ខេត្តស្វាយរៀង ៖ បើតាមសេចក្តីរាយការណ៍បានឱ្យដឹងថា មានអគ្គិភ័យមួយឆាបឆេះជញ្ជ្រាំងស្រូវ រហូតរាលដាលដល់ផ្ទះទៀត ធ្វើឱ្យប្រជាពលរដ្ឋមានការភ័យស្លន់ស្លោរយ៉ាងខ្លាំង តែសំណាងល្អត្រូវបានសមត្ថកិច្ចហៅរថយន្តពន្លត់អគ្គិភ័យមកជួយពន្លត់បានទាន់ពេល គ្រាន់តែឆេះខូចខាតតិចតួចប៉ុណ្ណោះ បង្កឲ្យមានការភ្ញាក់ផ្អើលកាលពីម៉ោង២និង១៥នាទីរសៀល ថ្ងៃទី២៨…
ខេត្តស្វាយរៀង ៖ បើតាមសេចក្តីរាយការណ៍បានឱ្យដឹងថា មានអគ្គិភ័យមួយឆាបឆេះជញ្ជ្រាំងស្រូវ រហូតរាលដាលដល់ផ្ទះទៀត ធ្វើឱ្យប្រជាពលរដ្ឋមានការភ័យស្លន់ស្លោរយ៉ាងខ្លាំង តែសំណាងល្អត្រូវបានសមត្ថកិច្ចហៅរថយន្តពន្លត់អគ្គិភ័យមកជួយពន្លត់បានទាន់ពេល គ្រាន់តែឆេះខូចខាតតិចតួចប៉ុណ្ណោះ បង្កឲ្យមានការភ្ញាក់ផ្អើលកាលពីម៉ោង២និង១៥នាទីរសៀល ថ្ងៃទី២៨ ខែមេសា ឆ្នាំ២០២០ ស្ថិតនៅភូមិចុងព្រែក សង្កាត់ស្វាយរៀង ។
បើតាមសមត្ថកិច្ចឱ្យដឹងថា ករណីខាងលើដែលបង្កឱ្យមានភ្លើងឆាបឆេះនេះ គឺសង្ស័យថា អាចមកមានមនុស្សដុតសំរាម ទើបរាលដាលឆេះជញ្ជ្រាំងស្រូវ រួចបន្តរហូតដល់ឆេះផ្ទះពលរដ្ឋ តែនេះសំណាងហើយដែលសមត្ថកិច្ចបានចុះជួយអន្តរាគមន៍បាញ់ទឹកពន្លត់ទាន់ពេលវេលា គ្រាន់តែឆេះរបងផ្ទះ ឆេះបង្គន់ និងដំណាំរបស់ប្រជាពលរដ្ឋបន្តិបន្តួចប៉ុណ្ណោះ។
សមត្ថកិច្ចបន្តថា ក្នុងការចុះអន្តរាគមន៍នេះ ឃើញមានវត្តមានលោកណុប ចំរើន អភិបាលក្រុងស្វាយរៀង បានដឹកនាំកម្លាំងអធិការដ្ឋាននគរបាលក្រុង កងរាជអាវុធហត្ថក្រុង ហើយបានប្រើប្រាស់រថយន្តពន្លត់អគ្គិភ័យចំនួន៥គ្រឿង ទើបអាចគ្រប់គ្រងសភាពការណ៍បាន។
សមត្ថកិច្ចបន្តទៀតថា ចំពោះការខូចខាតមិនបណ្តាលឱ្យខូចខាតដល់ផ្ទះខ្លាំងនោះទេ គ្រាន់តែឆេះរបង ឆេះដើមឈើ និងបង្គន់១ខ្នង និងដំណាំបន្តិចបន្តួចនៅខាងក្រោយផ្ទះពលរដ្ឋប៉ុណ្ណោះ។
ហើយកន្លងលោក ម៉ែន វិបុល អភិបាលខេត្ត ក៏ធ្លាប់បានអំពាវនាវដល់បងប្អូនប្រជាពលរដ្ឋត្រូវមានការប្រុងប្រយ័ត្នខ្ពស់ចំពោះភ្លើងធូក ភ្លើងទាន ភ្លើងអគ្គិសនីជាដើម ដែលបង្កឱ្យងាយឆាបឆេះជាអគ្គិភ័យ និងសូមឱ្យបងប្អូនពលរដ្ឋ ប្រុងប្រយ័ត្ននូវដែលមានភ្លៀងផ្គរ រន្ទះ និងខ្យល់កន្ត្រាក់ ហើយត្រូវបិទទូរស័ព្ទ ទូរទស្សន៍វិទ្យុនៅពេលដែលមានភ្លៀងផ្គរ និងត្រូវរកកន្លែងទីទួលសុវត្ថិភាពផងដែរ៕ (កែសម្រួលដោយ ៖ បុប្ផា)
ចែករំលែកព័តមាននេះ