រាជធានីភ្នំពេញ, ថ្ងៃទី ២៤ ខែមេសាឆ្នាំ ២០២០ ៖ ក្រុមហ៊ុន DKSH ជាក្រុមហ៊ុនផ្តល់សេវា កម្មពង្រីកទីផ្សារឈានមុខគេដោយផ្តោតលើទ្វីបអាស៊ី…
រាជធានីភ្នំពេញ, ថ្ងៃទី ២៤ ខែមេសាឆ្នាំ ២០២០ ៖ ក្រុមហ៊ុន DKSH ជាក្រុមហ៊ុនផ្តល់សេវា កម្មពង្រីកទីផ្សារឈានមុខគេដោយផ្តោតលើទ្វីបអាស៊ី បានផ្តល់អំណោយឱសថសារវ័ន្ត និងរបស់របរប្រើប្រាស់ប្រចាំថ្ងៃចំនួន ៤០០ឈុត ដើម្បីជាជំនួយដល់គ្រូពេទ្យជួរមុខផ្នែក ប្រយុទ្ធប្រឆាំងនឹងកូវីដ-១៩ ។ អំណោយនេះត្រូវបានប្រគល់ជូនលោកសាស្ត្រាចារ្យវេជ្ជ បណ្ឌិត ងី ម៉េង ប្រធានមន្ទីរពេទ្យមិត្តភាពខ្មែរ-សូវៀត និងសហការី ជាមួយអ្នកគ្រប់គ្រង និងបុគ្គលិកក្រុមហ៊ុន DKSH Cambodia ។
ក្នុងស្ថានភាពនាពេលបច្ចុប្បន្ននេះ យើងគ្រប់គ្នាខិតខំពុះពារយ៉ាងខ្លាំងក្នុងការប្រយុទ្ធ ប្រឆាំងនឹងកូវីដ-១៩ ដោយអនុវត្តន៍តាមការណែនាំ និងបទបញ្ញត្តិផ្សេងៗពីអង្គការសុខ ភាពពិភពលោក ក្រសួងសុខាភិបាល និងរដ្ឋាភិបាល ។
ឆ្លៀតក្នុងឱកាសនេះ DKSH ដែល ជាអ្នកផ្តល់សេវាថែរក្សាសុខភាពដ៏ធំមួយនៅក្នុងប្រទេស សូមនាំយករបស់ទាំងអស់នេះ ទៅផ្គល់ជូន គ្រូពេទ្យជួរមុខដែលពួកគាត់ខិតខំធ្វើការទាំងយប់ទាំងថ្ងៃនៅក្នុងទីកន្លែងដែល មានហានិភ័យខ្ពស់ ។ ការបរិច្ចាគនេះ គឺដើម្បីជួយពួកគាត់អោយមានថាមពលខ្លាំងក្លា និង មានសុខភាពល្អដើម្បីបន្តកិច្ចការសង្គម និងសហគមន៍ ។
លោក Brajesh Hurkat ប្រធានផ្នែកផលិតផលថែរក្សាសុខភាពនៃក្រុមហ៊ុន DKSH ប្រចាំ ប្រទេសកម្ពុជា និងឡាវ បានមានប្រសាសន៍ថា «យើងសូមថ្លែងអំណរគុណយ៉ាងជ្រាល ជ្រៅចំពោះលោកវេជ្ជបណ្ឌិត គិលានុប្បដ្ឋាយិកា និងជំនួយការទាំងអស់ដែលតែងតែខិតខំ អស់ពីសមត្ថភាព ដើម្បីជំនះពេលវេលាដ៏លំបាកនេះ ។
ខ្ញុំក៏សូមថ្លែងអំណរគុណចំពោះ ក្រុមការងារ DKSH សម្រាប់ការខិតខំប្រឹងប្រែង ដើម្បីឱ្យដំណើរការផ្គត់ផ្គង់នូវផលិតផល ឱសថ និងផលិតផលប្រើប្រាស់របស់យើងនៅបន្តទៅមុខដោយរលូន ។ ខ្ញុំសូមជូនពរ អោយអ្នកគ្រប់គ្នាមានសុវត្ថិភាព និងសុខភាពល្អ» ។
ជាមួយគ្នានេះមន្ទីរពេទ្យមិត្តភាពខ្មែរ-សូវៀត ក៏បានប្រគល់លិខិតកោតសរសើរដល់ក្រុម ហ៊ុន DKSH Cambodia ចំពោះការចូលរួមបរិច្ចាកនេះផងដែរ ៕ ដោយសហការ (កែសម្រួលដោយ ៖ បុប្ផា)
ចែករំលែកព័តមាននេះ