រាជធានីភ្នំពេញ ៖ កម្មវិធីប្រកួតប្រដាល់«កម្ពុជា សង្វៀនគុនខ្មែរ»នៅលើសង្វៀនទូរទស្សន៍ស៊ីអិនស៊ីដែលប្រកួតបិទទ្វារនៅថ្ងៃសៅរ៍ ទី២៥មេសា សប្ដាហ៍នេះ ប្រមូលផ្ដុំទៅដោយអ្នកប្រដាល់ជើងចាស់ចំនួន៣គូឡើងមកបង្ហាញថ្វីដៃដណ្ដើមប្រាក់លាន ។ គូប្រកួតដណ្ដើមប្រាក់លានទី១តម្រូវទៅលើកីឡាករ សួន…
រាជធានីភ្នំពេញ ៖ កម្មវិធីប្រកួតប្រដាល់«កម្ពុជា សង្វៀនគុនខ្មែរ»នៅលើសង្វៀនទូរទស្សន៍ស៊ីអិនស៊ីដែលប្រកួតបិទទ្វារនៅថ្ងៃសៅរ៍ ទី២៥មេសា សប្ដាហ៍នេះ ប្រមូលផ្ដុំទៅដោយអ្នកប្រដាល់ជើងចាស់ចំនួន៣គូឡើងមកបង្ហាញថ្វីដៃដណ្ដើមប្រាក់លាន ។
គូប្រកួតដណ្ដើមប្រាក់លានទី១តម្រូវទៅលើកីឡាករ សួន ចាន់នី មកពីក្លិបបក្សីស្លាបដែកប្រកួតជាមួយកីឡាករ ឡុង បេនលឿន មកពីក្លិបសាលវ័ន្តកីឡា ។ ទោះបីកីឡាករទាំងពីរមិនធ្លាប់ជួបគ្នាពីមុនមក ក៏កីឡាករ សួន ចាន់នីមួយរយៈមកនេះតែងតែមានមុខប្រកួតនៅលើសង្វៀនជាញឹកញាប់ ចំណែកឡុង បេនលឿនវិញទើបតែបង្ហាញមុខនៅលើសង្វៀនស៊ីអិនស៊ីលើកនេះប៉ុណ្ណោះ ។ ដូច្នេះសម្រាប់ការប្រកួតលើកនេះមិនដឹងថា ឡុង បេនលឿន អាចតស៊ូប្រកួតជាមួយ សួន ចាន់នី បានដល់ទឹកទី៥ឬអត់នោះទេ ។ តាមពិតទៅ ឡុង បេនលឿន ក៏ជាអ្នកប្រដាល់ជើងចាស់មួយរូបដែរ តែដោយសារការបាត់មុខពីលើសង្វៀនប្រកួតយូរបែបនេះ មិនដឹងថាថ្វីដៃរបស់គេនៅល្អដូចមុនឬយ៉ាងណានោះទេក្នុងពេលសួន ចាន់នី មិនទាន់ធ្លាក់កូដនៅឡើយ ។
គូប្រកួតដណ្ដើមប្រាក់លានទី២តម្រូវទៅលើកីឡាករ ឡុង ជិន មកពីក្លិបខ្លារខិនមានរិទ្ធប្រកួតជាមួយកីឡាករ តាញ់ មករា មកពីសមាគមកីឡាប្រដាល់ក្រសួងការពារជាតិ ។ កីឡាករទាំងពីរបច្ចុប្បន្នកំពុងតែមានឈ្មោះបោះសំឡេងគ្រាន់បើព្រោះអីក្នុងមួយខែគេមានឱកាសឡើងសង្វៀនប្រកួតពី២ទៅ៣ដងឯណោះ។ ដូច្នេះបើនិយាយពីបច្ចេកទេសប្រកួតវិញមានការកើនឡើងដូចគ្នា ទោះជាយ៉ាងណាសម្រាប់ការប្រកួតលើកនេះមិនមានអ្នកណាម្នាក់ហ៊ានអះអាងទុកមុនពីលទ្ធផលចាញ់ឈ្នះបានឡើយ ដោយសារតែពួកគេទាំងពីរមានថ្វីដៃប្រកួតនៅលើសង្វៀនប្រហាក់ប្រហែលគ្នា។
ចំណែកគូប្រកួតដណ្ដើមប្រាក់លានទី៣តម្រូវទៅលើកីឡាករ ឈៀង វ៉ៃ មកពីក្លិបនាគរាជចតុមុខ ប្រកួតជាមួយអ្នកប្រដាល់ចាស់វស្សា លួន សុខខេង មកពីក្លិបពុទ្ធសេរីវង្សពោធិសែនជ័យ ។ គូនេះថ្វីត្បិតតែ លួន សុខខេង ចាស់វស្សាជាងបន្តិចមែនតែគេបានបាត់មុខពីលើសង្វៀនយូរឆ្នាំមកហើយ ។ ដូច្នេះសម្រាប់វត្តមានរបស់គេនាពេលនេះគ្មានអ្វីដែលគួរឱ្យបារម្ភនោះទេ។
ចំពោះកីឡាករឈៀង រ៉ៃវិញ ក៏ទើបតែលេចមុខនៅលើសង្វៀនក្នុងពេលនេះដែរ ។ ចាំមើលការប្រកួតលើកនេះអ្នកណាជាអ្នកមានសំណាងក្នុងការដណ្ដើមយកប្រាក់លានបាន? ៕ (កែសម្រួលដោយ ៖ បុប្ផា)
ចែករំលែកព័តមាននេះ