ក្នុងពេលថ្មីៗនេះលោកមហាសេដ្ឋី ម៉ាក ឃ្យូបេន (Mark Cuban) ដែលជាវិនិយោគិនដ៏ជោគជ័យមួយរូបបានចែករំលែកពីទស្សនៈរបស់លោកលើកូវីដ ១៩ និងបានផ្តល់នូវដំបូន្មានល្អៗជាច្រើនដល់អាជីវករដើម្បីឆ្លងផុតគ្រោះមួយនេះផងដែរ ។ ក្រៅពីនោះមានសំណួរសួរទៅកាន់លោកពីវិធីធ្វើការដោយមានប្រសិទ្ធិភាព ។
លោកបាននិយាយថា «ខ្ញុំមិនចូលរួមប្រជុំ ឬទទួលទូរស័ព្ទទេ ។ ខ្ញុំនឹងចូលរួមកិច្ចប្រជុំមួយប្រសិនបើមនុស្សម្នាក់សរសេរសែកឲ្យខ្ញុំ ។ ខ្ញុំនឹងចូលរួមកិច្ចប្រជុំមួយប្រសិនបើមានមូលហេតុល្អក្នុងការសម្រេចការចរចាមួយ ក្រៅពីនោះគឺតាមអ៊ីមែលទាំងអស់» ។
មូលហេតុដែលលលោកធ្វើដូច្នេះគឺសាមញ្ញបំផុត ។ ការប្រជុំ និងការនិយាយគ្នាតាមទូរស័ព្ទសម្រាប់លោក ឃ្យូបេន ជាការខ្ជះខ្ជាយពេលវេលា ។
លោកបានបន្តបកស្រាយថា ខ្ញុំនាំការងារទាំងអស់ទៅអ៊ីមែលព្រោះតែមូលហេតុមួយចំនួន ។ ទីមួយ ខ្ញុំអាចឆ្លើយតបវាបានគ្រប់ពេលនាពេលយប់ ។ ទីពីរ វាផ្តល់ជាឯកសារបង្ហាញពីរាល់កិច្ចការទាំងអស់ដែលខ្ញុំកំពុងតែធ្វើ អ្វីដែលមិនទាន់ធ្វើហើយ ឬមិនទាន់បានអាន ខ្ញុំព្យាយាមរក្សាចំនួនឲ្យនៅក្រោម ៣០ ។ និងទីបី ប្រសិនបើនរណាម្នាក់ផ្ញើអ៊ីមែលមកខ្ញុំប្រមាណ ១០ ១៥ ២០ឆ្នាំមុន ខ្ញុំនៅតែមានវាដដែល ខ្ញុំអាចបើករកវាវិញ និងដឹងថាពួកយើងបាននិយាយគ្នាពីអ្វី ។ ទាំងនេះធ្វើឲ្យខ្ញុំធ្វើការបានកាន់តែមានប្រសិទ្ធិភាព ។
លើសពីនេះទៅទៀត លោកបានផ្តល់យោបល់ដល់មនុស្សដែលត្រូវធ្វើការពីផ្ទះឲ្យអនុវត្តដូចលោកដែរហើយអ្នកនឹងមើលឃើញប្រសិទ្ធិភាពការងារកើនឡើងជាក់ជាមិនខាន ។
ក្រៅពីនេះហើយលោកបានចែករំលែកនូវអ្វីដែលលោកធ្វើពេលដែលទំនេរពីការធ្វើដំណើរចុះឡើងពីផ្ទះទៅកន្លែងធ្វើការ ។ លោកបាននិយាយថា វិធីរកលុយរបស់ខ្ញុំ គឺតម្រូវឲ្យខ្ញុំឈានមុខអ្នកដទៃជានិច្ច ។ ដូច្នេះខ្ញុំជាម៉ាស៊ីនអាន ។ ខ្ញុំអានរាប់ម៉ោងជារៀងរាល់ថ្ងៃមិនថាចាសៀវភៅ អ្វីដែលមានអនឡាញ ឬឯកសារអប់រំដទៃទេ ៕
ចែករំលែកព័តមាននេះ