រាជធានីភ្នំពេញ ៖ គឹម វាសនា មកពីក្លិបកងទ័ពពិសេសឆត្រយោង៩១១ បង្ហាញអារម្មណ៍សោកស្ដាយយ៉ាងខ្លាំង បន្ទាប់ពីចាញ់ពុទ្ធ ឆាយរិទ្ធី ដោយពិន្ទុក្នុងជំនួបកម្មវិធីអធិរាជគុនខ្មែររេដអាននៅលើសង្វៀនទូរទស្សន៍ស៊ីអិនស៊ី កាលពីថ្ងៃអាទិត្យ…
រាជធានីភ្នំពេញ ៖ គឹម វាសនា មកពីក្លិបកងទ័ពពិសេសឆត្រយោង៩១១ បង្ហាញអារម្មណ៍សោកស្ដាយយ៉ាងខ្លាំង បន្ទាប់ពីចាញ់ពុទ្ធ ឆាយរិទ្ធី ដោយពិន្ទុក្នុងជំនួបកម្មវិធីអធិរាជគុនខ្មែររេដអាន
នៅលើសង្វៀនទូរទស្សន៍ស៊ីអិនស៊ី កាលពីថ្ងៃអាទិត្យ ទី២៦ មេសា ។
សម្រាប់ការប្រកួតនៅទឹកទី១ គឹម វាសនាភ្លាត់ស្នៀតត្រូវពុទ្ធ ឆាយរិទ្ធី វាយឱ្យរាប់៨ម្ដងរួចទៅហើយ ធ្វើឱ្យអ្នកទស្សនារំពឹងថា គឹមវាសនា មិនអាចឆ្លងផុតពីទឹកទី២នោះទេ ។ ប៉ុន្តែសំណាងល្អគេអាចតស៊ូប្រកួតជាមួយពុទ្ធ ឆាយ រិទ្ធី ដល់ទឹកទី៥ ។ ចាប់ពីទឹកទី២ទៅ គេឃើញគឹមវាសនា បានបង្កើនការវាយលុកយ៉ាងខ្លាំងទៅលើពុទ្ធ ឆាយរិទ្ធី វិញជាការសងសឹក ។ ជាពិសេសស្នៀតជើងរបស់គេបានទាត់សំដៅពោះទឹកក្នុងពេលកណ្ដាប់ដៃបានម៉ាត់ទៅលើផ្ទៃមុខបន្ថែមទៀតតែត្រូវពុទ្ធ ឆាយរិទ្ធី ទប់ជាប់រហូតធ្វើឱ្យគឹម វាសនា កាន់តែអស់ក្រឡាលោត ។
ទោះជាយ៉ាងនេះក្ដី ក៏គឹម វាសនា មិនទុកឱកាសឱ្យពុទ្ធ ឆាយរិទ្ធី យកឈ្នះលើរូបគេបានដោយងាយស្រួលនោះដែរ គេបានតស៊ូប្រកួតរហូតដល់ចប់ទឹកទី៥និងចាញ់ពិន្ទុទាំងប្រផិតប្រផើយប៉ុណ្ណោះធ្វើឱ្យរូបគេសោកស្ដាយយ៉ាងខ្លាំង ។
ក្រៅពីគូឯកនេះទៅនៅមាន៤គូផ្សេងទៀតសុទ្ធតែបំពេញចិត្តអ្នកគាំទ្រតាមរយៈវាយមិនដកដៃទាត់មិនដកជើងធ្វើឱ្យស្ថានការណ៍ប្រកួតទាំងមូលកាន់តែឡើងកម្ដៅមិនឈប់ឈរពីមួយទឹក
ទៅមួយទឹករហូតលេចចេញលទ្ធផលមុនចប់ការប្រកួតទាំង៥ទឹកទៀតផង ។
ជាក់ស្ដែង ក្រៅពី សេក គឹមរួន មកពីក្លិបអង្គរមានជ័យខេត្តសៀមរាបដែលបានចាញ់ពិន្ទុ ឡុង ឡា មកពីក្លិបអប់រំកាយនិងកីឡាស្រុកអន្លង់វែង កីឡាករសំ អាន មកពីក្លិបកងទ័ពពិសេសឆត្រយោង៩១១ ត្រូវកីឡាករ សេក គឹមសាន្ត មកពីក្លិបអង្គរមានជ័យខេត្តសៀមរាប វាយឱ្យសន្លប់នៅត្រឹមទឹកទី២ ។
កីឡាករ ពុយ ក្រូច មកពីក្លិបមកុដរាជសីហ៍ ចាញ់សន្លប់នៅក្រោមកណ្ដាប់ដៃកីឡាករ ពេជ្រ កក្កដា មកពីក្លិបចលនាយុវជន១៥៧គុនខ្មែរត្រឹមទឹកទី២ និងកីឡាករ សេក គឹមបេន បានផ្ដួលកីឡាករ ប៉ា តុងជិន ឱ្យសន្លប់ត្រឹមទឹកទី២៕ (កែសម្រួលដោយ ៖ បុប្ផា)
ចែករំលែកព័តមាននេះ