែមួយ មានទីតាំងប្រ៉ប និងដងទន្លេមេគង្គខេត្តក្រចេះ។
លោកជួប រតនា បានបញ្ជាក់ថា បើទោះបីជាអត្រាភ្ញៀវហាក់មានសន្ទុះបន្តិចក្រោយពីស្ងប់ស្ងាត់ អស់មួយរយៈពេលយ៉ាងណាក្តី តែដើម្បីបង្ការទប់ស្កាត់ប្រឆាំងនិងជម្ងឺឆ្លងជាសកលមួយនេះ អាជ្ញាធរ ពិសេសមន្ត្រីទេសចរណ៍ដែលនៅប្រចាំការតាមតំបន់ ទេសចរណ៍គោលដៅគឺនៅតែបន្តជម្រុញឲ្យ ភ្ញៀវប្រើម៉ាស់ លាងដៃនិងអាល់កុល ព្រមទាំងការនៅគម្លាតពីគ្នានៅរាល់ការជួបជុំ។
តាមរបាយការណ៍របស់មន្ទីរទេសចរណ៍ខេត្តក្រចេះបានឲ្យដឹងថា ចំនួនភ្ញៀវចូលមកទស្សនា លេងកម្សាន្តនៅក្នុងខេត្តនេះគិតចាប់ពីថ្ងៃទី១ខែមេសា មកដល់ចុងខែមេសា គឺមានចំនួនត្រឹមតែ៤ពាន់នាក់តែប៉ុណ្ណោះ ខណៈចំនួននេះបើប្រៀបធៀបនឹងឆ្នាំទៅដែលមានចំនួនរហូតដល់១៤ម៉ឺននាក់ គឺឃើញថាមានគម្លាតគ្នាយ៉ាងច្រើន ៕ (កែសម្រួលដោយ ៖ ធីតា)
ចែករំលែកព័តមាននេះ