រាជធានីភ្នំពេញ ៖ ព្រឹត្តិការណ៍រត់ម៉ារ៉ាតុងអន្តរជាតិចក្រភពខ្មែរ ដែលគ្រោងធ្វើក្នុងខែសីហា ឆ្នាំ២០២០ នៅលើទឹកដីអង្គរខេត្តសៀមរាបនោះ នឹងត្រូវលើកពេលទៅរៀបចំធ្វើនៅឆ្នាំក្រោយវិញ ដោយសារការបារម្ភពីការរីករាលដាលនៃជំងឺCOVID-19។
ស្របពេលប្រទេសកម្ពុជា ក៏ដូចជាប្រទេសជាច្រើនលើពិភពលោក កំពុងប្រឈមនឹងការរាតត្បាតនៃជំងឺឆ្លងដ៏កាចសាហាវខាងលើ កម្ពុជាបានសម្រេចផ្អាកការរៀបចំព្រឹត្តិការណ៍រត់ប្រណាំងម៉ារ៉ាតុងអន្តរជាតិចក្រភពខ្មែរនៅឆ្នាំនេះ។ ព្រឹត្តិការណ៍នេះ នឹងចាប់ផ្តើមដំណើរការឡើងវិញនៅឆ្នាំក្រោយ ពោលគឺក្រោយស្ថានភាពនៃជំងឺCOVID-19មានភាពធូរស្រាលវិញ។
នេះបើតាមការលើកឡើងរបស់លោក វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជា និងជារដ្ឋលេខាធិការក្រសួងទេសចរណ៍។
តាមលោក វ៉ាត់ ចំរើន នេះជាព្រឹត្តិការណ៍រត់ប្រណាំងអន្តរជាតិទី២ដែលត្រូវបានផ្អាក បន្ទាប់ពីកម្ពុជា បានសម្រេចផ្អាកការរៀបចំព្រឹត្តិការណ៍រត់ប្រណាំងពាក់កណ្តាលម៉ារ៉ាតុងអន្តរជាតិ ភ្នំពេញ ដែលគ្រោងធ្វើឡើងនៅខែមិថុនា ឆ្នាំ២០២០ ។ ការផ្អាកនេះ ធ្វើឡើងក្រោយមានការសំណូមពរពីអត្តពលិកជាតិ និងអន្តរជាតិ ។ លោកបន្តថា អ្នកដែលបានចុះឈ្មោះ និងបង់ថ្លៃចូលរួមព្រឹត្តិការណ៍នេះរួចហើយ គណៈកម្មការនឹងរក្សាទុករហូតដល់ព្រឹត្តិការណ៍នេះរៀបចំឡើងវិញ ។ ដូច្នេះ អ្នកដែលចុះឈ្មោះ និងបង់ថវិការួចហើយនៅឆ្នាំនេះ ពុំចាំបាច់ចុះឈ្មោះ ឬបង់ប្រាក់ម្តងទៀតនោះទេ។
លោក វ៉ាត់ ចំរើន បន្តទៀតថា សម្រាប់ព្រឹត្តិការណ៍រត់ប្រណាំងពាក់កណ្តាលម៉ារ៉ាតុនអន្តរជាតិនៅខេត្តសៀមរាប ដែលអាចទាក់ទាញអត្តពលិកជាតិ និងអន្តរជាតិរាប់ម៉ឺននាក់ឲ្យចូលរួម នាអំឡុងខែធ្នូ កំពុងស្ថិតក្នុងការពិចារណា ថាតើគួររៀបចំនៅឆ្នាំនេះ ឬត្រូវលើកពេលដូចព្រឹត្តិការណ៍ទាំងពីរខាងលើ ។ តែយ៉ាងណា លោក វ៉ាត់ ចំរើន អះអាងថា ការផ្អាក ឬមិនផ្អាក វាអាស្រ័យលើស្ថានភាពជាក់ស្តែងនៅពេលនោះ។
គិតត្រឹមថ្ងៃទី២៣ ខែមេសា ឆ្នាំ២០២០ កម្ពុជាបានអ្នកផ្ទុកជំងឺCOVID-19ចំនួន១២២នាក់ ហើយបានព្យាបាលជាសះស្បើយចំនួន១១០នាក់ ។ ដូច្នេះកម្ពុជានៅមានអ្នកជំងឺតែ១២នាក់ទៀតប៉ុណ្ណោះដែលកំពុងសម្រាកព្យាបាល។ អ្វីដែលគួរឲ្យកត់សម្គាល់ក្នុងរយៈពេលប៉ុន្មានថ្ងៃចុងក្រោយនេះ កម្ពុជាពុំបានរកឃើញអ្នកជំងឺរលាកសួតថ្មីដែលបង្កឡើងដោយកូរូ៉ណាវីរុស
ប្រភេទថ្មីនោះឡើយ ៕ (កែសម្រួលដោយ ៖ បុប្ផា)
ចែករំលែកព័តមាននេះ