រាជធានីភ្នំពេញ ៖ បុរសជនជាតិចិនម្នាក់ជាអ្នកបើករថយន្តបានរងរបួសដៃក្នុងជម្លោះជាមួយបុរសជនជាតិខ្មែរជាអ្នកបើករ៉ឺម៉កម៉ូតូកង់រឿងចុចស៊ីផ្លេ និងបើកកៀរ ដោយបុរសជាអ្នកបើករ៉ឺម៉កម៉ូតូកង់បីអះអាងថា ភាគីខាងរថយន្តចុចស៊ីផ្លេ ហើយកៀរកង់បីរបស់គាត់ រួចបើកទ្វារថយន្តមកជេរ និងវាយគាត់ បណ្តាលរងរបួសស្រាល និងរហែកអាវ ភ្លាមៗនោះគាត់យកទួណឺវីសមកចាក់ចំដៃខាងឆ្វេងរបស់អ្នកបើករថយន្ត បណ្តាលឱ្យរបួសហូរឈាម ចំណែកភាគីខាងអ្នកបើកបររថយន្តបានអះអាងថា គាត់ឃើញម៉ូតូកង់បីនោះបើកចូលកៀររថយន្តរបស់គាត់ ទើបគាត់ចុចស៊ីផ្លេ ស្រាប់តែអ្នករត់កង់បីបានជិះមកជេរគាត់រហូត ទើបគាត់ឈប់រថយន្តដើម្បីសួរនាំ បែរជាអ្នករត់ម៉ូតូកង់បីយកទួណឺវីសមកចាក់ដៃគាត់តែម្តង ។
ហេតុការណ៍ខាងលើនេះបង្កការភ្ញាក់ផ្អើលកើតឡើងកាលពីវេលាម៉ោង៦និង៣០នាទីយប់ថ្ងៃទី២៨ ខែមេសា ឆ្នាំ២០២០ នៅចំណុចក្បែរនឹងស្ថានីយ៍ទូរទស្សន៍មួយកន្លែង តាមបណ្តោយផ្លូវជាតិលេខ៥ ស្ថិតក្នុងសង្កាត់គីឡូម៉ែត្រលេខ៦ ខណ្ឌឬស្សីកែវ ។
ភាគីខាងអ្នកបើករ៉ឺម៉កម៉ូតូកង់បីឈ្មោះអែម សម្បត្តិ ភេទប្រុស អាយុ៥១ឆ្នាំ មុខរបររត់រ៉ឺម៉កម៉ូតូកង់បី ស្នាក់នៅម្តុំផ្សារថ្មី បានឲ្យដឹងថា មុនពេលកើតហេតុ គាត់បានបើកម៉ូតូកង់បីដឹកភ្ញៀវមកពីគីឡូលេខ៩ រួចហើយត្រឡប់មកវិញ ។
តាមប្រភពដដែលបានបន្តថា លុះពេលគាត់ធ្វើដំណើរមកដល់ផ្លូវភ្លោះគីឡូលេខ៦ ស្រាប់តែមានរថយន្តមួយគ្រឿងប្រភេទមួយបាំងកន្លះ ពណ៌ទឹកប្រាក់ ពាក់ស្លាកលេខ ភ្នំពេញ ២W-៨០១៩ បើកបរតាមបណ្តោយផ្លូវជាតិលេខ៥ ក្នុងទិសដៅពីជើងទៅត្បូងស្របទិសដៅគ្នា បានបើករថយន្តកៀររ៉ឺម៉កម៉ូតូកង់បីរបស់គាត់ ហើយចុចស៊ីផ្លេមិនអោយគាត់បើកវ៉ានោះទេ រហូតមកដល់ចំណុចកើតហតុខាងលើនោះ ស្រាប់តែអ្នកបើករថយន្តបានឈប់រថយន្ត ហើយបើកទ្វារថយន្តមកជេរ និងវាយគាត់ បណ្តាលរងរបួសស្រាល និងរហែកអាវ ភ្លាមៗនោះគាត់យកទួណឺវីសមកចាក់ចំដៃខាងឆ្វេង បណ្តាលឱ្យអ្នកបើករថយន្តរងរបួសហូរឈាម ទើបបង្កការភ្ញាក់ផ្អើលដល់បងប្អូនប្រជាពលរដ្ឋនាំគ្នាចោមរោមមើល ។
ចំណែកភាគីខាងបុរសជាអ្នកបើករថយន្តមិនស្គាល់អត្តសញ្ញាណនោះទេ គ្រាន់តែដឹងថាជាជនជាតិចិនចេះនិយាយភាសាខ្មែរតិចៗបានឲ្យដឹងថា គាត់បើករថយន្តដឹកប្រពន្ធនិងកូនមានគ្នាទាំងអស់៤នាក់ ។ នៅពេលធ្វើដំណើរតាមផ្លូវ គឺគាត់ឃើញភាគីខាងរ៉ឺម៉កម៉ូតូកង់បីនោះបើកចូលកៀររថយន្តរបស់គាត់ ទើបគាត់ចុចស៊ីផ្លេ ស្រាប់តែអ្នករត់រ៉ឺម៉កម៉ូតូកង់បីនេះបានជិះមកជេរគាត់រហូត ទើបគាត់ឈប់រថយន្តដើម្បីសួរនាំ បែរជាអ្នករត់រ៉ឺម៉កម៉ូតូកង់បីយកកូនទួណឺវីសមកទៅចាក់លើគាត់តែម្តង ។
ក្រោយពេលកើតហេតុ ភាគីខាងអ្នកបើកបររថយន្តបានទៅដាក់ពាក្យបណ្តឹងនៅប៉ុស្តិ៍រដ្ឋបាលនគរបាលគីឡូម៉ែត្រលេខ៦ដើម្បីឃាត់ខ្លួនអ្នករត់រ៉ឺម៉កម៉ូតូកង់បីចាត់ការតាមនីតិវិធី ៕ (កែសម្រួលដោយ ៖ ធីតា)
ចែករំលែកព័តមាននេះ