រាជធានីភ្នំពេញ ៖ អំណោយសប្បុរសជនរស់នៅប្រទេសកាណាដា បានផ្តល់ជូនអ្នករងគ្រោះក្នុងឧបទ្ទវហេតុរត់ជាន់គ្នាស្លាប់ និងរងរបួសលើស្ពានពេជ្រ នៃមជ្ឈមណ្ឌលតាំងពិព័រណ៍ទីក្រុងកោះពេជ្រ កាលពីរសៀលថ្ងៃទី២៣ ធ្នូ ២០១០ ដែលកំពុងសំរាកព្យាបាលនៅមន្ទីរពេទ្យកាល់ម៉ែត ចំនួន២៣នាក់ តាមរយៈលោកពា សៀង ពេជ្រ ។ លោកពា សៀងពេជ្រ រស់នៅប្រទេសកាណាដា មានមុខរបរទិញ-លក់ផ្ទះបានឱ្យដឹងថា តាមរយៈការចុះផ្សាយព័ត៌មាន និងវ៉េបសាយកោះសន្តិភាព ស្តីពីគ្រោះថ្នាក់រត់ជាន់គ្នានៅលើស្ពានពេជ្រ នៃមជ្ឈមណ្ឌលតាំងពិព័រណ៍ទីក្រុងកោះពេជ្រ កាលពី រាត្រីថ្ងៃទី២២ វិចិ្ឆកា ២០១០ បណ្តាលឱ្យមនុស្សស្លាប់ និងរបួសយ៉ាងច្រើនសន្ធឹកសន្ធាប់ ដែលជាហេតុការណ៍នឹកស្មានមិនដល់នោះ រូបលោកមានការសោកស្តាយ និងសង្វេគយ៉ាងខ្លាំងដល់បងប្អូនជនរួមជាតិទាំងនោះ ។
ដូច្នេះហើយទើបធ្វើឱ្យបងប្អូន មីង មា ពុក ម៉ែ ដែលរស់នៅទីក្រុងតូរ៉ុនតូ ប្រទេសកាណាដា ជាពិសេសចៅអធិការវត្តខ្មែរ ព្រះនាមជឿន និល និងប្រធានគណៈកម្មការវត្តឈ្មោះសូ ហ៊ីង បាននាំគ្នាបរិច្ចាគថវិកាផ្ទាល់ខ្លួនសរុបចំនួន២.០០០ដុល្លារអាមេរិក តាមរយៈរូបលោក ជូនដល់ជនរងគ្រោះដើម្បីសំរាលទុក្ខលំបាក ។ នៅរសៀលថ្ងៃទី២៣ ធ្នូ ២០១០ លោក និងមន្ត្រីតំណាងមន្ទីរពេទ្យកាល់ម៉ែត បានយកថវិកាជូនដល់ដៃជនរងគ្រោះលើស្ពានកោះពេជ្រ ចំនួន២៣នាក់ ដែលកំពុងសំរាកព្យាបាលនោះហើយដោយក្នុងម្នាក់ៗទទួលបានថវិកាចំនួន៨៥ដុល្លារអាមេរិក ។ នារីរងគ្រោះឈ្មោះស្រី មុំ ដែលរងរបួសកំភួនជើង បច្ចុប្បន្នកំពុងសំរាកព្យាបាលនៅក្នុងមន្ទីរពេទ្យកាល់ម៉ែត បាននិយាយទាំងក្តុកក្តួលថា ក្មួយស្រីមានទឹកចិត្តរំភើបក្រៃលែង អំណោយទាំងនេះមានតំលៃថ្លៃថ្លាណាស់ សំរាប់អ្នកខ្វះខាតដូចរូបនាង និងជនដទៃទៀត…។ ព័ត៌មានលំអិតនឹងផ្សាយជូននៅពេលក្រោយ និងនៅលើទំព័រកាសែតកោះសន្តិភាព.
ចែករំលែកព័តមាននេះ