ខេត្តព្រះវិហារ ៖ បើតាមសេចក្តីរាយការណ៍បឋមបានឱ្យដឹងថា បុរសម្នាក់បានបាត់បង់ជីវិតភ្លាមៗ ក្រោយពេលបញ្ជូនទៅមន្ទីរពេទ្យ បន្ទាប់ពីបុរសរូបនេះបានបើករថយន្តរបស់ខ្លួនចេញពីកន្លែងលំហែកាយមួយកន្លែងជាប់ជើងភ្នំត្បែងមានជ័យ ខណៈពេលនោះជនរងគ្រោះមានបំណងជាន់ហ្វ្រាំងរថយន្ត តែបែរជាច្រឡំជាន់ហ្គាទៅវិញ ស្រាប់តែល្បឿនរថយន្តលឿនទៅមុខក៏ជ្រុលធ្លាក់ចូលទៅក្នុងទឹកស្រះតែម្តង បង្កឱ្យមានការភ្ញាក់ផ្អើលកាលពីល្ងាចថ្ងៃទី២៥ ខែមេសា ឆ្នាំ២០២០ ស្ថិតនៅក្នុងភូមិមហាផល ឃុំឈានមុខ ស្រុកត្បែងមានជ័យ។
សេចក្តីរាយការណ៍បន្តថា បុរសរងគ្រោះខាងលើឈ្មោះ ឈួន ឈាន អាយុ៤៥ឆ្នាំ រស់នៅភូមិភារកិច្ច សង្កាត់ប៉ាលហាល ក្រុងព្រះវិហារ ។
បើតាមលោកនាយសេនាធិការដ្ឋាន នៃស្នងការដ្ឋាននគរបាលខេត្ត បានឱ្យដឹងថា មុនកើតហេតុ គេឃើញបុរសរងគ្រោះខាងលើ បាននាំប្រពន្ធ និងកូនតូច2នាក់ទៀតទៅលំហែកាយនៅមាត់ស្រះមួយកន្លែង ជាប់ជើងភ្នំត្បែងមានជ័យ ស្ថិតនៅភូមិមហាផល ឃុំឈានមុខ ស្រុកត្បែងមានជ័យ ខេត្តព្រះវិហារ ។
លោកបន្តថា ក្នុងដំណើរលំហែកាយនោះ បុរសរងគ្រោះបានផឹកគ្រឿងស្រវឹងយ៉ាងច្រើន រហូតដល់មានសភាពស្រវឹងជោកជាំ លុះដល់ថ្ងៃរសៀលបុរសរងគ្រោះក៏បានចូលទៅបើករថយន្តរបស់ខ្លួនក្នុងគោលបំណងនាំប្រពន្ធ និងកូនមកផ្ទះវិញ ប៉ុន្តែដោយសារសភាពស្រវឹងខ្លាំងពេក ក៏ច្រឡំជើងជាន់ហ្គារថយន្តថាជាប្រាំង រួចក៏ជ្រុលចូលទៅក្នុងស្រះឈ្លក់ទឹកតែម្តង ។
លោកបន្តទៀតថា ពេលនោះទោះបីជាប្រជាពលរដ្ឋនៅទីនោះខំនាំគ្នាជួយអន្តរាគមន៍វាយកញ្ចក់រថយន្តយ៉ាងណាក៏ដោយ ក៏មិនអាចជួយជីវិតបុរសខាងលើបានទេ ដោយឡែកចំពោះប្រពន្ធ និងកូន២នាក់ទៀត រួចផុតពីគ្រោះថ្នាក់នេះ ដោយសារតែប្រពន្ធ និងកូនមិនទាន់បានឡើងជិះរថយន្តជាមួយប្តីផង ក៏ស្រាប់តែកើតហេតុអាក្រក់នេះតែម្តង ។
សូមបញ្ជាក់ថា ក្រោយកើតហេតុ ក្រុមគ្រួសារ ក៏បាននាំយកបុរសខាងលើ យកមកសង្គ្រោះនៅមន្ទីរពេទ្យបង្អែកខេត្តភ្លាមៗដែរ ប៉ុន្តែជាអកុសលបុរសខាងលើ បានបាត់បង់ជីវិតទៅហើយ ។ (កែសម្រួលដោយ ៖ បុប្ផា)
ចែករំលែកព័តមាននេះ