ពាក្យសម្តីដែលយើងពោលចេញទៅសំខាន់ណាស់ ពោលត្រូវនឹងមានប្រយោជន៍ តែបើពោលខុសនឹងចាកប្រយោជន៍ ហេតុនោះទើបព្រះពុទ្ធបង្រៀនឱ្យយើងចេះជ្រើសរើសពាក្យសម្ដីសម្រាប់និយាយស្តីឱ្យដូចជាកសិករជ្រើសរើសគ្រាប់ពូជសម្រាប់ដាំដុះសាបព្រោះយ៉ាងនោះដែរ ហើយព្រះអង្គតែងបានបង្រៀនយើងកុំឱ្យពោលពាក្យណាដែលធ្វើឱ្យអ្នកដទៃឈឺចាប់ ខូចប្រយោជន៍ បែកបាក់សាមគ្គី ឬពាក្យរោយរាយឥតប្រយោជន៍ ។
ពោលពាក្យល្អពីរោះពិសា ពាក្យមានប្រយោជន៍សូម្បីតែមួយឃ្លា មួយប្រយោគក៏ប្រសើរជាងពាក្យរោយរាយឥតប្រយោជន៍រាប់ពាន់រាប់ម៉ឺនប្រយោគដែរ ។ ពាក្យដ៏ប្រពៃសំដៅដល់កថាវត្ថុ គឺពាក្យដែលបុគ្គលគប្បីពោល១០យ៉ាងគឺ ពោលអំពីការមិនលោភលន់១ អំពីការសន្ដោស១ អំពីការស្ងប់ស្ងាត់កាយនិងចិត្ត១ អំពីការនៅមិនច្របូកច្របល់ដោយពួកក្រុម១ អំពីការព្យាយាមក្នុងការងារទាំងឡាយ១ អំពីសេចក្តីល្អ១ អំពីសេចក្តីចម្រើនដោយការសាមគ្គី១ អំពីសេចក្តីអត់ធន់១ អំពីការមិនបៀតបៀនគ្នា១ និងអំពីការមិនព្យាបាទ ឈ្នានីសគ្នា១ ។
កិរិយាពោលនូវពាក្យមានប្រយោជន៍ ពាក្យល្អប្រពៃយ៉ាងនេះហើយ លោកចាត់ថាជាបុគ្គលគួរគោរពកោតក្រែង ។ សាន សារិន
ចែករំលែកព័តមាននេះ