ខេត្តបាត់ដំបង ៖ សន្តិសុខប្រចាំសាកលវិទ្យាល័យមួយកន្លែង ត្រូវបានគេប្រទះឃើញសាកសព កាលពីវេលាម៉ោង៥ និង៥នាទីល្ងាចថ្ងៃទី២៧ មេសា នៅក្នុងបរិវេណនៃសាកលវិទ្យាល័យ ស្ថិតនៅភូមិចំការសំរោង២ សង្កាត់ចំការសំរោង…
ខេត្តបាត់ដំបង ៖ សន្តិសុខប្រចាំសាកលវិទ្យាល័យមួយកន្លែង ត្រូវបានគេប្រទះឃើញសាកសព កាលពីវេលាម៉ោង៥ និង៥នាទីល្ងាចថ្ងៃទី២៧ មេសា នៅក្នុងបរិវេណនៃសាកលវិទ្យាល័យ ស្ថិតនៅភូមិចំការសំរោង២ សង្កាត់ចំការសំរោង ក្រុងបាត់ដំបង បង្កឱ្យភ្ញាក់ផ្អើលនិងបានរាយការណ៍ទៅសមត្ថកិច្ចចុះ
ពិនិត្យ ។
អធិការក្រុងបាត់ដំបង លោកឆាង វណ្ណឆៃ បានប្រាប់ឱ្យដឹងថា ជនរងគ្រោះខាងលើ ឈ្មោះ យឿន យ៉ុង អាយុ៥៨ឆ្នាំ រស់នៅភូមិជ្រៃកោង សង្កាត់ស្លាកែត ក្រុងបាត់ដំបង ។ គាត់ធ្វើជាសន្តិសុខយាមនៅសាកលវិទ្យាល័យនេះ ។ លោកអធិការរូបនេះបាននិយាយថា ប្រធានការិយាល័យរដ្ឋបាលនៃសាកលវិទ្យាល័យ ឈ្មោះឈឿន រឿន ភេទប្រុស អាយុ៣៨ឆ្នាំ ដែលជាអ្នកប្រទះឃើញសាកសពសន្តិសុខរូបនេះដំបូងគេ នៅពេលគាត់ទៅលេងបាល់នៅទីនោះ។
បើតាមការពិនិត្យជាក់ស្ដែង សន្តិសុខឈ្មោះយឿន យ៉ុង បានដេកស្លាប់លើអង្រឹង ដោយមានខ្សែចំណង
រឹត.ក នៅក្នុងរោងខាងក្រោយសាកលវិទ្យាល័យ (ក្នុងបរិវេណសាកលវិទ្យល័យ) ដែលគេសង្ស័យជាបឋមថា ជនរងគ្រោះធ្វើឡើងខ្លួនឯង ដោយប្រើវិធីចង.ក ។ បើតាមក្រុមគ្រួសារថា គាត់ទំនងជាមានវិបត្តិក្នុងក្រុមគ្រួសារ ដែលមានប្រវត្តិជូរចត់បន្សល់ទុកកាលពីប៉ុន្មានឆ្នាំមុន រឿងប្រពន្ធធ្លាប់លួចផិតក្បត់ ។
ពាក់ព័ន្ធនឹងការប្រទះឃើញសាកសពសន្តិសុខខាងលើនេះ បើតាមលោកឈឿន វឿន ប្រធានការិយាល័យរដ្ឋបាលនៃសាកលវិទ្យាល័យដែលសមត្ថកិច្ចបានស្រង់សំដីបានប្រាប់សមត្ថកិច្ចថា ពេលដែលលោកចេញទៅលេងបាល់នៅខាងក្រោយសាកលវិទ្យាល័យតាមផ្លូវក្រោយ លោកបានឃើញសន្តិសុខឈ្មោះ យឿន
