ខេត្តសៀមរាប ៖ ប្រជាពលរដ្ឋដែលនាំគ្នាទិញផ្លែគុយ និងផ្លែសិរមាន់ តពីអ្នកបេះនៅលើភ្នំគូលែន និងក្នុងរមណីដ្ឋានអង្គរ បាននាំគ្នាត្អូញត្អែរថា លក់មិនសូវដាច់ដូចឆ្នាំមុនៗនោះទេ ព្រោះអ្នកខ្លះខ្លាចកូវីដ១៩។ បើតាមអ្នកស្រី…
ខេត្តសៀមរាប ៖ ប្រជាពលរដ្ឋដែលនាំគ្នាទិញផ្លែគុយ និងផ្លែសិរមាន់ តពីអ្នកបេះនៅលើភ្នំគូលែន និងក្នុងរមណីដ្ឋានអង្គរ បាននាំគ្នាត្អូញត្អែរថា លក់មិនសូវដាច់ដូចឆ្នាំមុនៗនោះទេ ព្រោះអ្នកខ្លះខ្លាចកូវីដ១៩។
បើតាមអ្នកស្រី ផល្លី រស់នៅស្រុកអង្គរធំ បានរៀបរាប់ប្រាប់ថា រូបគាត់បានទិញផ្លែគុយពីបងប្អូនប្រជាពលរដ្ឋនៅលើភ្នំគូលែន ខណៈដែលពួកគាត់ដើរបេះនៅក្នុងព្រៃយកមកលក់ឱ្យគាត់ ដោយក្នុង១គីឡូតម្លៃ២០០០រៀល។ ក្រោយរូបគាត់ក៏យកផ្លែគុយនោះទៅលក់នៅផ្សារលើធំថ្មីក្នុងក្រុងសៀមរាបវិញ មុនដំបូងបាន១គីឡូតម្លៃ២៣០០០រៀល និង១ចង្កោម លក់បាន១២០០០រៀល លុះដល់ពេលមានផ្ទុះរឿងកូវីដ១៩ ចូលស្រុកខ្មែរមក ស្រាប់តែការលក់ផ្លែគុយនោះធ្លាក់ដល់កំពូល គឺលក់បានក្នុង១គីឡូ តែ៨០០០រៀល និង១ចង្កោម តម្លៃ៥០០០រៀលតែប៉ុណ្ណោះ។
បើតាមអ្នកស្រី ភិរម្យ រស់នៅស្រុកប្រាសាទបាគង បានរៀបរាប់ថា គាត់បានទិញផ្លែគុយ និងផ្លែសិរមាន់ ពីផ្សារលើធំថ្មី ដើម្បីយកមកដាក់លក់បន្តនៅតាមដងផ្លូវជាតិលេខ៦ ព្រោះនៅជិតផ្ទះ ដើម្បីងាយស្រួលដាំបាយឱ្យប្តីដែលមកពីធ្វើចំការផង និងមើលថែទាំកូនផង។
អ្នកស្រីបន្តថា គាត់ទិញផ្លែគុយពីគេក្នុង១ចង្កោមតម្លៃ៣៥០០រៀល ឬ៤០០០រៀល តាមល្អ ឬល្មម ហើយយកមកលក់បន្តក្នុង១ចង្កោមតម្លៃ៨០០០រៀលទៅ១០០០០រៀល តាមអ្នក តថ្លៃ ឬអ្នកមិន.តថ្លៃ និយាយរួម គឺចំណេញតិចតួច គ្រាន់បានចិញ្ចឹមកូន និងទិញម្ហូបតែប៉ុណ្ណោះ។
ចំណែកផ្លែសិរមាន់វិញ ទិញក្នុង១គីឡូតម្លៃ៤៥០០រៀល លក់វិញតម្លៃ៦០០០រៀលនោះទេ។
ចំណែកអុំស្រី ដែលរស់នៅមុខប្រាសាទអង្គរវត្ត ក្នុងភូមិត្រពាំងសេះ សង្កាត់គោកចក បានរៀបរាប់ថា គាត់ទិញពីបងប្អូនយើងនៅក្នុងអង្គរ ដែលពួកគាត់ដើរបេះនៅក្នុងព្រៃឧទ្យានអង្គរ យកមកលក់ឱ្យគាត់ក្នុង១ចង្កោមតម្លៃ៣០០០រៀល លុះដល់ពេលរូបគាត់យកមកចងលក់វិញ គឺបានក្នុង១ចង្កោម តម្លៃ១២០០០រៀលប៉ុណ្ណោះ។
សូមបញ្ជាក់ផងដែរថា ផ្លែគុយ និងផ្លែសិរមាន់ មាននៅក្នុងខែកុម្ភៈ រហូតដល់ខែមេសា ឆ្នាំ២០២០នេះ៕ (កែសម្រួលដោយ ៖ បុប្ផា)
ចែករំលែកព័តមាននេះ