រាជធានីភ្នំពេញ៖ អគ្គនាយកបច្ចេកទេសនិងជាអ្នកនាំពាក្យក្រសួងសង្គមកិច្ច អតីតយុទ្ទជន និងយុវនីតិសម្បទា ឯកឧត្តម តូច ចាន់នី បានថ្លែងឲ្យដឹងថារាជរដ្ឋាភិបាលបានវិនិយោគកាន់តែច្រើនទៅៗក្នុងវិស័យសង្គមកិច្ច ជាពិសេសលើកកិច្ចការជួយដល់ស្ត្រីមានផ្ទៃពោះនិងកុមារតូចអាយុក្រោម ២…
រាជធានីភ្នំពេញ៖ អគ្គនាយកបច្ចេកទេសនិងជាអ្នកនាំពាក្យក្រសួងសង្គមកិច្ច អតីតយុទ្ទជន និងយុវនីតិសម្បទា ឯកឧត្តម តូច ចាន់នី បានថ្លែងឲ្យដឹងថារាជរដ្ឋាភិបាលបានវិនិយោគកាន់តែច្រើនទៅៗក្នុងវិស័យសង្គមកិច្ច ជាពិសេសលើកកិច្ចការជួយដល់ស្ត្រីមានផ្ទៃពោះនិងកុមារតូចអាយុក្រោម ២ ឆ្នាំ ។
ស្ត្រីមានផ្ទៃពោះ និងកុមារអាយុក្រោម ២ឆ្នាំនៅកម្ពុជាទទួលបានជាង ១៩០ ដុល្លារពីរដ្ឋាភិបាលផងដែរ ។
ថ្លែងនៅសន្និសីទសារព័ត៌មានស្ដីពី «វឌ្ឍនភាព និងទិសដៅការងារបន្ដរបស់ក្រសួងសង្គមកិច្ច អតីតយុទ្ទជន និងយុវនីតិសម្បទា» នាថ្ងៃទី ២៨ មេសានេះ ឯកឧត្តម តូច ចាន់នី បានបញ្ជាក់ថា ជាក់ស្តែង ស្ត្រីមកពីគ្រួសារក្រីក្រ ដែលពីមុនមិនមានលទ្ធភាពទៅមន្ទីរពេទ្យ ពេលមានផ្ទៃពោះ ពេលនេះពួកគាត់អាចទៅមន្ទីរពេទ្យគ្រប់ទីកន្លែងដើម្បីធ្វើការពិនិត្យផ្ទៃពោះ តាមដានសុខភាពរបស់គាត់ ទៅចាក់វ៉ាក់សាំង ហើយរាល់ការទៅពិនិត្យម្តងគឺគាត់ទទួលបានប្រាក់បន្ថែមចំនួន ៤ម៉ឺនរៀលៗ ទៅតាមការកំណត់របស់រាជរដ្ឋាភិបាល ដូច្នេះជារួម ស្ត្រីម្នាក់ និងកុមារអាយុក្រោម ២ឆ្នាំ ម្នាក់គឺទទួលបានជាង ១៩០ ដុល្លារសម្រាប់សេវាសុខភាព ក្នុងនោះជាមធ្យម ក្នុង ១ថ្ងៃៗ យើងចុះឈ្មោះស្ត្រីមានផ្ទៃពោះក្នុងគ្រួសារក្រីក្រ ចំនួន ២០០ នាក់។
អ្នកនាំពាក្យរូបនេះបានបន្តថា គិតត្រឹមរសៀលថ្ងៃទី២៧ ខែមេសា ក្រសួងសង្គមកិច្ច អតីតយុទ្ទជន និងយុវនីតិសម្បទាបានផ្តល់សាច់ប្រាក់ជូនស្ត្រី និងកុមារអាយុក្រោម ២ឆ្នាំ ក្នុងគ្រួសារក្រីក្រ បានចំនួន ៨៤,៧៧៦នាក់ ដែលគិតជាប្រាក់មានចំនួនប្រមាណជាង១៨ ៧៧៩ ០០០ ០០០ រៀលរួចហើយ ៕
ចែករំលែកព័តមាននេះ