ខេត្តសៀមរាប ៖ បើតាមសេចក្តីរាយការណ៍បានឱ្យដឹងថា ប្តីប្រពន្ធ២នាក់កំពុងតែជិះម៉ូតូតាមផ្លូវទាំងព្រឹក ក្នុងបំណងទៅផ្សារទិញអីវ៉ាន់ ក៏ស្រាប់តែត្រូវដើមឈើ១ដើមរលំសង្កត់ពីលើ បណ្តាលឱ្យរបួសធ្ងន់ទាំង២នាក់ និងខូចខាតម៉ូតូទាំងស្រុង បង្កឱ្យមានការភ្ញាក់ផ្អើលកាលពីម៉ោង៨និង៣០នាទីព្រឹក ថ្ងៃទី២៦ ខែមេសា ឆ្នាំ២០២០ ចំណុចតាមផ្លូវមាត់ស្ទឹងសៀមរាបខាងជើងផ្សារពោធិ៍លង្កា ស្ថិតក្នុងភូមិមណ្ឌល៣ សង្កាត់ស្លក្រាម ។
តាមប្រភពពីមន្ត្រីនគរបាលប៉ុស្តិ៍សង្កាត់ស្លក្រាម បានប្រាប់នៅល្ងាចថ្ងៃទី២៦ មេសានេះថា ជនរងគ្រោះទាំង២នាក់ប្តីប្រពន្ធ ១-ប្តីឈ្មោះ មូ ពីរូ អាយុ56ឆ្នាំ មុខរបរបើកបរ ទីលំនៅបច្ចុប្បន្នក្នុងភូមិទ្រាំង សង្កាត់ស្លក្រាម ក្រុង/ខេត្តសៀមរាប ២-ប្រពន្ធឈ្មោះ ពាញ ផល្គុន អាយុ54ឆ្នាំ មុខរបរមន្ត្រីអភិរក្សអង្គរ ។ ចំណែកម៉ូតូមួយគ្រឿងរបស់ជនរងគ្រោះ ម៉ាក zoomer x ស៊េរីឆ្នាំ 2018 ពណ៌ក្រហមលាយខ្មៅ មិនចាំផ្លាកលេខ រងការខូចខាត ដោយបាក់កែប និងតួរចំពាក់កណ្ដាល ។
ប្រភពដដែលបន្តថា មុនពេលកើតហេតុ ជនរងគ្រោះទាំង២នាក់ប្ដីប្រពន្ធ បានជិះម៉ូតូចេញពីផ្ទះតាមផ្លូវ ក្នុងបំណងទៅផ្សារពោធិ៍លង្កា ដើម្បីរកទិញអីវ៉ាន់ លុះមកដល់ចំណុចកើតហេតុខាងលើ ស្រាប់តែដើមក្ងោក១ដើមនោះបានពុកគល់ រួចក៏ដួលរលំចុះសង្កត់ពីលើជនរងគ្រោះទាំង២នាក់ដែលកំពុងធ្វើដំណើរតាមផ្លូវនោះ បណ្តាលឱ្យបុរសជាប្តីរងរបួសធ្ងន់ត្រង់ក្បាល និងស្មា ចំណែកប្រពន្ធរងរបួសត្រូវចំដើមទ្រូងនោះតែម្តង រីឯម៉ូតូជនរងគ្រោះវិញរងការខូចខាតទាំងស្រុង ។
បច្ចុប្បន្នជនរងគ្រោះទាំង២នាក់កំពុងតែសម្រាកព្យាបាលនៅមន្ទីរពេទ្យសឹងរិទ្ធីរ៉េត ចំណែកម៉ូតូ zoomer មួយគ្រឿងនោះ ត្រូវបានកូនរបស់ជនរងគ្រោះយកទៅរក្សាទុកនៅផ្ទះហើយ៕ (កែសម្រួលដោយ ៖ បុប្ផា)
ចែករំលែកព័តមាននេះ