រាជធានីភ្នំពេញ ៖ ដោយសារវិបត្តិជំងឺCOVID-19ស្ថិតក្នុងស្ថានភាពផុយស្រួយនៅឡើយ ព្រឹត្តិការណ៍ប្រកួតកីឡាទាំងអស់បានផ្អាកសកម្មភាពរបស់ខ្លួនក្នុងនោះការប្រកួតបាល់ទាត់ថ្នាក់ជាតិធំៗចំនួន២ដែលកំពុងតែពេញនិយមនាពេលបច្ចុប្បន្ន ក៏ត្រូវគេឃើញផ្អាកសកម្មភាពទាំងស្រុងដែលរហូតមកដល់ពេលនេះមិនទាន់ដឹងថា បើកប្រកួតវិញនៅពេលណានោះទេ ។
លោក ឈី កុលបុត្រា លេខាធិការប្រតិបត្តិគណៈកម្មការប្រកួតបាល់ទាត់ជាតិកម្ពុជា (CNCC)ដែលជាគណៈកម្មការគ្រប់គ្រងការប្រកួតបាល់ទាត់លីគកំពូលកម្ពុជា និងពានរង្វាន់ សម្តេចតេជោ ហ៊ុន សែន បញ្ជាក់ប្រាប់អ្នកសារព័ត៌មានថា ពេលនេះពុំទាន់អាចបញ្ជាក់ពីគម្រោងដំណើរការប្រកួតឡើងវិញនៃក្របខ័ណ្ឌកំពូលកម្ពុជា និងពានរង្វាន់សម្ដេចតេជោ ហ៊ុន សែន បាននៅឡើយ ដោយការប្រកួតទាំងពីរកម្រិតនៅតែបន្តផ្អាករហូតមកដល់ពេលនេះ អាស្រ័យលើស្ថានភាពជាក់ស្តែង និងសេចក្តីប្រកាស ឬការណែនាំរួមពីថ្នាក់ដឹកនាំ ។
លោកអះអាងថាយោងតាមការប្រកាសរបស់រាជរដ្ឋាភិបាលមិនឲ្យមានការប្រមូលផ្តុំលើសពី១០នាក់ទេ ដូច្នេះការប្រកួតបាល់ទាត់នេះលើសគោលការណ៍បែបនេះបាត់ទៅហើយ ហើយក៏អត់ទាន់មានការណែនាំណាពីថ្នាក់ជាតិ ឬមួយក្រសួង ឬស្ថាប័នណាឲ្យយើងដែរ ។ ដូចឃើញស្រាប់ហើយ សេចក្ដីថ្លែងការណ៍ចេញមកមិនឲ្យមានការជួបជុំនៅឡើយ ។
ជាក់ស្ដែង ការប្រកួតរបស់យើង គ្រាន់តែមួយក្រុមមានកីឡាករលើសការហាមប្រាមនេះបាត់ទៅហើយ ចុះទម្រាំពីរក្រុមទៀត ទោះយើងលេងបិទទ្វារក៏ដោយ ក៏មានចំនួនកាន់តែច្រើនទៀត ។ យើងព្យាយាមកុំឲ្យប៉ះពាល់គ្នានាពេលបច្ចុប្បន្ននេះសិន ចាំមើលការណែនាំពីថ្នាក់ដឹកនាំ ឬសេចក្តីប្រកាសថ្នាក់ជាតិ ឬក៏ក្រសួងសិន បើគាត់ចេញគោលការណ៍ថ្មីបែបណាទៀត ចាំយើងនឹងយកមកពិភាក្សាក្នុងក្រុមការងារ ក៏ដូចជាមួយក្លិបបាល់ទាត់ទាំងអស់ជាសមាជិក។
លោក ឈី កុលបុត្រា លើកឡើងបន្ថែមថា CNCC តែងតែទាក់ទងគ្នាតាមអនឡាញន៍ជាប់ជានិច្ច ហើយក៏រង់ចាំស្ថានការណ៍ និងការណែនាំដូចគ្នា ។ ប្រសិនបើមានសេចក្ដីថ្លែងការណ៍ ឬសេចក្ដីណែនាំណាមួយ នោះភាគីទាំងអស់នឹងពិភាក្សាគ្នា ។ ក៏មានសេចក្ដីរាយការណ៍ផ្សេងទៀតផងដែរថា ទាំងគណៈកម្មការប្រកួតបាល់ទាត់ជាតិ ក៏ដូចជាបណ្ដាក្លិបទាំង១៣ គ្រោងជួបប្រជុំពិភាក្សាគ្នាដើម្បីសម្រេចថានឹងបន្តបែបណាតទៅទៀតនៃពានរង្វាន់ទាំង២ខាងលើ។
សូមបញ្ជាក់ថា ការប្រកួតបាល់ទាត់ក្របខ័ណ្ឌលីគកំពូលកម្ពុជា និងពានសម្ដេចតេជោ ហ៊ុន សែន ២០២០ ត្រូវបានផ្អាកជាបណ្ដោះអាសន្ន ដោយសារបញ្ហាជំងឺCOVID-19 កាលពីថ្ងៃទី១៩ ខែមីនា ឆ្នាំ២០២០ ។ ការប្រកួតលីគកំពូលបានសម្រាកត្រឹមវគ្គសន្សំពិន្ទុសប្តាហ៍ទី៥ ខណៈការប្រកួតពានរង្វាន់សម្តេចតេជោ ហ៊ុន សែន បានផ្អាកត្រឹមវគ្គជម្រុះក្នុងពូលថ្នាក់ខេត្ត៕ (កែសម្រួលដោយ ៖ បុប្ផា)
ចែករំលែកព័តមាននេះ