ខេត្តក្រចេះ ៖ រថយន្តប៉ាកុងចំនួន២គ្រឿងផ្សេងទៀតជាប្រភេទរថយន្តកែច្នៃ និងត្រូវបាន កម្លាំងអាវុធហត្ថ កំណត់ថា ជារថយន្តសម្រាប់ប្រើឲ្យការដឹកជញ្ជូនអនុផលព្រៃឈើខុសច្បាប់ នោះគឺត្រូវបានធ្វើការរឹបអូសយកមកដុតកម្ទេចចោលកាលពីថ្ងៃទី២៦ មេសា ។ នេះបើយោងតាមការផ្សាយព័ត៌មានពីបណ្តាញព័ត៌មានសង្គមរបស់អាវុធហត្ថលើផ្ទៃប្រទេស។
ប្រភពព័ត៌មានដដែលនេះបានឲ្យដឹងទៀតថា រថយន្តប៉ាកុងដែលត្រូវបានធ្វើការដុតកម្ទេចនេះ គឺបានមកពីការស្រាវជ្រាវពីមន្ត្រីអាវុធហត្ថលើផ្ទៃប្រទេសសហការជាមួយកម្លាំង អាវុធហត្ថស្រុកសំបូរ បានចុះស្រាវជ្រាវរុករកឃើញនៅចំណុចភូមិអាជេន ឃុំកំពង់ចាម ស្រុកសំបូរ កាលពីពេលកន្លងទៅ។ តែក្នុងការបង្ក្រាបរថយន្តកែច្នៃខុសច្បាប់ទាំងពីរគ្រឿង នេះគឺមិនមាននណាម្នាក់ជាម្ចាស់ចេញមកទទួលខុសត្រូវនោះទេ។
សេចក្តីរាយការណ៍និយាយថា រថយន្តប៉ាកុងទាំង២គ្រឿងដែលត្រូវបានបង្ក្រាប និងយក ទៅដុតកម្ទេចនេះ ត្រូវគេសង្ស័យថា ជារថយន្តសម្រាប់ឈ្មួញដែលបានធ្វើសកម្មភាពដឹក ជញ្ជូនឈើខុសច្បាប់ចេញពីតំបន់ព្រៃឡង់នៅខាងក្រោយស្រុកសំបូរ។ ខណៈសព្វថ្ងៃបទ ល្មើសព្រៃឈើនៅក្នុងស្រុកសំបូរ និងស្រុកព្រែកប្រសព្វ ឈ្មួញកំពុងតែមានសកម្មភាពយ៉ាងផុលផុស ហើយឈើទាំងនោះគឺសុទ្ធសឹងតែដឹកចេញពីតំបន់ព្រៃឡង់ យកមកលក់ចែកចាយ បន្ត ក្រោមការដឹកជញ្ជូនទៅតាមគ្រប់រូបភាពនិងមធ្យោបាយ។
សូមបញ្ជាក់ផងដែរថា នេះជាការដុតកម្ទេចវត្ថុតាងរថយន្តដឹកឈើល្មើសច្បាប់ដែលបាន អនុវត្តជាលើកទី៤ ពីកម្លាំងអាវុធហត្ថខេត្តក្រចេះ ក្នុងប្រតិបត្តការបង្ក្រាបបទល្មើសព្រៃឈើ យ៉ាងក្តៅគគុក ជាមួយនិងវិធានការដ៏តឹងតែងក្រោមការបញ្ជាដឹកនាំដោយផ្ទាល់ពីនាយឧត្តមសេនីយ៍ សៅ សុខា អគ្គមេបញ្ជាការរងកងយោធពលខេមរភូមិន្ទជាមេបញ្ជាការកង រាជអាវុធហត្ថលើផ្ទៃប្រទេស និងជាប្រធានគណៈកម្មការជាតិបង្ក្រាបបទល្មើសធនធាន ធម្មជាតិ។ (កែសម្រួលដោយ ៖ បុប្ផា)
ចែករំលែកព័តមាននេះ