យ៉ុង ដេកលើអង្រឹង តែលោកមិនបានចាប់អារម្មណ៍ថា គាត់យ៉ាងណាទេ ក៏ដើរហួសទៅមើលឃ្លាំង ។ ប៉ុន្តែពេលដើរត្រលប់មកវិញឃើញឈ្មោះ យឿន យ៉ុង ដេកដូចខុសប្រក្រតី ខ្លួនក៏ដើរទៅមើលស្រាតែឃើញគាត់ដេកអត់ដកដង្ហើម ហើយមានហូរឈាមចេញតាមមាត់ និង ឃើញមានខ្សែភ្លើង (ខ្សែណិតវើក) ដែលទុកចោលចងជាប់នឹងករបស់គាត់ ទើបដឹងថា គាត់ស្លាប់ ។
លោកបានរត់ទៅហៅកូនចៅបីនាក់ទៀត ឱ្យមកជួយមើល និងបានរាយការណ៍ប្រាប់ទៅសមត្ថកិច្ចមូលដ្ឋានឲ្យដឹងតែម្តងទៅ។ជាមួយនឹងការស្លាប់របស់សន្តិសុខរូបនេះ បុរសម្នាក់ឈ្មោះ ចាន់ ពិសិដ្ឋ អាយុ៣១ឆ្នាំ ដែលត្រូវសមត្ថកិច្ចដកស្រង់សំដីដែរថា ប្រហែល៥ឆ្នាំមុន ឪពុកក្មេកខ្លួនធ្លាប់មានវិបត្តិផ្លូវចិត្តយ៉ាងធ្ងន់ធ្ងរ ដោយសារប្រពន្ធគាត់ផិតក្បត់។ ចាប់តាំងពីពេលនោះមក គាត់ហាក់មានវិបត្តិផង និងមានជំងឺរ៉ាំរៃប្រចាំកាយផង ។
កូនប្រសាររូបនិយាយថា គាត់តែងផឹកស្រារាល់ថ្ងៃមិនដែល បានហូបបាយទេ តែក្រោយមក គាត់បានផ្អាកផឹកបានប្រហែលកន្លះឆ្នាំកន្លងទៅនេះ។ ប៉ុន្តែស្រាប់តែមកដល់ថ្ងៃចូលឆ្នាំខ្មែរឆ្នាំនេះ នៅសុខៗគាត់ហាក់បានចាប់ផ្ដើមផឹកស្រាឡើងវិញ ហើយតែងឮគាត់រអ៊ូរទាំថា ពិបាកដកដង្ហើម ។ លុះនៅល្ងាចថ្ងៃកើតហេតុ ស្រាប់តែមានគេប្រាប់ថា ឪពុកក្មេករបស់ខ្លួនបានចង់.កសម្លាប់ខ្លួននៅសាកលវិទ្យល័យល័យកន្លែងធ្វើការ ទើបមានការភ្ញាក់ផ្អើលតែម្ដង។
មន្ត្រីមូលដ្ឋានរួមទាំងមន្ត្រីជំនាញបច្ចេកទេសផង បានចុះទៅកាន់ទីកន្លែងកើតហេតុភ្លាមៗ ក្រោយពេលទទូលបាននូវព័ត៌មាននេះ ដើម្បីពិនិត្យទីតាំងនិងសាកសពជនរងគ្រោះ។ សមត្ថកិច្ចបាននិយាយថា បើយោងលើមន្ត្រីផ្នែកបច្ចេកទេស ដែលបានពិនិត្យយ៉ាងល្អិតល្អន់លើសាកសព គឺគេបានធ្វើការសន្និដ្ឋានជាបឋមថា ជនរងគ្រោះបានស្លាប់ដោយការធ្វើអត្តឃាត តាមរយ:ប្រើប្រាស់ខ្សែចង.ក ។ ប៉ុន្តែមូលហេតុ នៃការធ្វើអត្តឃាតនេះ គេបានយោងទៅលើការបំភ្លឺនានាពីក្រុមគ្រួសារជនរងគ្រោះ ដែលគេសង្ស័យថា ទំនងដោយសារតែសន្តិសុខរូបនេះមានវិបត្តិផ្លូវចិត្ត រឿងប្រពន្ធផិតកាលពីប៉ុន្មានឆ្នាំមុន គូបផ្សំនឹងជំងឺរ៉ាំរៃប្រចាំកាយរបស់គាត់ផងដែរ។
ចែករំលែកព័តមាននេះ